日本全國丼飯聯盟自2014年起，每年都會舉辦「全國丼飯大獎賽」，分咗海鮮丼、天婦羅丼等10個組別，選出各組別嘅王者。即睇小編精選嘅東京6大必食金賞丼店，有啲餐廳仲有優惠券添㗎，一於Bookmark定啦喂~！（大阪・京都篇傳送門）
日本小編親試--
天吉屋
【天吉屋】定價親民之餘又足料，因而成為天婦羅丼人氣餐廳之一。除咗日本新宿本店，近年仲進軍台灣開咗好幾間分店添。
小編嗰日差唔多一開門朝早11點去到，已經有兩檯客入咗座。平日午飯時間顧客都係附近嘅上班族為主，未夠12點仲已經爆場添！
建議想試嘅朋友可以好似小編咁早少少去當食Brunch，又或者晏少少嚟，如果唔係都要等等位喇。
▲招牌「天吉丼」(附前菜及味噌湯，1080円)，好足料。
由落單到上菜大約等咗15分鐘。有咁多炸物，等耐少少都合理嘅。
▲有主角蝦天婦羅四隻，仲有鱈魚、半熟蛋、四季豆、魷魚、茄子、海苔，全部都炸到外脆內軟。蝦天婦羅仲用咗業界首創嘅「木筏炸法」，兩隻兩隻蝦咁炸，好特別。
另外呢度仲有一個招牌菜「天まぶし(1,250円)」，可以一次過試勻天婦羅定食、天婦羅丼、天婦羅茶泡飯3種食法㗎。
延伸閱讀＞＞蟹道樂以外 大阪五大食蟹好去處
海鮮丼專門店【つじ半】一直都係排隊熱店，兩位老闆都係日本飲食界猛人，各自打造出天婦羅丼名店「金子半之助」同超人氣沾麵店「麺徳つじ田」。
Menu嘅海鮮丼分4種等級(包一碟前菜、鯛魚湯、數片刺身)。
「梅 (990円)」：有堆到山仔咁高嘅海鮮粒，包括吞拿魚、三文魚子、魷魚等8款材料
「竹 (1,450円)」：多咗蟹肉
「松 (1,980円)」：有埋海膽
「特上 (2,980円)」：三文魚子同海膽嘅份量加倍，圍滿哂成個碗
餐廳仲有建議嘅享用步驟添，跟住嚟食就最穩陣啦😋：
①首先將醬油同芥末撈勻，淋上海鮮丼，與此同時可以配埋一半嘅刺身享用
②食到咁上下可以叫師傅加鯛魚高湯落碗
*幾時加湯係隨個人喜好，可以食哂先加，食食吓加又得。
*師傅會問需唔需要添飯，添飯撈湯係免費㗎。
③將剩低嗰一半刺身放入鯛魚湯撈飯一齊食，加倍滋味
延伸閱讀＞＞遊日搵食指南 六大餐廳推介+優惠券
呢度已經連續幾年獲得米芝蓮車胎人美食推薦，最出名嘅係「親子丼(1,000円)」，煮得恰到好處嘅滑蛋，完美咁包住滑溜雞肉，好送飯，食過一次唔上癮都好難！
而每日限量供應20碗嘅「特上親子丼(1,600円)」，就用咗秋田縣「比內地雞」及「名古屋コーチン」呢兩款名種雞肉，連雞蛋都係嚴選嘅兵庫縣產雞蛋，好多時一開門就賣哂，要試就要早啲去排隊啦。
店主曾經喺天婦羅老字號土手の伊勢屋鑽研手藝，仲承襲埋「五代目(第五代)」呢個稱號。其後自立門戶於2015年喺淺草開咗呢間天婦羅丼店，上年開始仲陸續進軍馬來西亞、香港、台灣、加拿大等地。
秋光嘅名物要數星鰻天婦羅，叫個招牌嘅「五代目天丼(2,500円)」就可以試到，仲有各種時令食材製作而成嘅天婦羅添。
呢款天婦羅丼仲有個升級版「五代目天丼 極(5,550円)」，天婦羅份量加倍，同人開心share都得，每日限量供應5碗！
呢間西餐廳雖然舖頭細細，又唔喺旺區，但憑住一碗牛肉丼「がぶ丼 (GABU丼)」一躍成為熱店。
「GABU丼」分3種大小，180克肉：1300円、270克肉：1850円、435克肉：3100円。上面有滿到瀉嘅薄切三分熟牛肉，仲砌到成朵大花咁，又靚又有份量，一於相機食先。牛肉口感嫩滑，配埋醬油風味嘅和風醬料、適量嘅黑胡椒，味道微微辣但唔會蓋過肉嘅鮮味。
【深川つり舟】以King Size丼飯作招徠，店主曾經喺銀座嘅壽司店同深川嘅高級日本料理店鑽研手藝，所以呢度嘅丼飯唔係得個樣，兼顧埋味道同品質㗎。
▼名物之一「星鰻天丼(1,350円)」有炸到外脆內軟嘅兩大條星鰻，仲有其他蔬菜天婦羅
▼大家至愛嘅海鮮丼都有好多款，全部都大大碗！Menu入面仲有個「特上海鮮丼(2,200円)」，海鮮多到個碗都放唔哂，賣相夠哂吸引。
怕大家唔夠食，呢度嘅飯同味噌湯都係免費任添，絕對係大胃王喜訊喇。