すし処 錦

營業中

休息中

姨姨想食壽司，所以晚飯就喺Tabelog揀咗間區內比較高分嘅「すし処 錦」（Sushidokoro Nishiki）。兩層高嘅壽司屋以木為主嘅裝潢和風味濃。由於姨丈經酒店訂位時冇講明要坐壽司吧，四人用餐被安排行上樓上要除鞋嘅榻榻米廂房。眼見長輩們有啲辛苦，溫婉嘅服務生即嘗試幫忙轉落樓下坐，無奈真係唔夠吧位。埋位每人先有熱毛巾一條。酒鬼們第一時間當然係叫酒酒飲啦！點好壽司，姐姐仔先送上前菜拼盤，每人一客，因為小肥冇得埋單，所以唔知收費詳情。拼盤右下角嘅枝豆十分清脆，左下方嘅刺身沙律則清新爽潤、酸甜醒胃，唯獨上面嘅汁煮魚唔係咁啱細佬口味。とろ刺身（5,550円/客）：靚靚媽咪食唔到咁多飯，所以叫咗客拖羅刺身。如相所示，厚切嘅刺身色澤瘀紅暗黑，吞拿魚毫不粉嫩，含脂肪量明顯極低，好自然地唔溶喺口，加上鮮味欠奉，完全唔合格囉！とろ寿司（650円/件）：始終家人鍾情拖羅，落單時姨姨仲話每人起碼食兩件先，唔好嘥時間等第二輪，點知大家最期待嘅拖羅壽司暗淡無光，即使比刺身油潤入口仍然唔夠軟滑同鮮濃，結果梗係冇再追加啦！海胆寿司：海膽壽司嘅飯飯就夠肥潤飽滿，可惜海膽只係質感幼嫩，敗筆在當中散發出嘅腥餲味。