東京米芝蓮2018 新上榜餐廳精選

東京米芝蓮2018於較早前公佈，日本小編之前同大家介紹咗5間評價上升嘅餐廳(👉東京米芝蓮2018 上位餐廳5大推介)，今次就講吓新上榜餐廳啦。今年有82間新上榜餐廳，精選咗以下8間介紹返。除咗摘星餐廳，仲有車胎人平民拉麵呀、日式炸豬扒呀咁，梗有一間啱心水嘅~

【★★二星新上榜】

茶禅華

呢間中菜餐廳致力將中菜同日本菜各自嘅優點融合發揮，店主兼主廚更曾於米芝蓮三星常客「 Restaurant

龍吟」鑽研廚藝累積經驗，絕對係實力派，對食材品質及配搭都非常講究。另外主廚對中國茶好有研究，菜式都有相應嘅靚茶搭配，成為該店嘅獨特賣點。

基本菜單有20,000円嘅「當季食材廚師發辦套餐 (約15道菜式)」、11月至12月限定嘅「上海蟹套餐 (23,000円)」、星期六限定嘅「午餐套餐 (12,000円)」。

(圖: 茶禅華)

【★一星新上榜】

Restaurant 七鳥目

呢間主打雞肉串燒嘅餐廳，2016年開業後迅速成為好評熱店。只用嚴選嘅兵庫縣及千葉縣國產雞，再用最高級嘅備長炭細心炭燒，每一串都燒到恰到好處，而且充滿炭火香。最受歡迎嘅招牌菜係風味濃厚嘅法國半熟鵪鶉蛋串燒，想試嘅話叫個「七鳥目套餐 (5,800円)」就得，套餐仲包括埋其他串燒、燒時蔬同一品料理添。

(圖: 七鳥目)

Restaurant 銀座いしざき

【銀座いしざき】主打和牛料理套餐 (22,000円起)，唔止和牛係嚟自日本全國嘅優質貨，菜式用到嘅其他食材都係由主廚親自細心揀選，確保品質。主菜牛扒有分西冷、牛柳等部位，聽完店員介紹後，可以依個人口味隨意組合都得。套餐最後嘅飯有鹹牛肉生蛋撈飯、牛肉咖哩飯、牛肉時雨粥等俾客人選擇，真係歎靚和牛歎到最後一啖㗎。

(圖: 銀座いしざき)

Restaurant アジル

呢間法國餐廳係知名米芝蓮二星法國餐廳「 Restaurant Esquisse」營運嘅旗下新店。餐廳法文名係泥土、黏土嘅意思，店內裝潢以深木色為主，提供嘅現代法國菜都係以泥土嘅多變為概念，無論賣相同味道都富獨創性。喺呢度點菜基本上都係散叫，店員會親切咁為客人介紹菜式，所以第一次去都唔使擔心。比較特別嘅係呢度每張檯會收3,000円費用，包一杯香檳、開胃前菜及麵包。

(圖: AGILE)

【車胎人美食推介新上榜】

Restaurant Homemade Ramen 麦苗

位於品川區嘅【麦苗】自2016年開業以來門口長期有人龍。招牌拉麵係「山形雞醬油拉麵(780円)」，湯頭用哂成隻雞同魚介系食材熬成，叉燒以低溫真空慢煮，食落嫩滑又保持到肉香。除此之外，仲有鮮蝦雲吞+半熟蛋+叉燒嘅「特製醬油拉麵 (900円)」、用香川縣產小魚乾熬湯嘅拉麵「にぼらあ (780円)」等以供選擇。

(圖: 官方Facebook)

Restaurant とんかつはせ川

炸豬扒嘅主角當然就係塊扒啦~呢度選用嚴選嘅「三元豚」品種豬，就連麵包糠、油、醬汁都係同「三元豚」超夾嘅獨家配方。人氣「極上炸豬扒」面層炸到金黃香脆、香氣四溢，厚切嘅豬肉保留到肉汁唔會韌 (180克:2,400円 / 220克:2,800円)，仲可以點少少鹽/柚子醋/炸豬扒醬一齊食，別具風味。另外呢度嘅「特製湯底豚肉Shabu Shabu (1人份3,700円)」都好出名，值得一試。

(圖: とんかつはせ川)

Restaurant わたべ

鰻魚料理專門店「わたべ」選用愛知縣產鰻魚，以關東風烹調手法先蒸後烤，食落香口嫩滑，鰻魚汁嘅配方更係從開業沿用至今。必試嘅除咗有經典鰻魚丼 (2,100円)、鰻魚盒飯 (上:3,100円、特上:3,900円)，仲有第三代店主獨創、揉合日法風格嘅「自家製鵝肝拼蒲燒鰻魚 (2,300円)」。由於鰻魚係即叫即燒製作需時，所以餐廳會提供埋小食以免大家餓親，好貼心呀。