日本小編開箱！8月必試便利店新品推介

定期企劃嚟啦！日本小編將會定期去3大連鎖便利店尋寶，開箱親試各款值得推介嘅新零食新甜品。出發前睇定有乜心水，到時買嚟自己食又得，做手信又得，行過路過就唔會錯過啦！👍

想睇更多便利店新商品開箱，可以黐實👉【隨時更新】日本小編開箱！必試便利店新品速報👈，小編會隨時喺速報推介必試item㗎。

7-11

GODIVA杯裝雪榚牛奶朱古力芒果味

(8月8日發售 / 含稅356円)

限量發售嘅GODIVA雪榚新口味。濃厚幼滑嘅朱古力雪榚，配埋微苦嘅朱古力醬同甜甜酸酸嘅芒果雪葩，味道有層次之餘唔會太漏。GODIVA迷必試！

祭Hi-Chew Blue Hawaii刨冰味
(8月8日發售 / 含稅128円)

為紀念8月12號「Hi-Chew日」而推出嘅呢款新商品，夏日風味十足。「Blue Hawaii」其實係日本刨冰嘅一種糖漿口味，喺夏季祭典嘅刨冰攤檔都會搵到，味道甜甜酸酸好清爽，似波子汽水又有啲似柑橘味梳打。錯過咗祭典嘅話，買包糖嚟過吓癮都好吖。

LAWSON

ベルギーチョコのふんわりサンド (鬆軟比利時朱古力三文治)

(8月15日發售 / 含稅150円)

呢件新登場嘅忌廉三文治用咗比利時朱古力製作，忌廉輕盈軟滑，麵皮食落鬆軟之餘仲有啲煙煙韌韌。朱古力味亦唔算太甜，食到可可香味，麵皮上面仲有啲花生碎，口感更豐富。

ぷるるん水ゼリー (彈牙水啫喱)
(7月18日發售 / 含稅140円)

LAWSON呢款和風甜品個名簡單直接，啫喱用寒天加水製作，晶瑩剔透好有清涼嘅感覺，食落又真係又彈又滑。齋食舊啫喱得好淡好淡嘅甜味，所以配埋沖繩黑糖製作嘅黑蜜同埋黃豆粉一齊食就啱啱好喇。

FamilyMart

卡樂Bじゃがりこ照燒雞味
(7月11日發售 / 含稅152円)

卡樂B呢款杯裝薯條相信好多人都食過，而呢款照燒雞味就係日本FamilyMart獨家發售嘅限定品。第一口咬落去食到醬油底味，仲有少少甜甜哋嘅照燒汁味，之後就有雞味滲出嚟。真係幾似食緊照燒雞咁！食食吓又會食到薯仔香，話咁快就一個人K.O.咗一杯😅

たけのこの里綠茶曲奇口味

(8月1日發售 / 含稅140円)

「唓！呢包嘢喺香港都見過啦！」等陣先~小編介紹呢隻新味係日本FamilyMart、Circle K同Sunkus三間便利店嘅限定商品嚟 (最後兩間便利店喺日本比較難搵😅)。朱古力曲奇餅底上面有綠茶味朱古力，食落唔係一味死甜，都有啲抹茶澀味，風味平衡得唔錯。

👇間間便利店都有　小編大推期間限定品👇

パイの実コメダ珈琲店監修シロノワール
(8月1日發售 / 含稅163円)

呢款樂天新零食由人氣連鎖Cafe「コメダ珈琲店 (Komeda珈琲店)」監製，將Cafe嘅鎮店名物「シロノワール(※)」變成一啖一粒嘅迷你版。

酥皮麵皮同喺Cafe食到嘅本尊一樣，據講有64層，食落鬆化香脆。至於本尊嘅楓糖雲呢拿雪榚，就用咗同樣口味嘅朱古力餡嚟呈現。小編試過真係一個接一個停唔到口，當手信啱哂。

※「シロノワール」：微熱嘅酥皮麵包，上面有雲呢拿軟雪榚，客人可隨個人口味淋上楓糖漿，係Komeda珈琲店最受歡迎嘅甜品。