香港人去日本真係隨時密過返鄉下，想日日留喺日本玩，同時銀包又無咁傷？咁就要善用OpenRice嘅優惠券！而家OpenRice同日本Hotpepper合作，幫大家搜羅東京、大阪同京都餐廳嘅最新優惠券，第一批就有接近700間餐廳！就算唔識日文都可以盡享九折或贈送菜品等著數，而家就等開飯仔講下點用，順手介紹埋精選優惠！

三個步驟輕鬆用優惠券

Step 1：用OpenRice Apps或者去OpenRice網站，可以喺主頁左上角切換日本唔同城市。切換成功後主頁就會立刻顯示「精選優惠」 

Step 2：未有心水嘅話，可以喺主頁點「優惠」Icon；又或者喺「進階搜尋」當中剔「餐廳優惠劵」，搜尋有提供優惠劵嘅餐廳 

Step 3：優惠券會有齊中文條款同細則，不過去到日本嘅時候，就記得出示返下面嘅日文版內容畀餐廳店員啦
 

東京無敵拉麵！
 

池袋必食拉麵　　無敵家

被唔少當地人同遊客譽為必食拉麵，其中一個原因係佢地就算每日都有顧客大排長龍，但拉麵嘅水準依然相當穩定。而且招牌豬骨湯底非常香濃，加埋柔嫩嘅厚切叉燒同半熟蛋，完全就係無得輸嘅黃金組合！用優惠券可享贈送菜品優惠，食得更滿足。
 

任食炭燒牛肉　　牛角 池袋明治通り店

我知大家一定會話：香港都有牛角啦！但日本店係用嘅係炭爐，有一陣獨特炭燒香味之餘，高溫仲有效鎖住肉汁。另一特點係日本牛角分單點同放題兩個形式，最貴嘅放題有齊海鮮同牛舌！不過唔想食得太飽嘅話不如都係單點啦，單點用埋優惠券有九折優惠，各位食肉獸係咪好心動？
 

大阪要食大阪燒！
 

心齋橋大阪燒老店　　法善寺 三平

去到大阪，點都要食一次大阪燒嘅。呢間位於購物熱點心齋橋附近嘅大阪燒店已經創業40年，其中一個賣點係有超過30款唔同食材配搭口味！人氣No.1係牛筋蔥花蒟蒻大阪燒，味道同生啤最夾。另外亦有薯仔芝士煙肉等選擇。有九折優惠嘅話，慳埋啲錢宵夜繼續食！
 

和牛壽喜燒放題　　すきやき壱番 心斎橋店

同樣喺心齋橋附近，呢間裝修優雅嘅餐廳專食壽喜燒同涮涮鍋(Shabu-Shabu)，而且兩款都有任食，最啱大胃王。最值得一讃嘅係放題用嘅亦係日本國產和牛，點埋日本生雞蛋一齊食特別嫩滑！記得用優惠券享受埋贈送菜品優惠，食得最精明嘅仲唔係你？
 

 
京都庭院打卡！
 

特色豚骨黑拉麵　　博多 一幸舎 京都拉麺小路店

京都車站嘅拉麵小路係唔少遊客最鐘意去嘅搵食點，一嚟京都車站係多條鐵路嘅交匯點，二嚟佢集合咗日本各地嘅特色拉麵。呢間嚟自福岡縣博多，豬骨湯底濃郁帶獨特香味，重口味人士必點味道有層次嘅黑芝麻蒜味！買食卷之前記得出示優惠券，先有贈送菜品優惠喔。
 

庭院日式蕎麥麵　　茶寮 清坂亭

雖然清水寺本堂而家維修緊，但周邊嘅清水坂、三年坂同二年坂依然值得去悠閒散步。如果著住和服，就更加要嚟呢間餐廳！外面有個雅緻小庭院，最啱瘋狂打卡。而賣嘅係傳統蕎麥麵、天婦羅同丼飯，特別有日本風味嘅呢。當然要記得用埋贈送菜品優惠，畫上滋味句號。

而家有近700間餐廳提供優惠券，遲啲仲有更多！收藏咗咁多優惠券怕唔記得用？善用「篩選」功能就可以按唔同條件篩選優惠劵啦。最後提埋你，OpenRice訂枱優惠已經擴展到曼谷、台北同澳門，出發前不妨睇睇有無心水！

文：Cathy