東山 ハイアット リージェンシー 京都

營業中

休息中

朝早八點幾由香港家中出發，抵達「京都凱悅酒店」已經係當地晚上七點過後！幸好辦理入住手續時同姐姐仔寒喧，提及放抵行李後諗住喺附近食碗熱烏冬或者拉麵作晚餐，佢即告知區內嘅餐店其實好多都收咗舖，眼見細佬手上有哂地圖同電話，仲即場幫忙續一打去確認，以免行動有少少不便嘅媽咪白行一趟，真心感激！當真如佢所料，三間麵檔唔係已經關門都準備打烊，所以就提議一試酒店日本料理「東山」嘅烏冬。五星級酒店嘅服務絕對值得一讚再讚，殷勤溫婉嘅櫃檯姐姐竟然親自帶領二人前往樓下餐廳，確保有位坐之餘仲可以點到烏冬食，相當有交帶！駐場嘅真子妹妹見到小肥全套XO仔裝備，仲介紹市內購買精品好地點，體貼友善得很！酒店餐廳以石及木為主嘅裝潢優雅有氣質，用餐大堂開揚通爽。木造枱櫈乾爽衛生，桌上擺有齊備嘅自用筷子、餐巾及濕巾。嘻嘻，大堂中央嘅清酒陣最高效益就係喚醒咗細佬體內嘅酒蟲。由於「京都凱悅酒店」並未設置貴賓室，凱悅環球客每日於酒店範圍內可享一杯指定歡迎飲品，其中於「東山」可從一頁酒牌內揀選任何杯裝酒酒。喺飛機上已經飲咗香檳，自己一向唔溝得，結果當然係繼續檳檳啦！一頁英文版散點餐牌簡單易明，所有項目單價已含10%稅及13%服務費。