元祖もつ鍋楽天地 天神本店

営業中

現在閉店

食物體驗一坐底見到呢個堆得高高的牛腸鍋上枱，第一眼覺得派頭真係有氣勢，尤其係嗰堆韭菜(突然諗起大陸…），睇落真係幾吸引。當牛腸煮下煮下，由生勾勾變成熟嘅過程，好似滿心期待咁想試吓，但當我夾起嚟一咬… 嚇親！牛腸硬到好似橡筋，無論煮幾耐都係咬唔開，粗略統計約十粒入面有七粒係用手都扯唔斷，因為我真係試過用手扯。對呢種牛腸鍋有幻想嘅朋友，呢個真係有啲難以接受。服務體驗服務方面亦都幾失望。我哋一入門口已經係攞住Tabelog嘅預訂capscreen，畀男職員睇咗，但佢竟然黑口黑面，連一粒聲都唔出，好似我哋打擾咗佢咁。我哋只好向後面嘅女職員，用Google Translate講解先得到少少反應。呢啲態度，真係有啲難頂，明明係間網上好出名嘅店，但服務方面完全冇做得好，令人無奈。價錢方面講真，呢餐飯最後埋單真係有啲痛。睇Tabelog時見到2800円，但係原來係每人價錢！所以兩個人總共要差唔多6000円，唔知唔覺價錢就加倍咁計。對於咁樣嘅食物同服務體驗，再加埋呢個價錢，真係覺得唔值。結論係，呢間應該係福岡嘅網紅店，靚就真係靚，但食物同服務都追唔上，睇落比實際享受好得多。