影片
電話號碼
03-3538-3969
營業時間
今日營業
12:00 - 14:00
17:30 - 22:00
星期一
全日休息
星期二至日
12:00 - 14:00
17:30 - 22:00
以上資料只供參考, 請與餐廳確認詳情
去得日本玩，點都要食番餐壽司嘅，今次就聽表姐朋友推介，一訪銀座區近期幾紅嘅樓上壽司屋「鮨 いしやま」（Sushi Ishiyama）。網上訂座流程十分簡易，除咗要預先點餐之外，仲可以指定主廚或副廚備菜。店子原來分開咗兩間房，其中右方有窿嘅木門身後為主廚嘅區域。遲訂位嘅小肥只能進入左方副廚嘅壽司房，以木為主嘅裝潢和風味濃，而且光猛乾爽。駐守嘅上西孝佳師傅有啲怕羞，不過其實佢勁好笑容架，備製壽司時個樣最認真。其女助手亦超級細心，眼見小肥嘅電話就咁放喺餐桌上，佢即自動攞咗個電話墊黎，實在周到！因早已訂下十四件手握壽司午餐（12,000円/位），埋位只需細閲酒牌。應上西師傅推介一試純白色樽嘅「新政Sake No. 6 X Type」（3,500円）。日本清酒清爽非常，勁啱細佬口味！每位席上都擺有自用嘅餐具。等待壽司上陣時先有酸爽開胃嘅水雲前菜。伴配壽司有無限添加嘅薑薑。為方便貴客用手進食壽司，每人都有條薄薄嘅濕巾，可以邊食邊抹。平目壽司：第一件出場嘅平目壽司魚肉清潤，壽司飯嘅份量恰到好處，唯一塗上嘅山葵就重手咗少少。鰤魚壽司：第二件鰤魚壽司爽厚潤澤，鮮美可口。小肌魚壽司：銀光閃閃嘅小肌魚壽司魚肉紮實得黎味道十分鮮濃。大拖羅壽司：真係冇諗到第四件就有大拖羅食！粉嫩潤澤嘅大拖羅壽司滑到溶喺口，如果可以大件啲就更美滿啦！赤身壽司：紅潤有光澤嘅赤身壽司同樣滑溜，魚魚認真新鮮，唯一師傅嘅調味偏咸，要飲多淡清酒先可以中和返。魷魚壽司：話咁快就去到中段，第六件魷魚壽司雖則好滑，但就帶點漦。車海老壽司：紋理橙白分明嘅車海老壽司咬落極其爽嫩，完全唔乾唔嚡，弊在好咸。池魚壽司：銀邊光滑嘅池魚壽司超級爽彈，可能同師傅即場反映咗之前嗰幾件味道偏咸，依件明顯輕手咗。鰹魚壽司：小肥一向怕濃烈嘅煙燻味，意外地，第九件皮黑肉紅嘅鰹魚壽司個煙味濃得黎唔搶，魚肉超滑唔嚡，極易入口，比起香港食開嗰啲美味得多！秋刀紫菜卷：直接由師傅手中取得嘅秋刀卷層紫菜又暖又脆，節令嘅秋刀魚味濃而不俗。北寄貝壽司：轉入直路，第十一件奶白色嘅北寄貝壽司爽脆得黎好多汁！海膽魚籽壽司：橙亮耀眼嘅海膽魚籽壽司要讚嘅係一啲腥味都冇，而且爆滑，無奈其咸度實在驚人，即使海水味濃都冇理由咁咸囉，所以表妹話一定要扣分。海膽壽司：北海道馬糞海膽極級鮮甜，滑到當真唔捨得咬，可以就咁吞！由於海膽壽司咁正，所以估之前嗰件海膽魚籽壽司嘅咸係源自啲晶瑩剔透嘅魚籽。穴子壽司：小弟最怕細骨，最後一件穴子壽司結果只係快速影咗相相就轉交咗俾表妹食。卷物：是日卷物乃鮮濃嘅吞拿魚卷，一口一件話咁快就食哂三件。麵豉湯：食咗咁多飯落肚後，一碗簡單嘅麵豉湯尤其暖胃。甜品：結尾嘅蛋蛋甜品金黃亮麗，質感柔潤有彈性，微甜輕盈不膩口。銀座市中心嘅高級壽司專門店「鮨 いしやま」環境光鮮樸實衛生，師傅及服務生均友善體貼，午市十四件手握壽司套餐份量剛剛好，魚生選材新鮮，唯一部份款式嘅調味偏咸，以平均每人萬五円黎講只可以話勉強合格。
繼續閱讀