賴先生與屈小姐的個人專頁

黎到旅程既第5日，要離開京都既市中心出發去浸溫泉啦，冇理由唔係臨別時造訪一下《錦市場》既！行左一圈之後，我地決定要試一試《魚力》！《魚力》係網上面以燒魚串而聞名！賴生帶屈小姐黎到，當然要試下啦！仲要佢係賣屈小姐鍾意既鰻魚呢不過佢呢度所有魚都係已經整好左既呢，即係炸過/燒過，你落左Order佢就會即時幫你翻熱，我地交低500 yen比個店員哥哥之後，佢就好快手咁幫我地燒番熱佢呢！1）燒海鰻串：3⭐️燒魚既精髓係咩呢？就係趁熱食啦！ 串燒海鰻其實就咁聞落去都幾香既，因為燒果陣都會塗醬汁上面，經過熱力逼一逼，逼晒醬汁香氣出黎！的確，醬汁既味道係唔錯既，同蒲燒鰻魚果隻同出一徹！可惜既係，海鰻經過燒完又燒既過程（翻燒），魚既油脂已經所剩無幾，而肉質亦因爲過度既炭燒而失去左彈性同水份，原來爽口彈牙既海鰻亦變成乾韌，可能係要照顧遊客多要快出貨而要改做翻熱處理，浪費左條海鰻。加上$500Yen得 3塊仔貌似唔係太抵（雖然鰻魚都係貴價食材）算罷，食完之後收拾心情我地繼續上路挑戰其他店！#翻燒魚#浪費了海鰻#試過了就算#不要離我太遠…查看更多

番到黎袛園，仲有一段路仔先到河原町，雖然食左京都勝牛，但行左咁耐好似已經消化左，唯有搵D小食補充下能量先啦（旅行大食症又發作啦）我地就行番去尋晚食鰻魚飯經過果一條街，去番大家都話要必試既《壹錢洋食》其實一去到個街口，你就好容易見得到呢間舖頭，因為佢都好似黑夜裡的一點光咁，佢係街口個舖位超級光猛，仲有大大個招牌咁我地睇左個Menu發現同嵯峨燒係唔同既，有分別！呢個有肉嫁，所以都值得試下賴生就好快手咁數左$680yen比老闆娘！（數Yen都好麻煩呢，好彩每次都有屈小姐幫賴生手，4隻手數快好多）一落完Order之後，師傳就係咁大板鐵板上面即煎啦！而且呢度有個好好既地方就係店外有張枱同櫈，可以比我地坐低食，唔駛怕要入去坐而要怕一人叫一份先好，冇咁尷尬1）壹錢洋食：5⭐️爆裂既蛋汁真係好吸引！成個餅有成2隻蛋，難怪會爆咁多蛋汁咁澎湃！而個煎餅外層口感軟綿綿，有D似台灣既蚵仔煎既外皮，加上佢2隻蛋未熟透，蛋汁同蛋白黏住外皮，更加似！ 而且入面既材料好豐富，口感一流，有蒟蒻、酸薑同蔥，呢3樣全部切粒上，粒粒既蒟蒻加添咬口，有D彈牙既啫喱嘴嚼下咁，酸薑粒就為醬汁帶黎酸味既味道層次變化，而蔥就爽口，帶蔥香味入面仲有鳴門卷、日本魚蛋同一塊國產牛肉，牛肉味都出，鳴門卷同日本魚蛋就令口感更加有層次，更多彈牙既野食入面！外面就軟綿綿，入面就爽口彈牙，好味最後，最外層有紫菜絲提香，醬汁拌左蛋汁之後冇咁重口味，濃得黎帶蛋味！正食完之後，4條小腿繼續向河原町出發#旅行大食症#準備下次四条行到十条#不停補充能量#牽著妳走的幸福#陪著妳走一生一世也不分…查看更多

係去錦市場之前，賴生其實做左好多功課，務求要令到屈小姐滿意成個行程，咁係做功課既期間，賴生發現左錦市場有間專賣豆類製品嫁，最出名係賣豆腐冬甩同埋豆腐雪糕嫁!  賴生同屈小姐行到錦市場既中間，近住一個十字路口，就會見到呢個專門賣豆腐類製品既舖頭啦!舖頭就成L字型，呢邊有就豆漿，豆腐同豉油果D野賣，而另一邊廂就賣豆乳雪糕同豆乳冬甩果D咁樣，其實。為左可以減低邪惡既罪疚感，屈小姐話唔想試甜野住，因為甜野係好肥既，而且佢深怕豆乳雪糕同豆乳冬甩會太甜冇豆味(偷偷地講你知，屈小姐曾經比同事呃左話日本既冬甩好食，患上左冬甩恐懼症)，所以試左豆漿先，試下個豆味再睇下點 1) 豆漿 : 3.5⭐️拎上手仲暖暖地嫁，對於岩岩食完生冷野既我地暖下胃就岩岩好!! 聞落去好香，但係落去呢，加左糖既，甜左少少，遮到個豆味!  但係個豆味呢其實都唔錯既，只係加得太多糖! 而口感都好順滑，唔差既!! 始終日本豆腐既豆味係重D同出D既，係來於有冇加得太重糖!所以最後我地冇食到豆乳雪糕同冬甩啦，因為怕太甜呢!#豆味控#說好的濃豆腐呢?#冬甩恐懼症#最後都係比賴生飲晒…查看更多

黎到京都既錦市場，一定要試一試京都海產既美味！賴生事前就做左功課，知道網上面大家都有推薦要黎一黎<<木村鮮魚店>>，主要係賣新鮮海產同平價醃製魚生串，每串都只係$200 Yen，難得黎到日本既錦市場，點都要親身試一試，睇下究竟好唔好食!!行到見到呢間鮮魚檔，就係聞名既<<木村鮮魚店>>啦，係鮮魚檔黎，提供即切魚生比人即食，但係要碰運氣先知有咩食，因為佢一邊開箱一邊即切，所以基本上你唔同時間去都食到唔同既野，賴生同屈小姐食緊既時候，已經多左幾種魚賣，真係好想食晒咁多款!!另外，呢個檔口都有提供海膽刺身比人食，不過就唔係即開既，係一早開定左，所以價錢比較相宜，當日就賣緊$450 Yen 一隻，可以自己揀食邊隻，等佢拎比你，賴生同屈小姐都有揀到1隻食，當然除左海膽仲叫左好多野食喇!!1) 醃三文魚串: 3⭐️呢度既魚生串經過左醃製既過程，其實就冇即食咁新鮮，而且醃過之後，魚味消失左，加上食之前落左檸檬汁，更加食唔到原本既三文魚味，唯一食到既係魚肉既質感，尚算軟滑!! 2) 醃吞拿魚串:3.5⭐️其實就同醃三文魚差唔多，都係食唔出魚味，不過係日本既吞拿魚就好好多，佢始終唔會雪過咁送去香港，肉質唔會硬，都係軟滑既，黎到日本梗係要食多少少，補番係香港食唔到既，呢串就可以試一試既!呢度就係我地叫既新鮮海產啦，有三文魚+三文魚腩刺身、赤貝刺身、帶子刺身、海螺刺身同1隻大生蠔!3) 海螺刺身: 4.5⭐️係上圖右下角既就係海螺刺身啦，印象中係700 Yen 一隻，新鮮識郁嫁，店員即刻幫賴生拎左入去劏! 劏完出黎，一片片好多肉嫁!! 每片肉都超有咬口，超級爽，好似咬緊雞軟骨咁，但佢係一片片，而且帶海水既鮮味，呢個海螺刺身口感真係滿分!! 至於味道呢，賴生同屈小姐覺得都係赤貝鮮甜D4) 大生蠔: 4⭐️隻生蠔係成隻手掌咁大隻，海水味超濃，但蠔味就冇乜，肉質軟滑可惜唔creamy，蠔肉唔算係太肥美，但又唔係冇肉既，800 Yen 一隻算做合格啦!5) 海膽刺身(非即開) : 4.5⭐️雖然唔係新鮮即開，但味道好正，唔會有腥味，海膽味濃，每隻份量大約2湯匙，連平時唔太好海膽既屈小姐都爭住食! $450 Yen 好抵! 黎到日本一定要最少食1隻! 唔係就晒左張機票!6) 三文魚+三文魚腩刺身 : 爆5⭐️2隻刺身拼埋先講緊$400 Yen咋! 夾夾埋埋有成10件超級抵食，仲要件件都厚切嫁，抵香港好多! 雖則話日本人唔會食三文魚，因為多蟲同cheap，咁就益左我地2個三文魚怪! 三文魚刺身肥美，魚味濃郁，肉質軟滑，而三文魚腩更加肥美，魚既油脂係口入面融化，食完好想再食多盒，不得了!7) 帶子刺身: 4⭐️其實都新鮮既帶子係好鮮甜既，好好味，但係呢佢切得太薄冇左爽口既口感呢! 如果佢厚切由6塊變番做3-4塊就好啦!! 口感分都會拎埋!8) 赤貝刺身:爆5⭐️又係新鮮識郁既赤貝黎! 收到ORDER即刻拎入去劏，新鮮程度爆晒分! 師傳將赤貝起片，肉位就爽甜，而近住舌位果D呢就有著海螺刺身既爽口同咬口，超正! 一隻赤貝有晒2種口感，係新鮮既先做得到!! 真係一定要食番粒，而且價錢唔貴呀! 真心推薦!總結:老實講，建議都係食番新鮮既魚生更佳，因為魚味更好，風味更不同! 呢度既醃魚生食黎食去都只係食到果隻醃料味，同埋食到唔同魚肉既質感! 如果要食到唔同既魚味，都係食番魚生/ 炙燒好! 恕我地膚淺，真係要推薦一下三文魚刺身，仲有就係新鮮既赤貝刺身!#醃過既魚生唔太岩我地口味#醃魚生串平就平但唔太推介#即食海鮮真係好新鮮#即劏即食好正呢#旅行就是要不斷食食食#環境係街市魚檔咁囉#一地都濕#但妳都願意陪我食#謝謝妳暫起收起潔癖症…查看更多

宇治既行程都到左尾聲，賴生同屈小姐向住JR宇治站進發準備番京都，行到差唔多到JR站既時候，又見番今日較早時見過既中村藤吉本店，屈小姐就同賴生講：要Apple to Apple先至可以做真正既比較（分明就係屈小姐想食多杯先走），又好有道理喎！大家記得小心D過馬路呀，唔好掛住影相/趕住入去食比車撞親，條馬路都繁忙嫁！過完馬路之後，賴生就帶住屈小姐入左中村藤吉既本店啦，又係一間勁大既舖頭，一直行會見到庭園，同時會見到好多人坐係度等緊入座，再向前行就係堂食部，門口已經棟左個牌寫住等候時間120分鐘起，而旁邊counter 個小姐就忙於不停叫人名入座⋯不過叫極無人應，睇黎多數行開左/已經走左當一見到120分鐘個牌同人龍，賴生同屈小姐迅速番番去門口轉右既手信區睇睇有D咩特別野賣，同平等院店一樣，多數係茶葉類，都有少量抹茶製品，仲有一個大雪櫃！入面放滿晒屈小姐今次既目標 - 抹茶杯裝雪糕而賴生趁住屈小姐排隊比錢既時候，等緊個男職員準備沖製中村藤吉期間限定既冷泡綠茶，就正正係屈小姐埋完單後，男職員新鮮沖好，茶味濃郁，甘味重，而且因爲冷泡既關係，透心涼，賴生梗係冇自私飲啦，拎多杯比屈小姐解渴！其實賴生有衝動想買，不過綠茶始終係寒涼野，無謂買番去得自己飲，屈小姐冇得飲，太太太殘忍啦深綠色既雪糕杯，加上大大個十字標誌，就係中村藤吉既抹茶雪糕杯啦，唔知深綠色係咪代表佢好濃呢 由於店內係禁止飲食既，我地即刻移師到外面享受呢杯抹茶雪糕啦1）抹茶雪糕杯：4.5⭐️果然係本次調查入面既冠軍，即使同樣既雪糕比拼，依然都係大比數勝出佢既抹茶真係不容忽視嫁抹茶力：5⭐️入口啖啖超濃抹茶味，而牛奶既甜味混入抹茶味中，令雪糕有恰當既甜味回甘力：5⭐️回甘力真係中村藤吉既強項，佢回甘最少有3秒係吞完之後回彈幼滑度：4⭐️可能雪櫃太高勁既關係，初初食會硬少少，帶些微冰粒，不過食左幾啖之後就開始smooth!配料：3⭐️雪糕杯既缺陷就係除左雪糕之外就冇其他配料，但你可以細心D品嚐䓢中既抹茶滋味CP值：5⭐️300Yen可以食到咁濃咁有層次既抹茶雪糕，仲要係名店中村藤吉，值了總括黎講，食左5間抹茶名店既我地，一致認為中村藤吉既抹茶層次感最豐厚，除左濃濃既抹茶味之外，當中仲隱藏左微妙既牛奶甜味，最後仲有強而有力既回甘，一定要試大推！#為左抹茶雪糕可以去到幾盡#黑洞甜品胃#抹茶風完不了#名正言順既冠軍#有個願意陪你癲既旅伴實在難得#仲要係你女朋友先至如此珍貴…查看更多

黎到宇治，有好多好多抹茶名店林立，其中一間就係伊藤久右衛門，賴生同屈小姐每次經過便利店同汽水機都見到好多唔同款既支裝綠茶，伊藤久右衛門就佔左好多支，而賴生同屈小姐都飲過佢既出品，而佢既綠茶又真係幾好飲，回甘勁! 唔知佢既抹茶雪糕出品又如何呢? 由宇治平等院商店街行過宇治橋，再一路跟住指示牌上斜長征十分鐘，終於黎到伊藤久右衛門位於宇治既總店啦!! 幾經辛苦長途跋涉終於到達，總店真係好大間呀!! 入到去右手邊就係堂食區，要拎飛排隊入，又係要等成個鐘以上先入到，賴生同屈小姐都好決斷地放棄，轉戰左手邊既手信區!! 手信區有好多唔同種類既抹茶產品賣，有曲奇、朱古力蛋糕、糖、蛋卷，茶葉同茶粉，應有盡有，賴生同屈小姐都係度掃左好多戰利品番去!! 而且仲有免稅添 而位於手信區有個大雪櫃，入面裝左一個個抹茶雪糕杯同甜品，賴生當然即時拎左D比錢同屈小姐分享啦!不過雪糕同甜品就冇得免稅啦，因為係即時食用既食品!!1) 抹茶慕絲杯 : 3⭐️賴生同屈小姐帶住滿心既期望攀橋涉水黎到伊藤久右衛門，係個大雪櫃拎走一杯每日限定數量發售既抹茶慕絲杯，心諗一定冇死就咁去比錢，而貼心既店員見我地2個人食都比左2隻匙羹我地食!!用典型既甜品膠杯裝住，一層慕絲一層抹茶粉，逐層逐層鋪起，似乎都好有心機，應該係好食既甜品黎，結果一食落去係: 疑惑既味道，只能用滑黎形容!抹茶力 : 3⭐️唔係甜又唔係冇抹茶味，其實一食就知道係抹茶既，但就純粹知道係抹茶囉回甘力:1⭐️點解話食到係抹茶呢? 因為淨係食到茶味，一D回甘都冇，唔知去左邊，只能靠抹茶粉撐場 幼滑度: 5⭐️慕絲就一定滑既，比雪糕更幼滑添!配料: 3⭐️就只有抹茶粉同慕絲，冇乜特別既配料! Fair's FairCP值:2⭐️由於回甘力欠奉，CP值亦相對地大大被打折扣2) 抹茶雪糕杯:3⭐️由於抹茶慕絲杯令我地知道左伊藤久右衛門既抹茶未必同預期既抹茶掛勾，所以我地都抱住挑戰既心態去試，結果一樣係同黑人問號既味道係一樣 : 疑惑.....抹茶力:3⭐️同慕絲一樣，入口食得出係抹茶黎既....回甘力:1⭐️不過回甘力同樣係0，抹茶味由入口到吞都係同樣既抹茶味，毫無層次變化 幼滑度: 4⭐️好彩雪糕都尚算滑，冇乜冰粒，係雪硬左DD!配料: 2.5⭐️得雪糕囉~~冇驚喜CP值:2.5⭐️回甘力都係欠奉嫁喇，不過比慕絲杯平少少既總結估唔到伊藤久右衛門既樽裝綠茶做得咁好，但佢既抹茶甜品係冇回甘既，賴生同屈小姐都好慶幸自己冇排到堂食，好決斷咁買左D甜品食就算! 經過今次調查，確認佢係抹茶名店入面既包尾。#名氣大不等於好味#抹茶調查篇#包尾#好彩冇排堂食#繼續下個調查gogogo!!…查看更多

一講到中村藤吉，大家都應該耳熟能詳，趨之若鶩，黎到抹茶之鄉 - 宇治，賴生同屈小姐點可能唔探訪佢呢？所以我地黎到中村藤吉既平等院店。係正平等院商店街既正中間，就係中村藤吉既位置，有堂食，外賣同手信店，堂食有芭菲，抹茶麵同抹茶甜湯等等既抹茶食品賣，但要食就要比D耐性同心機等啦，通常都要排1個鐘起先有得食。而手信店就主打茶葉，同有少量既抹茶茶凍賣，入到去仲可以試下中村藤吉既抹茶添，店員會為你奉上一杯抹茶，茶味香濃，回甘重，不愧為中村藤吉如果你地冇時間等，又想試佢地既抹茶甜品，就乖乖地係手信店側面個窗口排隊，大約5分鐘就輪到你嫁啦除此之外，要入堂食部，就必需經過中村藤吉中庭既花園，係一個和式既小庭園，帶幾分優雅，不失為一個拍照既好地方，但就亦因為係主要通道，所以長期都超多人出出入入，要影靚相，就真係要比D耐性等一個岩既Timing去按下快門! 而你再行入少少就會見到一條樓梯仔，行上去就會堂食部外面既一個河景庭園，環境優美，感覺好恬靜!! 望住呢個景食都真係唔錯! 有一點好重要，大家一定要記得，當你進入左中村滕吉個庭園門口開始，就係禁止飲食既地帶，大家千祈唔好係外賣部買完雪糕走入去食呀! 參觀完內庭之後，我地入左去堂食部望左一望，佢寫住要等120分鐘，實在太耐啦，所以屈小姐就第一時間一支箭咁衝左去外賣部排隊買雪糕食喇!!1) 紅豆白玉抹茶雪糕 : 5⭐️抹茶力 : 5⭐️先講講佢既抹茶味，佢入口有牛奶既香味同甜味，大約1秒左右，抹茶味就隨住牛奶既甜味侵襲味蕾，濃度達至4-5級抹茶雪糕既程度，就抹茶力黎講可以話係滿意程度! 唔會甜到冇左茶味而又突出到抹茶既味道回甘力:5⭐️單就回甘而言， 中村藤吉既表現係最好既!!當你吞左雪糕入喉嚨之後，抹茶既回甘就係喉嚨湧上舌頭達4-5秒之久，回甘既力道之強勁，不容忽視!幼滑度:5⭐️雪糕冇冰粒，柔軟細滑，唔易溶配料: 5⭐️配有紅豆，白玉同雪糕筒，3樣既整體表現都好好!!!紅豆冇加糖去整，只有本來紅豆既甜味同豆味，紅豆微糖又大粒，配合抹茶雪糕食都唔會令雪糕過甜而遮到抹茶嫁!至於白玉就可以一啖一粒，無粗粒，煙煙韧韧，表現令人滿意而個雪糕筒就都脆同有蛋香，但為左可以食更多既雪糕我地放棄左!CP值:4.5⭐️味道口感好出色既一杯雪糕，份量亦足料，索價680Yen 一杯，即係大約港幣$50蚊，比起係香港食算平好多lu~~!! 雖然有點少貴，都CP值真心幾高!!最後要提既係佢有比到支匙羹我地，唔駛我地用口直接食，方便衛生又貼心!!!所以呢個本屆冠軍，中村藤吉當之無愧!#抹茶雪糕調查篇#都係軟雪糕回甘勁抹茶味出#見到抹茶雪糕就一定要食#唔可以SKIP既一個行程#SKIP左係死罪#賴生成日縱屈小姐食雪糕#旅行就是要放縱…查看更多

眾所周知，可樂餅係日本一樣街知巷聞既美食，但黎到宇治呢度，當然會因當地文化而加左一D地道色彩。冇錯，就係加入宇治名物 - 抹茶原本呢間餐廳冇係賴生編既行程入面，不過因為旅行總會跌跌撞撞，搵下路又行錯路而遇到一D美好既驚喜⋯又剛巧遇著我地肚餓既時間，而貼心既屈小姐又知道賴生其實都鍾意食炸野......唔好炸野既屈小姐都陪左賴生去試一試 入到舖頭右手邊你會見到一大個肉櫃，入面有好多種唔同種既牛肉仲埋唔同部位，和牛、神戶牛、國產牛、牛扒、牛肩、牛肉同碎牛都有，多不勝數，如果下次賴生同屈小姐黎係住民宿既話，或者賴生會買D牛肉，再係其他地方買D日本菜番去同屈小姐整番個溫馨二人shabu shabu都幾正!而左手邊你會見到一個炸爐同埋一櫃可樂餅，有用唔同肉做既、豚肉，牛肉，和牛都有，而今次我地睇中既係抹茶可樂餅，交低$130 Yen就會即炸比你食嫁喇，熱辣辣噴煙嫁，食既時候小心辣親。1) 抹茶可樂餅: 4.5⭐️甜甜地既抹茶加入牛肉做成既可樂餅，究竟會唔會係一個伏呢?? 就好似賴生同屈小姐一樣，好似將2樣唔同時空唔同世界既人溝埋一齊，結果會唔會唔好呢?? 答案其實好簡單，一定會夾既 相信店主都經過一輪既調整，先會整到而家呢個咁出色既作品，好似愛情一樣，2個人都需要時間去慢慢磨合同調整先會變得合拍不過要將2樣唔同性質既食材融合，一定要有其他幫手先可以成功。至於呢塊可樂餅，就用左北海道名物男爵薯仔去整，食落口感極其幼滑，老闆好有心思地將男爵薯仔打成薯蓉，再將加入抹茶粉既牛肉拌勻，製成可樂餅，外層再加蛋漿同麵包糠，再即炸。外皮金黃酥脆，帶脆脆粒粒口感，包住柔軟幼滑薯味濃郁既薯蓉，入面再夾住綠色既Juicy抹茶牛肉餡，真係幾好食，連唔好炸野既屈小姐都覺得ok，只係抹茶既味道就若隱若現，只帶到一點點微甜，而失去左茶既回甘!原來2個唔同世界既食材都可以合作得咁完美，相信賴生同屈小姐靠住耶和華既照顧，即使係路上跌跌撞撞，最終都能夠開花結果，令二人同為一體。可能之後賴生同屈小姐都會行錯路，兜左大圈，只要一路上拖住手行，好快就會到達目的地!!#從抹茶可樂餅體會愛情#即使跌跌撞撞亦能有美好的結果#抹茶點心名物#小心辣口#口感味道俱佳#愛情就是你相照顧互相信賴#要麻煩妳照顧啦…查看更多

賴生同屈小姐一早都知道京都既舖頭比較早收，特別係宇治，基本上係跟平等院既開放時間咁濟，但萬萬估唔到既係賴生同屈小姐都已經1點左右就到宇治，竟然本來mark左想食果間蕎麥麵名店居然收左，賴生真係個心嚇到離一離，只好怪自己事前冇做好準備功夫啦，好彩既係屈小姐成日話自己係一名超級港女，但事實佢冇一忽似港女(除左比較煩膠之外.....)，佢不但無發脾氣，佢仲肯陪賴生周圍行下睇下有咩食賴生覺得有個咁好既女朋友真係少懷安慰不過行左咁耐都有d餓意，天氣又有d熱，唯有入去田中商店度食碗拉麵同餃子醫肚算啦!! 之但係入到去果陣，居然係冇客人，得賴生同屈小姐2個，係食食下先有多2枱客人!! 我地初初懷疑自己入左中伏店添，所以個expectation就山頂跌到落谷底，亦可能因為咁樣d野食好似好食左飲一飲杯冰水，降一降溫順便解渴後，賴生同屈小姐面對住呢3張menu，對拉麵有少少疑惑，因為屈小姐好少食拉麵，既然係咁我地只好係湯底上選擇個我地鍾意既，醬油湯底，再加地道抹茶之鄉既抹茶拉麵，另一款就揀左抹茶冷麵，最後再揀埋我地2個都鍾意食既煎餃子!! 抱住覺得食物麻麻地既心態開始等待野食既來臨!1) 玉孑叉燒醬油抹茶拉麵: 3⭐️屈小姐話想食d熱野，所以叫左碗拉麵食，但賴生食完個冷麵一啖之後就同屈小姐成碗交換左。點解? 因為冷麵好食好多囉呢碗拉麵個湯底普普通通唔夠濃郁而抹茶拉麵又唔覺得有抹茶味，麵質經湯浸住反而比冇左冷麵果條爽身彈牙既感覺，會比較淋左少少，叉燒又冇乜特別話好唔好食，成碗麵最好食係度玉子，溏心又蛋味濃! 由於味道無驚喜，無特別，只能講係餵飽肚之物，所以呢碗麵只能夠比合格既分數2) 抹茶冷麵(大) : 4.5⭐️估唔到呢個冷麵係咁好食嫁!! d抹茶冷麵好彈牙，係勁彈牙!! 配上帶酸既冷麵汁，好開胃，令人食完一注又一注，麵既份量係拉麵既1.5倍，仲有蛋絲同蔥，叉燒做配菜，超飽!!千祈唔好遺漏左側面果少少既芥末醬，撈埋落去食，只會更加美味，芥末既攻鼻同辣味同帶酸既冷麵汁好配合，酸酸辣辣好惹味，間唔中仲會攻鼻，好刺激嫁，食到尾仲會覺得佢既芥末醬比得太少添!!不過，抹茶冷麵同樣都係冇乜抹茶味，所以未能取得滿分既分數!3) 煎抹茶餃子 : 4⭐️其實呢隻餃子只係搓皮既時候加入左抹茶粉嫁咋，同普通餃子冇分別咁濟，一樣皮薄外脆多汁，但特別既係佢配左隻抹茶鹽比你點，將成件事抹茶化左，不過抹茶既味道都係唔係太覺有出現到既!! 但煎餃子既味道真心唔錯，所以值得拎4⭐️最估唔到係，呢度雖然冇乜人，但都有個冷麵帶比我地驚喜，可能係我地expectation過低令佢美味左，但anyway，佢的確令我地果一刻得到快樂，同埋填飽左我地既肚令我地可以開展漫長既調查行動!!#通情達理#下個旅行要做得更全面#有個體貼既女朋友賴生實在太幸運啦#調查行動start!…查看更多

聚會完左之後，賴生就同屈小姐出發黎到抹茶之鄉 - 宇治，開展我地詳細既調查，係坐JR到埗之後，見到中村藤吉一直向前行，我地見到一間舖不停咁燒緊一條條既鰻魚，香氣四溢，我地4條小腿不其然就行左埋去呢間舖就係啦！門口有放左個Display 櫃放滿鰻魚，仲有師傳係側邊不停燒緊鰻魚！師傳不停係度燒緊鰻魚，難怪咁香啦，一邊燒一邊上汁，燒好之後磅重，上碟分價錢賣燒好之後，會放入呢邊櫃，入面有幾款既鰻魚賣既，有原條既，分幾多切既鰻魚飯同鰻魚壽司，咁大家可以用眼睇邊條岩大家既食，價錢就因重量去定既，賴生揀左條肥肥地既比屈小姐食，索價$2300 yen，揀岩就指比老闆娘睇，佢就會幫你切好上埋汁入盒比你食當然，為左將味道最佳化，我地選擇左企埋一邊打開個盒即食1）原條燒鰻魚：5⭐️好大條鰻魚呀，因為即燒所以做到面皮有少少脆，而且拎上手係有溫度嫁，鰻魚亦都肥美，肉質彈牙，吸滿醬汁既味道，濃郁美味賴生知道屈小姐好鍾意食鰻魚，所以讓左比佢食多D所以屈小姐都專登買番盒日本西瓜比賴生食補數#鰻魚狂熱#一條條好吸引#即燒鰻魚最正#口味逐漸被同化#寵愛她就是要好好餵養她…查看更多

係宇治番黎之後，賴生同屈小姐趕去食出名既胡蘆親子丼啦，點知開盡Turbo都係趕唔切，達陣時間係1930，佢已經執緊檔啦，賴生只好帶住屈小姐沿路行番去河原町食dinner啦! 之不過呢，京都係入左夜之後呢，小路都比較黑，街燈同人都唔算好多，令到屈小姐有d驚，拖住賴生既時候，越拖越實，賴生都好享受呢種保護屈小姐既感覺! 其實賴生係度一定會保護屈小姐既安全呢!!最後，為左令屈小姐冇咁驚，賴生迅速帶番屈小姐行番去大路前往河原町。突然係遠方大約50米既位置，有一處特別明亮，原來係較早前屈小姐係大阪刪減左既行程之一 : 專賣吉列牛既<<京都勝牛>>! 屈小姐話既然有d肚餓，又咁岩黎到京都都撞到，冇理由唔入去試一試既，賴生表示同意入去同個女待應講左2位之後，佢就迅速安排我地入座，有Bar檯同普通4人座，由於賴生同屈小姐拎住一袋2袋手信，所以揀左普通4人座，而席間有2位外國人坐左係Bar檯用膳，同師傳有講有笑，師傳不停地向果2位介紹同教佢地食法，好正呢! 仲可以睇住師傳準備!冇得坐Bar檯既我地，只好默默自己睇Menu揀野食，睇完一輪，我地對吉列黑毛和牛同吉列吞拿魚有興趣，不過屈小姐問賴生一陣食唔食串燒，食梗係食啦，於是我地就決定2選11）吉列黑毛和牛京御膳定食：4⭐️呢一個Set有麵鼓湯，白飯，吉列牛同椰菜絲！本身白飯係任裝既，如果想任食椰菜絲加多$50 yen就得！不過賴生同屈小姐只係叫左1個set，所以就冇裝白飯/加$50任食椰菜絲。而醬汁方面，有日本豉油配wasibi、黑椒鹽、店舖秘制醬汁，咖哩汁同一碗日本蛋比你點吉列牛食有驚喜既係，吉列牛既吉列皮好薄，做得超脆，而入面既牛肉仲呈粉紅色外脆內嫩，不過呢間冇塊石板比你自己再煎一煎D牛肉，個熟度就要你一開始落order講定至於點咩好食呢？1）鹽：5⭐️點鹽除左加重黑毛和牛既牛味之外，更加可以完整保留外脆內嫩既口感，係食吉列牛既不二之選2）蛋汁：4.5⭐️除左鹽，點蛋汁都係一個唔錯既選擇，點完黑毛和牛既牛味雖則冇加鹽咁重，但都有所提昇，而且點蛋汁令黑毛和牛更滑，不過就會令塊吉列牛冇咁脆3) Wasibi 豉油：4⭐️Wasibi都係一種提昇牛肉味既醬料黎嫁！加左落豉油用黎點火鍋肥牛就正啦！不過吉列牛就差咁D，唔係咁逼到牛肉味出黎，可能牛肉太厚啦！4）秘制醬汁：4⭐️帶輕微酸味，可以中和吉列牛油炸過既油膩感，不過酸味會有少少遮到牛肉味5）咖哩汁：3.5⭐️咖哩汁點吉列牛就有點太濃，遮左牛肉味不特止，仲會影響本身外脆既口感，對於喜好牛肉味既我地不太適合而套餐既椰菜絲用黎點秘制醬汁都唔錯，酸酸地都幾夾！麵鼓湯就普普通通冇乜特別但白飯就好有學問啦！究竟要點食呢？其實好睇個人喜好，有人鍾意當吉列牛肉飯食，一啖牛一啖飯；有人鍾意落咖哩汁變咖哩飯食；而賴生同屈小姐就撈蛋汁變蛋撈飯，香滑帶濃濃蛋味！相信3種食法都各有特色，都唔錯既菠菜漬呢？加$100 Yen就有，賴生同屈小姐志在有D菜食下先叫，酸酸地囉，無乜特別評價，主角係吉列牛麻！結論：如果冇食過吉列牛既，其實可以試一次，因為口感幾特別，味道都可以既！但係值唔值得爲吉列牛牽腸掛肚，夢牽夢繫呢？又未至於喎，因為靚牛肉用吉列既方式處理會浪費左呢！吉列既方式去整，牛肉味冇咁重係食完之後，賴生就帶住屈小姐繼續往下一站河原町出發食串燒啦#別怕有我在#我會好好保護妳#乜又係你呀牛生？#食到吉列牛lu#外脆內嫩#但沒有預期般震撼…查看更多

黎到旅程既第4日，賴生同屈小姐今日要早起身準備去京都既聚會所聚會，為左可以比屈小姐訓耐D訓飽D，賴生又早D起身梳妝化身外賣仔，今日唔同既就係：賴生化身做一個貌似上班族，著住裇衫西褲打晒呔既(靚仔)外賣仔今次既送餐係黎自四洞院食堂 ，一間由日本母親們主理既和食食堂，假如你有睇開日劇/日本動畫，你會發現好多時早晨既時候，好多媽媽都會好早起左身爲一家人準備早飯，有煎魚、蛋、包、麵豉湯，納豆同白飯等等。假如你想嘗試同感受下黎自日本媽媽們既愛心，呢間早餐就岩晒你啦呢一間就係啦!! (賴生朝早起身實在係太眼訓啦!! 唔記得影相，夜晚番黎補番啦)，係由日本既媽媽們主理既一間食店，有堂食同外賣，入面所有野都1碟碟同標晒價錢，有煎魚、刺身、菜類、湯類，烏冬同飯等等，你拎左個餐盆先，再排隊跟住D人一路向前行一路拎同揀自己想食既，到最後就到收銀台叫埋主食類，例如:豬肉湯，白飯，烏冬或者雜菌飯等等，唔叫主食類都可以既，之後就可以埋位食/比外賣膠盒你自己整完拎走。屈小姐既 Day 4 愛心早餐 : 4⭐️難得黎到日本，當然要學下日本人朝早食魚食飯做早餐啦，咁岩有間媽媽食堂係附近，一定要試下啦!  正當賴生開門番黎打算叫屈小姐起身既時候，屈小姐個鼻似乎已經聞到飯香，自動彈左起身準備食野啦 (好明顯係屈小姐知聚會好重要，唔可以遲到，所以早左起身啦)1) 煎三文魚扒 (@350 Yen): 3.5⭐️, 微暖唔夠熱，不過煎三文魚本身都已經夠晒好味，魚皮都煎脆左，三文魚味都出，唔錯既!!2) 冷豆腐(@100 Yen) : 3⭐️，滑，但豆味又係冇想像中咁濃，中上水平3) 菠菜漬(@100 Yen ): 4⭐️，酸酸地既菠菜漬雖然凍凍地，但好開胃，同埋有菜食! Yeah!4) 魚仔海帶漬(@100 Yen): 4⭐️，魚仔唔咸，脆脆地! Good! 最好係有海帶漬食，酸酸地好味又夠晒健康5) 期間限定雜菌飯(@190 Yen) :4 ⭐️,  日本米煮飯係好食既，仲要配埋日本菇一齊煮，菇味滲落飯中，一流!賴生既Day 4愛心早餐  : 4⭐️至於賴生呢隻大食怪，梗係要多肉少菜版既便當啦(其實都係好健康嫁喇....hahaha)1) 三文魚刺身:4.5⭐️，其實係日本食刺身好難輸，三文魚刺身都魚脂豐富，魚味濃正!!2) 煎油甘魚:4⭐️， 正! 成舊油甘魚，魚脂好豐富呀!!不過都係凍左少少3) 青瓜漬 : 4⭐️, 爽脆有口感! 味道都唔會過火，酸酸地夠開胃呢間舖固然可以比你一嚐日本媽媽們既手藝同食到傳統日本人既家食早餐，不過煎魚既保溫力尚待改善，假如改善埋呢樣，的確可以抽一日早餐去試下呢個日本家庭式既早餐。p.s. 點解日本人食早餐會食飯呢?? 原因好簡單: 因為會飽d 就係因為呢2份早餐，賴生同屈小姐先有能量支撐到12點幾去完聚會，所以幾時都話早餐是很重要的!!#愛心早餐速遞#最幸福就是有人疼#有野食自然會醒系列#果然係熱食堂食最好食#鍾意食野既女朋友#早餐是很重要的#第一次的國外聚會…查看更多

食完蛋絲鰻魚飯已經好滿足，為左可以減下肥，我地決定慢慢行番酒店，就係呢個時候，我地岩岩一出舖轉個彎就見到一條人龍排晒隊買野食，基於好奇，屈小姐同賴生都走埋去探個頭八掛下人地排咩，點知比我地發現左係一串串好細粒既燒丸子！係成個旅程都未見過燒丸子呢種特色食品，加上賴生是位丸子迷，再有人龍既迷惑，賴生同屈小姐都跟住左條人龍排隊 (又話減下肥?!) ，而且重點係排隊既係日本人，賴生同屈小姐心諗實無死啦！與此同時，賴生都想爲大家報導一下店舖既盛況同樣貌，正打算舉起手機影相，就已經即時被警告No photo! 原來店舖已經貼晒告示要求大家唔好影相，入鄉隨俗，賴生都係決定做個乖寶寶只要你用心等待，好快就會輪到你嫁啦，不過店舖係冇得坐既，全部係外賣拎走，佢會問定你要幾多同收埋錢，等D丸子一燒好，就會熱辣辣地送到你手上送到你手上既時候，佢有好密實既防漏保護，佢用雞皮紙包住個膠袋再包住D小丸子連汁連粉，唔怕拎到好遠食，當然爲左品嚐佢既真正美味，第一時間食係最好既，於是，賴生就同屈小姐停埋一邊享用啦即燒麥芽糖黃豆粉小丸子：3⭐️每串$110Yen，賴生同屈小姐買左1人1串，整串小丸子被麥芽糖包住，食既時候再點D黃豆粉就食得味道方面：麥芽糖唔算太甜，配上黃豆粉，食得出有豆味同麥芽糖既甜，不過呢間既黃豆粉豆味較為保守，唔太濃，比起其他地方冇咁好食至於小丸子，內裡尚算煙韌，經炭火燒過後，帶炭香味道，只係比坊間見到既丸子較為細粒，直徑大約同香港既5毫子咁上下大細1粒，每串有4粒不過呢串即燒既小丸子呢，唔太適合賴生同屈小姐既口味，主要原因有係：小丸子經炭火燒過之後，外層唔係外脆，而係燒乾左變外硬，而且吸得太多炭燒既味道，over左，食落好似有D燶味食完之後，我地係覺得有D中伏，唔知係老細失手，定係我地唔識欣賞，我地食完之後，回望果條依舊咁長人龍，都係諗唔透#一有人排隊就哄埋去#旅行中對食物既抵抗力係0#理智同樣是0#旅行中中伏亦是個美好回憶#專屬於我倆既中伏回憶#報導完畢…查看更多

話說屈小姐係旅行出發前，係網上搵到一間超震撼既蛋絲鰻魚飯 - 《かね正》，搞到賴生都好想食，但呢間野一定要事前預約先有得食，賴生事前用盡所有辦法去預約，例如：Send Email比酒店拜託酒店幫我地預約/出動日本朋友預約，都失敗左。只好當到埗既時候，再一次拜託酒店櫃台職員幫我地預約，點知，佢話Full左:(係3管齊下都無辦法成功既時候，唯有用番最傳統既方法，Walk in碰碰運氣 所以係嵐山番黎之後，賴生第一時間帶住屈小姐衝去《かね正》搏下有冇得食!當你見到壹錢洋食之後，繼續行入去，見到間郵局，望入側面條窄巷就係《かね正》既所在地啦! 賴生拖住屈小姐入去果陣，咁岩有2女1男既香港人行番出黎，賴生聽到佢地話滿晒啦，冇得食要食其他啦....果然，去到門口已經見到佢貼左個告示話預約滿左啦，賴生見到屈小姐好想食到而失望既樣子，唯有心底裡祈求耶和華幫助，膽粗粗都厚住面皮+唔識講日文都入去問一問，好好彩，耶和華再一次回應我地既祈求，個老師傳用英文答賴生話FULL，但叫左個女侍應出黎跟一跟我地，個女侍應話8:30可以招呼到我地呀!! 但係一定要準時黎，屈小姐同賴生當堂勁勁勁開心同興奮! 見仲有成個鐘鬆D就走左去茶寮都路里食個甜品先再番黎食作為好既客人，守時梗係好重要啦，賴生帶住屈小姐係8點25分已經到達番到去啦。入到去既時候，發現居然一個客人都無，只係得賴生同屈小姐，我地仲諗住可能D人預約8點半或者9點，準時先會出現，但最後只係黎多左一位日本客人，證明佢地係專登SERVE我地嫁...好好呀 2個受耶和華祝福同照顧既小朋友!實在太感恩啦由於無人既關係，賴生同屈小姐任坐，而入面有普通卡位同席前既吧枱位，為左進一步觀察烹調既過程，賴生同屈小姐梗係揀左席前用膳啦!!因為佢用開放式廚房，成個過程都可以觀察到!!Yeah 係賴生同屈小姐坐低之後，女侍應為我地奉上一杯熱茶同Menu，等我地可以開始我地既會議!!賴生同屈小姐飲左啖茶，接過MENU後，發現佢有英文既!! 相討完一輪後，結果好快就出左黎，當然係屈小姐一早睇中左個錦系丼(蛋絲鰻魚飯)，賴生揀既海苔鰻魚飯同埋大家一齊都想食既鰻魚蛋卷!!係店內有2位師傅，後生D果位師傅呢，就主要負責準備蛋，飯，前菜，湯等等，而老師傅就專職燒饅魚!!首先師傅為我地準備既係鰻魚蛋卷，你睇條蛋卷幾厚 佢切落去既時候仲會彈下彈下嫁!之後老師傅就幫我地準備炭燒鰻魚，每人半條，鍾意食既話，其實係有全條叫嫁，睇住D鰻魚由白色燒到D魚肉紋路漸漸變到好明顯，再變黃黃地色，跟住慢慢上鰻魚汁，過程中不停飄來陣陣香氣，令人不禁垂涎欲滴，好想快D食到呀!!當D鰻魚差唔多得既時候，小師傅就裝飯入木盆度，加入秘製醬汁拌好個飯，將佢由白飯變成醬汁拌飯，裝入碗中!!然後，小師傅再將煎好既蛋卷成條拎出黎切絲，每條都好幼細同工整，刀功超強呢，真係一絲絲嫁!!另外，店內仲提供3種調味粉比你食鰻魚，有一味，黑七味同山椒粉，頭2隻既味道太搶FOCUS，鰻魚既風味被遮擋下去，相反，加入山椒粉既能提升鰻魚本身既魚味，又帶小小辣味同攻鼻，建議加山椒粉食。而係上主食之前，小師傅仲會準備埋前菜 - 漬物比大家食，有茄子漬同蘿蔔漬，味道係酸酸甜甜，茄子漬又幾好食喎!屈小姐之選1) 錦系丼 (蛋絲鰻魚飯) : 4.5⭐️經過左15分鐘之後，錦系丼終於完成啦!!好感動!!師傳仲會比埋支秘製醬油我地自己加，加到岩心水為止，個人就建議邊食邊加，味道容易調整，同埋加左香D，鰻魚汁既味道又濃D!!細味之下，錦系丼的確係好出色既一碗鰻魚飯，面頭既蛋絲除左蛋味濃郁，充滿蛋香之外，仲可以中和油脂滿溢既鰻魚既油膩感，更加帶出鰻魚既美味!! 拌埋個秘制醬汁飯一齊食，可謂天作之合!!不過呢度個炭燒鰻魚呢，就欠缺左炭香味，魚皮唔係脆口，鰻魚亦唔算肥美。單論鰻魚層面黎講，呢度既鰻魚唔算係最上乘，但加入蛋絲之後整體味道得以提升，的確加分甚多，值得一試!!賴先生之選2) 海苔鰻魚飯: 4⭐️至於海苔鰻魚飯，個老師傅將燒好既鰻魚鋪上飯面後，就拎一塊海苔出黎手撕撕爛佢鋪上面，情況就冇錦系丼咁震憾同澎湃。海苔係蓋上飯蓋之後就變淋左，得番D香氣，比起錦系丼確實係冇咁完美~~所以少半⭐️3) 海帶麵豉湯:3.5⭐️每個餐都會跟一碗湯，材料都幾多，有滑滑既豆腐粒，海帶同1粒小丸子，粒小丸子幾得意幾特別嫁!! 正正常常既麵豉湯啦，始終麵豉湯唔係重點麻!屈小姐&賴先生共選4) 鰻魚蛋卷: 爆5⭐️呢個鰻魚蛋卷係小師傅一手一腳既成品，係超級超級超級好食，蛋味濃郁，蛋香滿滿，而且如你所見，你係見到一層卷一層，卷好多層嫁，口感勁正! 有層次感之餘D蛋又軟綿~~~好好味呀!!中間仲夾住左舊鰻魚，一客4件，一人2件 好滿足! 食既時候記得加D師傅秘製既醬油，加係碟面再用蛋卷慢慢索入去，醬油既味道，令鰻魚同蛋卷更加美味，鰻魚既味道加濃郁，而蛋味同時被提升至另一層次!!總括黎講，呢間鰻魚飯其實幾唔錯，不過側重左係蛋類既料理去提昇鰻魚既美味!! 但呢種美味又係另一種體驗，好值得去預約試一試!!#要感謝耶和華照顧#好好彩既我地#鰻魚殺手#蛋迷#一次過食晒2種滋味#豁出去漫遊不通知親友#愛上炭燒肥美鰻魚…查看更多

黎到京都，賴生當然會帶住抹茶雪糕怪屈小姐不停食，係旅程既第一日晚，當然要帶佢黎到京都既鬧市 - 河原町同祇園行下，順便造訪一下係祇園既茶寮都路里本店啦相信祇園辻利大家一D都唔陌生，係一間馳名既日本抹茶老店，而座落係佢上層既，就係採用祇園辻利抹茶出品既甜品舖，亦即係今次既主角：茶寮都路里佔地2層，目測每層可以Serve超過50人，位於祇園四條地下鐵站大約5分鐘既步行距離，即使賴生同屈小姐尚未行到，已經係遠距離見到人龍到達祇園辻利門口之後，係側面有條樓梯行上去就係嫁啦，想食好西當然要先付出d腳骨力啦而你經過樓下既時候，已經有2個Display櫃Show左部份供應既甜品出黎 有好多種類，好吸引人呢上到去2樓同個店員姐姐講左人數之後，佢就會安排你入座，睇黎今晚人數都幾爆，賴生同屈小姐要上3樓先有得食呢入到去，你會發現佢用傳統既和式設計，主要以木爲主，都幾重京都傳統氣息嫁 雖然話分2層，但樓底都幾高，空間感夠大，不過枱與枱之間距離太近，只能同時過到1.5個人，聽晒隔離講咩（不過又可以比我地近距離睇到人地食乜）當然，一坐低之後，賴生同屈小姐即時進入會議模式，一人打開一份會議既資料相討一下要挑戰既對手，經過審慎既商議之後呢⋯⋯我地最後揀左：屈小姐之選：1）栗子抹茶芭菲Deluxe (期間限定）：4.5⭐️貪心既我地當然想一次過試晒當造既栗子同店內馳名既抹茶，所以我地揀左呢隻芭菲！而店員亦會係上菜既時候，拎住張中英日三語既溫馨提示比大家，提醒大家唔好掛住影相，要快D食，因為好快會溶爲左食真D佢既味道，我地梗係選擇做乖寶寶，一影完相即食啦呢杯芭菲好多料，有抹茶cream、抹茶蛋糕，抹茶茶凍、抹茶丸子、抹茶沙冰、栗子、丸子、脆米，牛奶雪糕同抹茶醬抹茶Cream : 滑，但抹茶味平平凡凡，不算上乘之作抹茶蛋糕：甜度遮蓋了抹茶既氣息，要等到甜度過後，才有淡淡回甘抹茶沙冰：最驚喜係呢個，估唔到最濃最濃抹茶味係入面個沙冰，一食入口成口抹茶味，可以話達到5級抹茶味既理想水平，回甘力同時強勁，係整杯芭菲既靈魂所在！抹茶丸子：同好多抹茶丸子一樣，得隻色，不過煙韌度交足功課抹茶茶凍：有著蒟蒻般既彈牙度，抹茶味就一般，口感分較重栗子：可謂杯中另一主角，超甜，而且好粉，果然係當造既日本栗子抹茶醬：抹茶味既另一來源，但多D會更好白丸子：煙韌有致，交足功課牛奶雪糕：好重牛奶香同牛奶既甜味，夠幼滑，不過超易溶脆米：賦予芭菲脆脆既口感，不過有點黏牙p.s. 近底既部份加左黑糖漿，食到最尾過甜，令屈小姐都要無奈放棄(最底果幾啖)整體而言，我地比抹茶沙冰既濃度所感動，而屈小姐亦都決意展開佢既抹茶雪糕大比拼計劃，係度透露比大家知，我地揀左5位有名既選手參賽，呢間既排名係第3位賴先生之選：2）抹茶蕨餅：4.5⭐️至於聰明伶俐，體貼又美麗(?!)既屈小姐知道個芭菲差咁少少野⋯就係賴生最愛既蕨餅，所以佢一早target左要叫一份比賴生食！呢個抹茶蕨餅呢，好大粒，鋪滿晒黃豆粉，隻黃豆粉係有一陣勁濃烈既烘培味道，豆味逼晒出黎，既帶烘培香又有濃濃豆味，好正！不過就係太濃，遮晒抹茶味呢！至於抹茶蕨餅夠晒煙韌大粒，好出色，假如個抹茶味出D/無被遮擋，應該可以達到5⭐️分數有住祇園辻利抹茶之名既茶寮都路里，表現合乎預期，只係驚喜度不足，但佢位於京都既鬧市區，位置方便就腳，假如冇Plan到去宇治既朋友，的確值得一試唔講咁多啦，食完甜品，賴生同屈小姐要趕下場啦：係超好彩比我地插到位既隱世蛋絲鰻魚飯#食完甜品先食正餐#抹茶控#燃起左屈小姐既求真慾#名為調查，實則爲食#溫柔體貼女朋友系列#果然都係外帶雪糕岩口味#芭菲都係影相用…查看更多