1
0
0
Address
 B1F, 8-9-15, Ginza, Chuo-ku, Tokyo
 東京都中央区銀座8-9-15 ジュエルボックス銀座B1階
Telephone
03-5568-1515
Opening Hours
Today
11:30 - 15:00
17:30 - 22:00
Mon
Closed
Tue - Sun
11:30 - 15:00
17:30 - 22:00
Payment Methods
Visa Master American Express Cash JCB Diners
Other Info
Parking
Takes Reservations
Update Restaurant Info
Above information is for reference only. Please check details with the restaurant.
Photos
Menu
Review (1)
美味肉匠
Level7 2023-06-02
25 views
肥肥家族係名日劇「Doctor X」嘅鐵粉，話說上回喺東京過聖誕節時專登一訪劇中院長最愛嘅鐵板燒專門店「銀座うかい亭」（Ginza Ukai Tei），味蕾大受感動過便與「うかい」（Ukai）飲食集團結下緣份。疫後重遊日本為母親大人慶生，第一餐就揀咗旗下潮興嘅割烹料理「銀座割烹うかい肉の匠」（Ginza Kappou Ukai Nikusho）。地牢餐店於大廈大堂黑漆漆嘅門面極富神秘感。步出升降機門，即踏進華麗耀眼嘅地域，成功營造出別有洞天嘅效果。潔亮嘅餐室最震撼就係幅竹林落地玻璃！以和風味濃嘅小擺設及品牌嘅水晶樹點綴，足以閃出氣派。獨立式洗手間都高雅衛生過人，除咗全電動化之外，廁紙仲有暗花架！店子中央共有十二個吧位圍繞住師傅嘅大舞台，方便貴客觀賞即席割烹之廚藝。據悉，店內亦設有兩間半私人及全私人廂房，不過當日已有座上客，故小弟未能參觀。每位席上都有齊備嘅自用日西餐具。外國遊客必須經酒店訂座，並預先定埋清一色嘅餐單。話明係賀壽就一於食豪啲，點豪華套餐「グランドコース」，33,000円/位已含稅，另收加一服務費。忙於翻譯、交際、拍照、錄音嘅XO仔竟然忘記咗影飲品餐牌，餐酒配對詳情都係憑單據及相片先可以重組返。一家四口嘅選擇都有所不同，一向好有節制嘅大小雙肥選配四杯酒酒嘅「ハーフペアリング」（Half Pairing; 9,900円/位）；最飲得同溝得嘅壽星女就好盡興咁玩配九杯嘅「フルペアリング」（Full Pairing; 16,500円/位），即除咗甜品冇酒飲之外，每一道菜都跟一杯香檳、紅、白或清酒。零酒精嘅哥哥就最特別，選配包咗五杯茶嘅「丸七製茶・ティーペアリング」（Marushichi Seicha Tea Pairing; 6,600円/位）。點好飲品，師傅仔先展出新鮮嘅食材並略作簡介。アミューズ：為午餐打響頭炮嘅白露筍粗粗長長，腍中帶爽，而且一啲渣都冇，沾上鮮黃色嘅芝士蛋蛋秘醬即為本身清香嘅白露筍添上潤滑。季節の恵み各産地からの一品：薄薄嘅針魚刺身爽彈有嚼勁，捲入清脆嘅沙律菜菜，效果十分清新。設計者選用玻璃碟盤透出粉紅色嘅醬汁，剛好襯埋櫻花盛開嘅季節，確真有心思！匠より本日の一品：細佬一向唔係咁好牛尾，總覺得啲肉好嚡，真係冇諗過熱煲內外表平平無奇嘅和牛牛尾竟然會有驚喜！鮮美嘅湖水藍碟上嘅牛尾清湯芳香鮮濃，中間件都幾大件吓嘅和牛牛尾超腍、超滑、超軟熟，半溶於口腔嘅滑溜感相信就係食牛尾嘅最高境界，大肥更形容此為牛尾中之極品，美味指數絕對爆哂燈！日本近海からのご馳走：相比起下，以海藻牛油燒煮嘅北寄貝似乎有點兒過熟而變得韌韌地。日本の豊かさ肉と米：接棒嘅和牛他他飯以金碗承載，矜貴之份量顯然易見！鮮紅艷麗嘅和牛他他柔潤不膩口，撈入飽滿嘅白飯、綑邊嘅紫蘇葉同紫蘇花及頂面嘅魚籽醬，組合鮮濃芬芳，滋味無窮！特選黒毛和牛フィレ肉：花花碟上嘅黑毛和牛牛柳睇落好似冇乜光澤咁，但咬落卻超級軟熟，毫不乾嚡，夾埋雪白嘅洋蔥薄片即培添爽甜，酸甜嘅醋汁醒神又醒胃。旬の椀物：或許如店名「うかい肉の匠」所示，廚師們之匠心獨妙在於肉，幾款海鮮菜式都比較遜色。紅碗內嘅紅鯛厚肉得黎尚算柔軟，完全唔嚡，個人只係略嫌味道清淡兼唔夠鮮，燒焦咗嘅魚皮又唔算特別香脆，感覺好一般。肉匠厳選極上神戸牛：大肥觀察力果然敏銳，見到和牛主菜連配菜都要隆重出場都知一定係筍野！外焦內紅白分明嘅極上神戶牛西冷油花豐腴，香軟潤腍，睇落只有兩件好似好孤寒咁，但其實食完都幾係野。配角除咗香濃惹味嘅靚蒜之外真係有筍食，爽脆清甜，可以中和返和牛嘅油脂，配搭份量同等和諧。匠よりメ料理：壓軸上陣嘅和牛壽喜燒「すき焼きミスジ」（Sukiyaki Misuji）雲石紋理鮮美，師傅即場燒煮梗係成功掀起高潮啦！薄薄嘅和牛幼嫩柔軟，混入橙美鮮亮嘅蛋黃醬豉油，靚肉變得尤其香滑，就連碗中嘅白飯都肥潤甜美，壽喜燒嘅甜味慢慢滲進味蕾，吃畢更齒頰留香，冇得頂呀！轉入甜品環節時，貴客要稍移玉步往內側嘅甜品吧享用。開放式廚房內有兩位掌舵人負責泡茶及備製甜點。甘味：等待肥哥哥刷出抹茶時先有簡單嘅蜂蜜雪糕，特色在鐵匙輕巧易𢳂。名物肉匠どら焼き抹茶：相信多啦A夢都陪伴好多讀者長大，大家對佢最喜愛嘅豆沙包應該唔會陌生，不過XO仔都係咁多年後先知原來豆沙包個日文係「どら焼き」（Dorayaki），即係同多啦A夢個發音差不多，終於睇透漫畫家嘅幽默心思。肉匠造出嘅燒餅夾住黑色嘅甜豆及雪糕，集鬆軟甜滑清涼於一身。新鮮刷出嘅抹茶果然零舍不同，成隻碗咁大嘅茶杯內可清晰地睇到翠綠細緻嘅抹茶泡泡，飲落茶茶唔覺有苦澀味之餘仲多咗份溫純甘香，好茶也！地庫餐廳「銀座割烹うかい肉の匠」高雅大方，服務生體貼友善，肉匠所烹調之豪華海陸套餐「グランドコース」以和牛菜式最為高質美味，講真海鮮就麻麻。寫食評時睇返餐牌先發現飯後其實仲可以加配一杯咖啡或餐後酒作「余韻への導…」，服務生當時冇提及所以肥肥家族未能享盡餘韻，難免會略感遺憾。 continue reading
(The above review is the personal opinion of a user which does not represent OpenRice's point of view.)
  • Recommend
    Recommended
  • Report
1 Recommended
    Show All 1 Reviews