ペストリーショップ (Closed)

聖誕東京六天遊抵步當日適逢姨丈壽辰，因難以估計航班會否延誤，XO仔又想搞吓氣氛喎，所以就預早經入住嘅「東京凱悅酒店」（Hyatt Regency Tokyo）於其餅店「Hyatt Regency Tokyo Pastry Shop」訂咗個蛋糕，並安排晚上十一點半送上長輩房間。聖誕節期間，西餅店只有一款草莓蛋糕「Christmas Strawberry Cake」可選，連稅每個單售2,970円，加朱古力牌要另收238円。酒店職員準時將蛋糕，連同蠟燭、八份餐具及開水推進房間，整潔衛生，而且十分周到。聖誕草莓蛋糕造型簡單精美，每個角度都可以清楚睇到粒粒士多啤梨，層次分明得很。真材實料嘅草莓蛋糕入口香滑鬆軟，鮮甜輕巧，絕對係好睇又好食！