無論你係「初心者」定自認去日本旅遊達人，都可以參考以下日本小編推介，六間囊括東京、大阪同京都三大旅遊熱點嘅餐廳。記得Bookmark埋張優惠券，食盡地道日本美食同時慳返筆錢再去買手信！
 

東京
 

築地市場新鮮壽司
弁富【贈送菜品】

築地市場最快會喺出年5月搬去新豐洲市場，想去嘅朋友仔記得把握時間喇。場內市場有唔少壽司店，弁富唔算係名氣最高嘅，不過亦因此唔需要一大早去排隊先食到。舖仔細細，可以坐喺吧枱前面睇住師傅熟練咁握出新鮮嘅壽司。記得用埋優惠券，食埋贈送菜品！
 

淺草松阪牛燒肉
一頭買焼肉 玄 浅草本店【贈送菜品】

呢間燒肉店就喺東京必去嘅淺草寺附近，主打高品質和牛，包括頂級嘅松阪牛！而且店方係購買一整隻牛，所以唔單止有常見嘅肋肉、牛舌，亦會有內臟同其他比較少見嘅部位選擇。有選擇恐懼症嘅朋友可以點套餐，用埋贈送菜品優惠券就可以試盡唔同滋味。
 

大阪
 

道頓堀人氣章魚燒大阪燒
くれおーる 道頓堀店【九折優惠】

想一站式試哂大阪名物章魚燒同大阪燒？呢間連鎖店就可以一次過滿足哂你兩個願望！章魚燒有原味同唔同創作口味，包括酸梅紫蘇同招牌半熟玉子大蔥章魚燒。同時亦有唔同餡料嘅大阪燒、各式炸串等選擇。用九折優惠券食完繼續喺道頓堀行街買夠本！
 

酒店高CP值懷石料理
心斎橋 禅園【贈送菜品】

喺心齋橋鬧市裡面有個禪園？其實佢係位於大阪日航酒店裡面嘅懷石料理餐廳，定價唔算親民，但師傅用足心機，用嘅全部都係新鮮時令食材，前菜、魚生、涼菜、主食、甜點等都一絲不苟。想食平啲嘅話，可以午市嚟食特惠套餐或者便當，用埋贈送菜品優惠券就更抵！
 

京都
 

人氣魚介雞湯拉麵店
加藤屋 四条にぼ次朗【贈送菜品】

近年無論香港定日本都興起食W系湯底嘅拉麵，即係魚介同雞骨湯或者豚骨湯混合式。而呢間就以魚介雞湯做招徠，係雞湯當中加入鯷魚乾，味道鮮香易入口而且唔會太鹹。而且麵條係店家自製嘅極粗麵，部分仲可以免費加到超大盛(300g)，用埋贈送菜品優惠券一定可以食到飽。
 

老店嘆Shabu Shabu
一粒庵【贈送菜品】

呢間有過百年歷史嘅老店專賣涮涮鍋同壽喜燒。特別之處係佢地嘅鍋係舊式炭爐，利用鍋中間嘅炭為食物加熱，傳熱夠快，放塊和牛入去滾兩滾，點埋芝麻醬就食得。佢地嘅蔬菜同牛肉都特別選用京都本地出產，保證新鮮。去之前記得Bookmark定張贈送菜品優惠券。
 

優惠券唔需要列印，去到日本用手機出示電子優惠券就得。怕無網絡嘅話Cap圖亦得，得咗！想知道更多日本餐廳優惠券嘅細節，可以睇返之前開飯仔寫嘅優惠券特集。長氣啲提多你一次，OpenRice訂枱優惠已經擴展到曼谷、台北同澳門，呢個暑假出遊前不妨睇睇有無心水！

文：Cathy