京都新熱點 KYOTO TOWER SANDO必試美食指南
2017-07-22
較早前開幕嘅京都「Kyoto Tower Sando」,位於全新改裝嘅京都塔B1樓至2樓。呢度一站式包含京都美食、特色手信、文化體驗,對遊客嚟講絕對係極吸引嘅新熱點。Bookmark埋小編推介嘅必食餐廳,嚟緊嘅京都之旅去試吓啦喂~



B1F: 美食 Food Hall


B1F全層係Food Hall,集結咗19間餐廳。各餐廳都有自己嘅吧檯座位,顧客
可以喺心水餐廳買完嘢食之後,拎去其他一般座位享用


Restaurant京の焼肉処 弘Restaurant

【弘】係京都嘅人氣連鎖燒肉店,Tower Sando分店更推出「燒肉串」等餐點,定位更親民。推介「おまかせ5本盛り (廚師發辦拼盤5選, 980円)」,可以食到招牌串燒及牛脷等,CP值甚高;「和牛ユッケ (和牛他他, 980円)」嘅生牛肉既新鮮又有品質,可見餐廳對食材處理管理嚴謹。


(圖片:京都タワーサンド)



總店2004年喺二条區開業,人氣一直居高不下。招牌嘅沾麵「つけそば(900円)」以嚴選嘅小魚乾熬出高湯,湯頭味道鮮甜唔肥膩,同彈牙嘅粗麵好夾。另外「座 Za(780円)」同樣係呢度嘅招牌拉麵,醬油系湯頭以小魚乾同雞熬煮而成,麵條亦夠小麥香。呢度每日仲會陳列出是日嘅6款配菜,帶俾客人新鮮感。



Restaurant大起水産 回転寿司Restaurant

關西地區嘅人氣連鎖迴轉壽司店。壽司材料都係由日本全國各地入貨,新鮮之餘每碟都係100円起。而呢度最出名嘅要數「本まぐろトロ (本鮪魚肚,540円)」,入口即化又鮮味,幾抵食。除咗壽司種類多,亦有唔少一品料理,食完肯定大滿足。



Restaurant鳥せいRestaurant

【鳥せい】憑住日本酒及雞肉串燒成為人氣餐廳。日本酒係由有340年歷史嘅老字號釀酒廠釀造,而Menu入面嘅各款雞肉料理送酒都好夾。

好似「五串Set (700円)」嘅食材採用咗日本國產嘅土雞名種,肉質上乘;「鶏肉のこうじ蒸し (酒麴蒸雞, 650円)」嘅酒麴都係喺釀酒廠入貨,確保品質及風味。

(圖片:京都タワーサンド)


1F: 手信市場


見到「手信市場」四個字,係咪已經好興奮先!呢度集結咗各種京都名物,從招牌手信到最受注目嘅生力軍都有,共有大約30間商舖。


Restaurantマールブランシュ (Malebranche)Restaurant

人氣蛋糕甜品店【Malebranche】除咗喺京都有唔少分店,近年仲擴展到日本全國開舖。招牌產品--京都抹茶貓舌餅「茶の菓(680円起)」當然係手信首選,而呢度仲有另一款必試嘅店舖限定雪條「生茶の菓(250円)」。
雪條雖然唔算大支,大約兩、三啖嘅份量,但用咗特濃宇治抹茶整成,味道濃郁回甘。隨雪條附送一小杯萃取特濃抹茶醬,蘸住嚟食茶味更香,層次更豐富。



Restaurant本くず氷Restaurant

呢間雪條店嘅產品據講冇使用乳製品製作,只用「吉野本葛 (一種高級葛製品)」令雪條凝固,比一般雪條更健康。而呢度用嘅吉野本葛,仲係皇室御用品牌「奈良・黒川本家」嘅出品嚟𠻹。

其他材料亦好講究,水係京都嘅名水「桃之井」,仲有宮古島產嘅黑糖、高級有機宇治茶等。特別推介充滿京都風情嘅「有機宇治抹茶(500円)」同「焙茶黑豆(700円)」兩款口味!




RestaurantUCHU wagashiRestaurant

呢間和菓子店嘅出品都係用嚴選嘅和三盆糖製造,而且每一粒都係手工製,真材實料。

【UCHU wagashi】嘅落雁(一種傳統和菓子)外型仲玩味十足,同一般常見嘅和菓子好唔同,而且口味豐富。其中「drawing(680円)」嘅感覺似七巧板咁,每塊細細件又色彩繽紛,俾你發揮創意自由組合。


(圖片:京都タワーサンド)


2F: 文化工作坊


遊客喺2樓可以透過工作坊嘅形式體驗日本文化,例如親自製作和菓子、傳統工藝品等,無論一家大細、放閃情侶、大班朋友或者獨遊人士都啱玩。想旅程多個難忘嘅回憶?嚟呢度啱哂!


大起水產 握壽司製作講座及體驗

壽司職人會親自示範及細心指導握壽司嘅製作方法,俾大家用新鮮嘅魚類海產,嘗試製作正宗嘅握壽司。
參加者享用完自製嘅壽司之後,仲有個小型畢業禮,有畢業證書攞,兼有一Set壽司送俾大家拎走𠻹㗎!

工作坊由朝早9點至夜晚9點期間,一日舉行5場,每場約長1小時30分鐘。
費用分3種:8件壽司2160円、10件壽司2700円、12件壽司3240円(均附紅味噌湯及茶)。


工作坊歡迎大人小朋友及外國遊客參加。有興趣嘅朋友可以參考Kyoto Tower Sando網頁了解詳情及時間:

https://www.kyoto-tower-sando.jp/shop/index/152 

(圖片:京都タワーサンド)



京都
Kyoto Tower Sando (京都塔內・B1F-2F)

京都車站中央口前;直接連接京都車站地下街。

營業時間:B1F: 11:00-23:00 / 1F, 2F: 9:00-21:00

官方網站https://www.kyoto-tower-sando.jp/

關鍵字
京都
Kyoto Tower Sando
手信
餐廳
美食
必食
しゃかりき
大起水產
鳥せい
本くず氷
UCHU wagashi
Malebranche
開飯編輯
熱愛日本流行文化的開飯小編會致力為大家追蹤最新、最豐富的美食資訊!
餐廳資料
更多
收起