連續兩個晚上都會經過心齋橋，呢邊實在同旺角一樣，不能遺忘。 看了地圖上最近美食，就有推薦這個附近的壽司。的確是非常傳統的吃法。 圍繞在吧檯，師傅關心問候你使用什麼語言，然後就聆聽你的需要，直接同佢壽司師傅講咩壽司咩要求，一邊飲酒聊天很有意思。 負責接待我們的是一個年級比較年長的師傅，他中氣跟足，我很喜歡這裡的鰻魚壽司。三文魚等等都很新鮮。 阿妹喜歡豆腐， 我地試了炸豆腐，木須非常多，豆腐外層松脆裡面嫩滑。狠狠好食呢。 金槍魚吞拿魚是每家店必點呀。

在機場寄存行李之後本來打算再離開關西港口的，晚上2100的飛機呢，現在都12點了。 但是因為不想再一進一出而且小腿已經受傷了， 就不然就機場隨便逛逛。 阿妹要吃天婦羅，她喜歡炸的東西，那我就勉強要牛肉喇， 牛肉烏冬湯底夠濃，是我喜歡的肥牛味道。 如果不想吃飯，那就不要點定食，單點就可以了。

我們一落機第一餐正式餐廳⋯之前聽說這家店不錯所以來一試！一開門只問了幾位就叫我們直接進店，之前我們見到之前客人一行四人已經坐了梳化位，但店員叫他們起來坐其他位！我們見到感覺不太禮貌⋯之後仲恐怖！突然有隻蟑螂不知從那裡跌倒我朋友身上再跌在地上就在我們身旁，我們通知店員他們只是叫了大家出來看但完全沒有處理⋯好彩隔離枱的港男為我們處理⋯可惜的是但店員完全沒有感謝他，望完他弄就算又冇俾紙巾、消毒等⋯⋯太差了！ 跟著食物來了我們叫女店員給三隻碟⋯她完全沒有眼神接觸我們再問多一次完全黑面😠再講食物方面只是普通⋯可是杯朱古力奶係我史上以來飲過最難飲的⋯他完全是一杯朱古力水⋯⋯⋯仲要我隔了一段時間感到肚子痛😤

地點方便，近難波站，由難波站出發，大約5-10分鐘路程，靜而帶旺，餐廳有兩層，禁煙，大人小孩合適，餐廳主打丼飯，味道適中，價錢合理，大約800Yen至2000yen左右

喺香港成日都見到疏乎里pancake店大排長龍， 雖然好想試下係咩味道令香港人為之瘋狂， 但係真係唔想浪費時間去排隊。 今次去大阪，終於「機會嚟喇，飛雲」。 嚟到嘅時候，係無人排隊嘅，仲有好多吉位。 入面嘅人都好休閒咁嘆緊pancake， 同香港排到身水身汗係好唔同。 食呢間之前都食過另一間鋪頭嘅疏乎里pancake， 比較起嚟，呢間係比較硬身，同埋好香蛋味。 好似食緊雞蛋味蛋糕咁 如果鍾意蛋味重嘅朋友，呢間都係唔錯嘅選擇！

臨上機返香港之前一定要買「阿伯芝士蛋糕」🧀🎂！今次好好彩，唔洗點排隊就買到。睇住d芝士蛋糕新鮮出爐，店員動作好快為蛋糕蓋印，之後即入透明膠袋，收到訂單就入紙盒同紙袋🛍，成個過程都好迅速！💨 · 🔸 芝士蛋糕（¥725，約HK$53） 當晚返到香港即刻同屋企人分嚟食，即晚KO成個蛋糕！😛 口感非常鬆軟，芝士味香濃，勁正！🤤 超級抵食嘅芝士蛋糕，好味又大個，芝士控表示非常滿足，遠超100分呀！😍 · P.S. Hand carry返香港，蛋糕表面保持唔到原來嘅面貌，皺晒皮... 😣 襯埋自家嘅雞公碟，別有一番風味 🤣

到大阪的第一餐，位置有點不好找，在地下商業街，下至地下商業街就有地圖，對應地圖找天丼てんや，貌似16號，可能是因為不好找的緣故，店裡遊客很少，很安靜 天婦羅味道很讚，一定要趁熱吃，點的套餐:上天丼+熱小そば，實際上就是天婦羅蓋飯+熱小蕎麥麵，建議點冷麵，不然會有點蓋住天婦羅的味道，下次準備嘗試新品豬肉天婦羅 買單時主動給了50快折扣，服務業不會中文，英文也很差，只能看圖說話，好在點單時有特製中英日文菜單

🥩牛舌控必食 大阪炭烤仙台牛舌🔥 無論睇youtube定google大阪必食推介 你都可能會見到呢間利久牛舌 身為牛舌控小隊長😂一早已經決定去食 其實menu上主要分普通/極上牛舌 極上牛舌比較厚 兩者都有6,8,10件牛舌之分 我就揀咗普通 先可以試得岀佢係咪堅🤣 再加上普通價錢抵好多🥺 我叫咗6件牛舌飯 配麥飯🍚 沙律🥗牛尾湯 大少叫了4件牛舌配牛肉咖哩 韭黃胡椒牛尾湯 超多韭黃 湯雖清但有牛味 重點牛舌睇得岀有炭燒痕跡 特別焦香 我覺得普通版嘅牛舌都已經好厚身 好彈口 又好嫩 好香牛舌味 食落有咬口無乜筋 只係有一舊食到特別有少少筋 佢會跟埋啲醃製過嘅娃娃菜同南蠻味噌 我覺得女仔叫6件牛舌已經夠飽 太多會有啲膩 去大阪如果落開梅田一定要去食下👍🏻 - 📍利久牛舌 JR大阪梅田車站中央南口 徒步1分鐘 (エキマルシェEKI MARCHE商場) #linggfoodie

XO仔遊埠時對食、買、玩可謂分秒必爭，眼見酒店退房手續要十二點前辦妥，坐黃昏機可以搭下午一點半班「南海特急快速列車」，絕對有足夠時間去埋對面間「一風堂」喎，咁當然係要拉埋班團友拆多餐啦！拉麵店面積比想像中大，用餐大堂共有三個圓圓嘅搭枱式吧位，不過雖然話十一點幾唔算爆，但都知啲客未必會想入鏡，所以細佬都好識做咁就住黎影。廚房就喺右方，一目了然，透明度極高。細佬被安排入座貼住廚房一邊嘅吧位，所謂近廚得食，所以連碗拉麵都熱過人，爽呀！早上十一時至下午三時，小店有午市優惠套餐可選，其中拉麵有五款，另加一百円可配五隻餃子及白飯，另加百五円則可配炒飯。睇唔明日文唔緊要，因餐店早已印好中、英、韓對照之彩圖餐牌，明顯歡迎旅客光顧。生啤五百円一杯似乎係大阪公價。話哂朝早已經喺黑門市場食咗壽司打底，細佬就好簡單咁淨食咗碗傳統嘅白丸元味拉麵。白丸元味拉麵（790円）：熱辣辣嘅拉麵點咗大約五、六分鐘已上枱，效率奇高！奶白色嘅豬骨湯底香濃甜美，幼身嘅麵條煙韌彈牙，厚切豬肉片肥瘦均勻，軟腍入味，配埋啲爽脆嘅蔥碎，人氣拉麵果真係Ichiban！日本人氣拉麵店「一風堂」環境簡潔企理，服務生友善好客且效率高，拉麵品質有保證，價廉物美，冇得輸呀！

香港越嚟越多餐廳有得食吉列炸火牛扒🥩，嚟到大阪，一定要去非常出名嘅「牛かつ もと村 難波店」朝聖！🤩 · 餐廳係地下舖，要落一條樓梯先入到去，我哋喺當地時間大約1905到達，地面已經出現人龍。當我哋排到去樓梯位置，職員就幫我哋落定order。📝 · 本身好想放棄唔食呢間，因為好肚餓😫，最後我哋等咗大概20分鐘，不過冇後悔，因為炸牛扒好出色呀！ · 呢度嘅抽風🌀設備幾好，冇油煙味。火爐會預先準備好，好快就上菜喇！ · 🔸 炸牛扒定食（¥1,300，約HK$91） 我哋各自叫咗一個炸牛扒定食，一大塊炸牛扒切成12條，厚薄適中。將炸牛扒放喺爐上輕輕燒一陣，牛肉表面熟咗，而又保持到入面嘅肉質軟腍，唔點醬汁都好好味呀！😍 呢度仲可以免費添飯🍚，有大、中、細碗選擇，好貼心！個餐有埋沙律、菜、湯，夠晒飽！😛 · 好值得一試嘅餐廳，如果唔太抗拒排隊，絕對要嚟試下！😎

大阪市內其中一個旅客必到嘅景點就係「黑門市場」。眾多親友去過都介紹話朝早越早去會越多好野食；如果只有時間去一次的話，揀離開前嗰日或嗰朝去可以邊食邊執啲正野返香港。上網查過，得知市場內有兩間人氣壽司店，其中最易搵就係位於入口處嘅「黒銀 黒門市場本店」。店子黑紅嘅門面同黑門市場個牌一樣色，襯到絕呀！小店光猛企理，感覺極之潔淨，門外有個出哂煙嘅木造飯桶，行過聞到飯香，即令人流哂口水。八點半到步時見冇人排隊喎，幾口子諗住第一個去幫襯啦，點知人家原來八點九先正式開門。邊等邊了解店子嘅運作，發現雪櫃內擺放出不同部位及價格之吞拿魚件。顧客可以買返屋企食之餘，亦可麻煩師傅即場切成刺身、握成壽司、或製出魚生丼。如相所示，師傅帶哂手套，好衛生架！加500円可有生啤一杯送魚生，不過早上九點未到就飲酒真係有啲過份囉！店內只有數個吧位，五個人坐哂，後面啲客就要等等啦！當日由姨媽話事，一買就買咗盒6千円嘅大拖羅，交由師傅切成刺身及壽司。嘩，粉嫩嘅大拖羅入口即化於口中，鮮香肥美，實在係太好味啦！「黒銀 黒門市場本店」果真有料到，小店乾爽企理，老闆員工一樣友善好客，拖羅質高味佳，價錢合理，吃畢家人都只恨叫得太少，無奈眼見後面條人龍已打哂蛇餅，唯有下次黎大阪時再食過。

Most friendly staff, will help you have a wonderful time in Osaka. You're either DJ or you're helping sing Karaoke. If I'm not there to egg you on, someone will be don't be too shy to grab the pole in the back if you lose your balance. Buy the all you can drink (3,000 yen for men 1,500 yen for women) to enjoy the bargains. Don't forget to go back to the bar often!

黎日本玩就梗係要盡情食啦！除咗壽司、壽喜燒、天婦羅等，屋企人最鍾意就係食串燒「焼き鳥」（yakitori）。由於旅遊書上冇乜推介串燒，XO仔就用日本人最常用嘅飲食網頁搵到一家好高分數嘅「まこ家」（Makoya），並經酒店訂座。店子並無漢字，所以唔熟路或者唔識睇日文就有啲難搵。通往樓上小店只有一條每級都好高嘅樓梯，長者上落及酒客離開時就特別危險。不過真係冇諗到佢真係咁旺場，氣氛咁熱鬧，顧客全部都十分年輕，而且清一色日本人，只有九人為外國人及有年長嘅代表。入座前，溫婉可愛嘅姐姐仔先道出店內職員冇人識講外語，餐牌亦只有日文，幸得悉小肥可以簡單日文溝通後，雙方即放下心頭大石；唔怪得知餐室內外真係唔係幾覺有英文啦！人多嘅長枱要除鞋先入得，坐咗落去尚算寬闊。桌上有齊筷子及小碟，明顯客人大多都會叫餸分黎食。大肥爸爸最感動就係見到佢至愛嘅五角形筷子，仲話未食已有良好嘅預感！埋位第一刻當然係要先嗌酒飲啦！四頁酒牌有紅酒、白酒、清酒、啤酒、燒酎、梅酒、其他果實酒等，當真夠哂多元化。熱茶同清酒啲杯都一樣咁有特色，相比起下透明嘅啤酒杯就變得普通咗。細佬啲日文真係有限公司架，好在多頁餐牌內大多菜式都附有彩圖對應，就連唔識日文嘅哥哥都可以點菜。「生ハムと水菜のシーザーサラダ」（680円）：一反傳統地，居酒屋嘅凱撒沙律入面混入咗蕃茄、火腿、「水菜」等，效果其實爽脆得都幾新穎，不過個人略嫌重口味咗少少，唔係細佬杯茶囉！「パリパリじゃが芋とホウレン草のゴマドレサラダ」（580円）：睇圖所叫嘅「Pari Pari」沙律原來用上切碎咗嘅菠菜絲同生菜作底，另加蕃茄粒同幼身而又乾巧脆脆嘅炸芋條點綴，配埋個惹味嘅芝麻醬，整體清爽得十分香口。「イベリコ豚お寿司」（600円/三件）：所謂伊比利亞豚壽司無論係外貌定抑或係味道都同厚切火腿無異，又乾又鞋，600円有三件好似好抵，但真係食唔過！「なんこつ唐揚げ」（500円）：炸雞軟骨賣相可能唔係特別出眾，但入口酥脆，且炸得好夠乾身，送酒一流！「名古屋手羽先唐揚」（500円）：幼幼嘅炸雞中翼已預先一開為二，故每件都只有一枝骨，用筷子食都完全冇難度。雞中翼肉質軟嫩，面層輕輕塗上甜甜嘅秘醬，惹味討好，結果當然係要追加啦！「つくね」（500円；卵黄付）：招版燒雞肉丸串脆嫩無比，點上香濃甜美嘅豉油及新鮮日本蛋黃，即增添滑溜，超！「鶏も豚も串焼き5種盛合せ」（800円）：開頭唔係太識叫啲串燒，所以就聽啲大人話先叫咗兩客串燒拼盤，邊樣啱食或者個樣好睇嘅就叫多幾串。拼盤中安全之選有嫩滑嘅雞翼同雞軟骨，其餘嘅豬肉同雞肉串都好夠肉汁，唔錯。「皮」（150円/串）：全晚最正就係散叫嘅串燒雞皮，燒得夠香脆之餘，油潤而不膩口，每串150円，堅抵食！「鶏ガララーメン」（600円）：豚骨拉麵就食得多，小肥好似真係第一次食雞骨拉麵。可能餐店每日用上多隻新鮮雞，為咗要善用食材，啲雞骨就用埋黎餚成湯底，製出雞骨拉麵。雞骨湯底同豬骨湯底色澤一樣呈奶白色，但雞骨湯底感覺上較清甜，香濃得黎冇咁厚同油，拉麵麵條煙韌彈牙，簡單味佳。樓上居酒屋「まこ家」面積雖則不大，但勝在氣氛輕鬆，十分地道，加上年輕嘅服務生友善落力，串燒菜式價廉物美，絕對係歡樂時光及宵夜嘅好去處！

首次黎神戶玩，話就話就係一天遊，但其實只會逗留大半日，為爭取時間，第一餐當然係要食聞名世界嘅神戶牛啦！從日本飲食網得知市內有間極受本地人歡迎嘅神戶和牛專門店「石田」，每間店嘅分別在於烹調和牛之方法，XO仔單憑天氣寒冷就揀咗去食涮涮鍋分店「すき焼きしゃぶしゃぶ神戸牛 石田」。
經酒店訂座簡易順利，當中確認詳情亦附帶埋地圖，不過當日卻因遇上多條道路封閉，結果就行錯咗去第二間分店，幸好集團旗下嘅店舖都喺附近，接待員一發現狀況，即通知嗰邊嘅服務生走過黎親自帶路，體貼程度實在令人太感動啦！
店子門面有個日式禪陣，流露著傳統和風設計。所有散座均為獨立式廂房，以木造敞門分格，私人空間足。每間房仲有個衣櫃俾食客掛起外衣及存放隨身物，唔洗食完一陣味咁行出街，感覺超級衛生。每個爐頭頂都有個大大嘅抽氣機同射燈，各方面都諗得十分周到。 餐牌首頁先展出神戶和牛証書，為貴客先打下強心針。 靚靚媽咪真係眼利，竟然俾佢留意到港人愛飲嘅十四代本丸清酒一合只售1,080円，比起香港平多多聲！既然係渡緊假，埋位就梗係要叫酒飲啦！細看餐牌會發現兩頁有關「石田」嚴選神戶和牛嘅概要，雖則附有彩圖，不過全為日文，又咁多字，所以都係影黎同大家分享。 店子午市提供多款壽喜燒及燒牛肉套餐，1,280円至4,800円食神戶和牛真係幾化算架，但因家人都係諗住黎食和式涮涮鍋，所以就大部份人都叫咗客包有小食、前菜、140g嘅特選神戶和牛、雜菜、飯或烏冬及甜品嘅涮涮鍋套餐「特選神戶牛しゃぶしゃぶ」；一客6,900円，加埋稅即7,452円。
點好菜，妹妹仔隨即送上鐵鍋，另跟多款調味配料、醬汁及小食。 是日小食為濕潤爽甜嘅薯蓉沙律。 四式前菜以拼盤呈上，左起分別為燉蛋、和牛壽司、芋頭件及漬物。和牛壽司輕輕燒過，半溶於口腔又唔會好溜。芋頭件則清新爽脆。最有驚喜反而係個燉蛋，因為清甜嫩滑嘅燉蛋內暗藏鬆爽嘅和牛。 主角神戶和牛嘅紅白雲石紋理均勻清澈，每片大得黎切得夠薄，外表已夠震撼！ 輕輕烚過嘅和牛入口即溶於口腔，軟滑柔潤，神戶牛果然零舍不同。 接著成籃上嘅雜菜款色多，且每款都咁新鮮高質。籃中個人最愛就係幾款日本靚菇。熱食最後仲有煙韌彈牙嘅烏冬。

上甜品前，每人先有一杯有助消化嘅焙茶。 涮涮鍋套餐以節令果物作結，當中橙美嘅日本柿十分清甜，提子亦爽潤非常。

埋單平均每人八千幾円，可邊飲靚酒，邊食高質神戶和牛涮涮鍋，團友們都激讚細佬好介紹！
「すき焼きしゃぶしゃぶ神戸牛石田」可稱為高級涮涮鍋及壽喜燒專門店，店內散座全為獨立式廂房，既舒適又衛生。服務生不單友善有禮，而且極體貼入微，陣店神戶牛肉高質美味，價錢絕對合理，實屬神戶必到之餐店也！

神戶秋季天氣比香港寒冷得多，見日頭食完涮涮鍋，晚餐就安排去食火力更猛嘅燒肉放題。XO仔同樣喺日本飲食網頁中挑選咗間人氣店「三宮 炭火焼肉 新撰組」，並經酒店訂座。天黑後，店舖都有霓紅燈照明，故亦易搵得多。用餐大堂全為木造枱櫈，合併式散座每四人一個爐及一個抽油煙機。幸好九人早已訂座，有得坐房。廂房面積唔算好大，不過都有衣櫃擺放外衣及隨身物，唯一唔方便之處在於出入要上落，對年長嘅團友有點困難，同埋座位並無椅背，飲大兩杯會有啲危險。訂位時已經連九人嘅6,500円晚市套餐都定好，飲品包咗兩小時放題，可於限定飲品牌上任選，但每人每次只可以叫一杯，仲要飲完一手交一手，絕不容許浪費飲料。食物款式則全權由廚房決定，大家只需見野就燒，燒好就食。食前大肥爸爸又再一次為桌上嘅五角形筷子鼓掌。店內年輕嘅服務生都非常好客落力，由新炭燒起。。。到中途見火力唔夠即自動加炭，十分專業；不過最安心就係見到有位可用國語溝通嘅妹妹仔。打響頭炮先有海鮮拼盤，每人都有一隻鮮鮑、蝦及蜆，當中蝦隻爽厚脆身。靚靚媽咪三姊妹全為隱世廚神，燒野當然係難唔到佢地啦，不過細佬真係冇諗過佢地可以就地取材，大玩清酒燒蜆及清酒鮑魚！嘩，清酒猶如畫龍點睛，令本身甜甜嘅蜆隻及鮑魚更為鮮香醇美，掂呀！接著嘅牛脷連肥膏方塊及檸檬上。哥哥熟巧地於燒板上塗上肥膏，邊燒邊滴上檸檬汁，燒出黎薄薄嘅牛脷爽潤帶脆，美味得很！食完海鮮同牛脷，妹妹仔隨即送上爽脆惹味嘅生洋蔥沙律，一解熱氣。全晚之最一定要數紅白紋理分明，且色澤鮮美嘅六式和牛拼盤！由於和牛不同部位嘅質感有所不同，師傅就預先切成不同形狀供貴客享用，明顯製作絕不馬虎。分開兩碟上嘅六款和牛鬆軟多汁，肉香鮮甜，確真冇得彈！除咗和牛之外，套餐其實仲包有豬肉同雞肉，質素唔係差，只係當食完和牛先上就難免會覺得比唔上。。。每份餐都包咗熱湯一碗，不過家人都情願飲多兩杯酒，結果就邊個想飲先續碗叫。相信讀者們都未必估得到壓軸上場嘅會係內臟拼盤，內含腸臟及豬腰，咬落索索聲，姨丈同小肥都食得勁興奮！神戶地道燒肉店「三宮 炭火焼肉 新撰組」雖則面積不大，但勝在氣氛輕鬆，服務稱心周到，6,500円嘅全包宴燒肉放題有六款正爆嘅和牛食，食物水準質高味佳，加埋兩小時任飲喎，抵玩到極呀！