【隨時更新】日本小編開箱!必試便利店新品速報
2天前

去日本玩嘅指定動作,當然就係去便利店尋吓寶啦~日本小編嚟緊每星期都會𥄫實便利嘅新商品情報,一有值得推介嘅必試item,就會親自開箱試食,喺呢度同大家分享。以後黐實呢篇速報,就唔怕返鄉下錯過好東西啦!

※↓2017年12月12日發售新品推介↓※
LAWSON - Häagen-Dazs 金黃朱古力配栗子醬味 (含稅294円) 

今期有LAWSON獨賣嘅哈根大師新口味。金黃朱古力味雪榚加咗朱古力碎,仲有啲焦糖香味添。雪榚甜度適中,朱古力碎令口感更豐富,栗子醬嘅風味都係亮點之一。

7-11 - GODIVA The Tablet (含稅348円)


日本GODIVA首次推出便利店限定嘅朱古力,而且只限關東地區嘅7-11限量發售。賣相型格之餘呢款牛奶果仁朱古力食落有好香嘅堅果味,入面嘅內餡有少少咬口,同朱古力嘅可可味好夾。

另外仲有一款黑Ganache朱古力味,價錢同上面嗰款一樣。

朱古力味比第一款更濃郁而且稍微帶啲苦味,啱哂唔鐘意食太甜嘅朋友。至於內餡就變咗Ganache朱古力軟心,口感軟滑。同樣係關東限定兼限量發售,有買趁手啦~

※↓2017年12月5日發售新品推介↓※
7-11 - Häagen-Dazs 焦糖夏威夷果仁甜筒 (含稅350円) 


日本哈根大師嘅首款甜筒12月5日喺東京率先發售。雪榚係牛奶味,入面有啲夏威夷果仁碎,再以幼滑嘅焦糖包住。雖然聽落好甜,但食落其實每一種口味濃郁之餘唔死甜。12月19日起會於全國7-11發售。

奶茶大福 (含稅100円)

7-11人氣大福系列今期有新口味。大福入面包住滿滿嘅伯爵奶茶忌廉,忌廉入口即化唔在講,奶茶茶味都食到,大福皮厚薄適中、煙韌彈牙。只係100円一個,奶茶控必買。

FamilyMart - 朱古力窩夫三文治 (含稅298円)


FamilyMart嘅人氣甜品系列「俺の.....」主攻男性客群,系列其中一個賣點就係「大大份」!好似今次新推出嘅朱古力窩夫三文治,足足有我哋女小編嘅手掌咁長。夾層嘅朱古力忌廉加入咗朱古力碎,仲有三片窩夫同鮮忌廉,大約有4cm咁厚㗎。朱古力控獨食又得,同人開心share又得,係唔係好介紹先?


※↓2017年11月28日發售新品推介↓※

LAWSON - UchiCafe SWEETS × GODIVA 朱古力曲奇三文治 (含稅400円)


LAWSON同GODIVA聯乘嘅人氣系列嚟到第5彈,今次仲同時發布兩款新出品添。首先介紹嘅朱古力曲奇三文治分3層,以兩片朱古力曲奇,夾住橙味Ganache朱古力,口感幼滑之餘層次豐富。味道方面甜度適中具可可香,仲食到酸甜清爽嘅橙香添。

UchiCafe SWEETS × GODIVA 濃厚朱古力蛋榚 (含稅400円)


第二款朱古力蛋榚以微苦嘅法國產朱古力為主材料,再以覆盆子醬製成Ganache朱古力並融入喺蛋榚當中。蛋榚食落口感濕潤綿密,朱古力味濃郁,覆盆子酸酸甜甜嘅風味絕對係點睛位。

田中商店 旨辛濃厚豚骨杯麵 (含稅224円)

熱門豚骨拉麵店「Restaurant田中商店」店主監製嘅杯麵今期有新口味,以杯麵型式完全重現咗店內名物--甜辣肉碎拉麵「赤オニ」。


加熱水等兩分鐘之後加埋調味湯就食得。豚骨味道香濃,同紅辣椒味道好夾,仲有少少甜味增加風味。配料份量亦夠多,食返杯當宵夜或者掃番幾杯返香港都啱。

FamilyMart - TIROL-CHOCO 黃豆粉年糕雪條 (含稅159円)

零食品牌TIROL-CHOCO嘅人氣「黃豆粉年糕朱古力」今次變身成雪條版。中間嘅黃豆粉味年糕醬比想像中更煙韌,頗有驚喜。小編建議等雪條稍稍解凍先食,年糕醬口感會更突出。包住年糕醬嘅雪榚同脆皮朱古力都係黃豆粉味,食落唔會太甜,味道柔和。

※↓2017年11月21日發售新品推介↓※
全國便利店期間限定發售 - Häagen-Dazs Spécialité系列 抹茶歌劇院蛋糕味 (含稅449円) 



哈根大師Spécialité系列用嚴選材料製成千層效果,味道豐富,賣相仲夠哂煞食。今次新口味除咗有搶眼嘅金粉,仲有濃郁嘅黑朱古力醬喺面,配上抹茶雪榚、blonde chocolate雪榚、杏仁醬、白蘭地等層次,非常矜貴,而且食落甜而不膩。

LAWSON - 星之卡比包 (蕃茄雞肉味) (含稅198円)


為記念人氣遊戲「星之卡比」誕生25周年而推出嘅特別版卡比蒸包,賣相得意到令人唔捨得食。入面係蕃茄雞肉,仲有少少蘑菇粒添,唔係淨係得個樣架。期間限定兼限量發售,行開LAWSON見到點都要買返個試吓啦。

星之卡比和菓子 (含稅395円)



除咗上面介紹嘅蒸包,LAWSON仲有呢款卡比+瓦多迪和菓子點心。和菓子主要成份有豆沙、砂糖、糯米粉等,夠哂正宗。卡比係桃味,瓦多迪就係焦糖味,外表完成度好高,一盒兩件仲可以同人開心share添。

FamilyMart - Soranoiro監製 健康拉麵べジソバ杯麵 (含稅258円)

最近真係有好多米芝蓮杯麵推出呀!今個星期有獲得東京米芝蓮車胎人美食推介嘅人氣拉麵店「Restaurantソラノイロ(Soranoiro)」嘅杯麵新登場。該店嘅招牌拉麵べジソバ (VEGE SOBA) 號稱完全唔使用動物系食材,連蛋、乳製品都冇,係只用蔬菜製成嘅健康拉麵。



入面有兩包配料(綠色、紫色)同兩包調味湯包及湯粉(粉紅色、藍色)。配料有茄子、紅蘿蔔、蘆筍、白菜等各種蔬菜。




加完熱水要等5分鐘,之後先落湯包同湯粉。一落完湯粉就聞到好香嘅紅蘿蔔甜味,炒過嘅茄子同白菜嘅香氣、粟米嘅甜味都有驚喜,整個杯麵充滿新鮮蔬菜嘅清爽甜味。


※↓2017年11月14日發售新品推介↓※

全國7-11FamilyMartLAWSON期間限定發售

日清合味道杯麵 芝士薯仔蕃茄薄餅味 (含稅216円)日清合味道杯麵又有新口味,今次係薄餅味呀!小編去便利店行咗兩轉先買到,好搶手~

一打開蓋就聞到蕃茄同芝士味,入面嘅配料都大大粒,有薯仔、芝士、蕃茄等,而且份量頗多。


加完熱水三分鐘後再開蓋,除咗芝士同蕃茄香,仲有羅勒嘅香氣添。嗰一刻彷彿有塊真pizza喺面前咁呀。可惜食落味道冇想像中咁濃郁,唔係好食到芝士味,好在有蕃茄嘅酸味同羅勒味搭救。薯仔口感實在,亦挽回不少分數。

童星點心麵 ikinari Steak味 (含稅132円)


人氣連鎖扒房「Restaurantいきなり!ステーキ」同童星點心麵合作,推出以充滿肉香嘅炭燒牛扒為靈感嘅聯乘口味。一入口就覺得大蒜味超濃,好惹味,鐘意重口味嘅朋友啱哂,送啤酒亦一流。除咗小編親試嘅原味,同時發售嘅仲有芥末大蒜味添。

※↓2017年11月7日發售新品推介↓※

全國7-11FamilyMartLAWSON期間限定發售

GODIVA 堅果朱古力雪條 (含稅395円)

GODIVA嘅人氣朱古力雪條系列出咗新口味。今次用咗優質嘅烤杏仁同榛子,製作成夾心嘅堅果醬,仲有雲呢拿雪榚同牛奶朱古力脆皮,一次過可以食到濃郁嘅堅果香同豐富嘅朱古力風味。而且條雪條都頗有份量,相信可以滿足到一眾GODIVA迷。

7-11 - 鳴龍擔擔麵 杯麵 (含稅278円)
知名拉麵店「Restaurant鳴龍」獲得2017東京米芝蓮一星殊榮之後聲名大噪,較早前都出過招牌擔擔麵嘅杯麵版,今期仲同7-11合作將杯麵升級添。湯頭用雞同魚介熬成,仲有辣油同黑醋,各種風味平衡得恰到好處。



杯入面有芝麻醬調味油(紅色)、液態高湯(綠色)、配料及湯粉包(啡色)。配料有蔥花同大大粒嘅肉碎,加熱水前要落咗先。



倒完熱水等3分鐘,落埋調味油同高湯,食得。辣度啱啱好,而且食到高湯嘅鮮甜味,仲有芝麻香同少少黑醋酸味。幼麵同湯頭好夾,而且保持到口感。當宵夜又得,做手信又得,得咗。

FamilyMart - 焙茶忌廉朱古力杯(含稅198円)

以朱古力蛋糕聞名嘅「Restaurantケンズカフェ東京」,一直有推出親自監製嘅便利店甜品。今次新作首次以焙茶作為主材料,除咗食到焙茶嘅微澀同茶香,法國產朱古力嘅口感亦好幼滑,味道濃郁之餘有層次。

LAWSON - 加賀棒焙茶純鮮忌廉大福 (含稅140円)

大福餡用加賀棒焙茶整成,再包住純鮮忌廉,係一款融合和風同西式風格嘅甜品。焙茶味道清新,忌廉嘅甜味溫和唔會漏,完全唔似望落咁甜,大福皮仲好煙韌彈牙添。


※↓2017年10月31日發售新品推介↓※

LAWSON - UchiCafe SWEETS × GODIVA 焦糖朱古力瑞士卷 (含稅395円)


大人氣嘅GODIVA聯乘甜品嚟到第4彈,今次嘅朱古力瑞士卷用朱古力海棉蛋糕,包住融合焦糖醬同榛子醬嘅軟滑忌廉。忌廉入面仲有千層蛋糕麵皮、焦糖脆片,令口感更豐富,食起嚟仲脆卜卜。朱古力味濃郁得嚟味道唔會太甜,仲帶少少黑朱古力嘅苦味添。

安納芋番薯甜筒 (含稅248円)


甜筒以鹿兒島縣產嘅安納芋番薯製成,有濃郁嘅安納芋牛奶雪榚同安納芋醬。曲奇雪榚筒仲帶淡淡嘅紫色,都食到少少柔和嘅番薯甜味。食呢個甜筒就好似食緊一個安納芋番薯咁呀。

樂天泡芙雪米糍 (含稅173円)


樂天人氣雪米糍嘅期間限定口味新登場!以忌廉泡芙為概念,雪榚係雲呢拿泡芙味,入面有牛奶吉士醬,同煙煙韌韌嘅雪米糍皮好夾。現於全國便利店發售中。

FamilyMart - 紅茶花傳 楓糖奶茶(含稅144円)


紅茶花傳當中最受歡迎嘅奶茶,今期出咗季節限定嘅新口味。奶茶百份百使用日本國產牛奶、錫蘭茶葉製成,仲加埋加拿大產嘅楓糖漿添。一扭開樽蓋就聞到楓糖嘅香氣,而且唔會死甜。紅茶花傳嘅細樽裝奶茶一般放喺便利店嘅熱飲櫃入面,喺凍冰冰嘅日本飲就最啱啦。

※↓2017年10月24日發售新品推介↓※

7-11 - 蒙古タンメン中本 芝士之一擊 杯麵 (含稅213円)

Restaurant蒙古タンメン中本拉麵店以激辣拉麵見稱,同7-11共同研發嘅「蒙古タンメン中本」杯麵系列因為有好多千奇百趣嘅食法而爆紅。今期嘅新作加入咗芝士粒,一開蓋就聞到車打芝士同香料味,仲有豆腐、白菜乾同雲耳乾。



倒咗熱水等5分鐘,食得。第一啖覺得芝士味都頗突出,中和咗辣味。之後落埋附送嘅辣油,深紅色嘅湯簡直同喺舖頭食一樣,辣得嚟又有芝士香,食落好過癮!



小編建議食嘅時候可以自己加隻溏心蛋,或者食完個麵啲湯可以撈埋飯,咁就多重享受啦。食得辣嘅朋友要掃貨啦~溫提:期間限定、限量發售㗎!

LAWSON - 金色不如帰 裏 極にぼ 杯麵 (含稅216円)

人氣拉麵店Restaurant金色不如帰來頭不小,連續兩年獲得米芝蓮車胎人美食推介,推出嘅杯麵系列同樣有新作上市。今次仲要將【金色不如帰】逢星期四先有得食嘅限定拉麵「極にぼ」重現成杯麵版,配料主要有乾蔥、竹筍、薄切叉燒。


加熱水等3分鐘,就可以落埋魚乾高湯風味嘅調味醬,即刻有魚湯香氣撲鼻而來!


湯頭濃郁而且同幼麵好夾,調味稍濃嘅叉燒亦係點睛位,水準完勝普通杯麵。個喼夠位嘅話真係要掃多幾杯,做手信都啱。

黑芝麻黃豆粉麻糬和風芭菲 (含稅295円)



單睇賣相已經夠吸引,有圓咕碌嘅麻糬丸子+黃豆粉黑芝麻忌廉+黑芝麻慕絲,最底嗰層仲有稍甜嘅黑糖啫喱,一啖潷到底嚟食嘅話,味道平衡得唔錯。

Cheerio 栗子蛋榚雪條 (含稅173円)


呢款軟心雪條以栗子蛋榚為概念,可以食到濃郁嘅栗子風味。中心部分係香滑嘅栗子朱古力,另外栗子雪榚帶酒味,仲有栗子朱古力脆皮添。鍾意食栗子嘅話一定要試吓~

※↓2017年10月17日發售新品推介↓※

7-11 - Häagen-Dazs 雲呢嗱黑蜜味雪糕 (含稅360円)



哈根大師同7-11共同研發嘅系列出咗新品啦,今次已經嚟到第9彈。呢款口味2014年推出過,今次升級版嘅雲呢嗱雪榚奶味更香濃,配埋紅豆醬同黃豆粉黑蜜醬,最底層仲有煉奶雪葩,好似食緊凍嘅和菓子咁呀~

LAWSON - 甜薯撻 2個入 (含稅395円)



又一款秋季主題甜品新登場!撻面係「鳴門金時番薯(※)甘露煮」,下面係口感輕盈濕潤嘅海棉蛋糕。蛋糕唔太甜,冇搶咗番薯風頭,可以食到番薯本身新鮮嘅天然甜味。一盒兩件,方便同人開心share。
※德島縣嘅王牌農產品,出名甜度高,質地粉糯無渣,係日本頂級嘅番薯品種。


FamilyMart - 
卡樂B水果麥片冰沙 (含稅198円)



睇個包裝係咪熟口熟面呢~?卡樂B出嘅水果麥片呢兩年被熱捧,喺日本都好有人氣,今期仲出咗數量限定嘅牛奶冰沙版添。上圖左邊嗰款有穀麥、提子乾粒、士多啤梨果肉碎;右邊係士多啤梨、藍莓、小紅莓果肉碎配杏仁碎口味

※↓2017年10月10日發售新品推介↓※

LAWSON - 石川縣產味平南瓜濃厚布甸 (含稅165円)



臨近萬聖節,LAWSON今期新登場出品都以萬聖節為主題。呢款南瓜布甸上面有錫蘭肉桂粉,成個南瓜燈咁嘅樣,連個杯都襯埋橙色㗎。布甸本身有好濃嘅南瓜味,仲有少少纖維感,底層係焦糖醬,味道唔算太甜食落好清爽。

Premium南瓜紫薯瑞士卷 (含稅210円)

今期LAWSON瑞士卷好搶眼,用咗對比鮮明嘅橙色同紫色忌廉,分別係惠比壽南瓜同紫薯整成㗎。忌廉食落都有
南瓜同紫薯味,將啲cream撈埋一齊食味道都好夾。外圍嘅係竹炭海綿蛋糕,成件事好有萬聖節feel。

7-11 - 脆皮朱古力曲奇忌廉泡芙 (含稅150円)


新推出嘅泡芙入面有軟滑嘅雲呢拿朱古力曲奇忌廉,面層係脆皮朱古力,仲有啲曲奇碎,令口感更脆卜卜。味道方面甜度適中,不過稍嫌忌廉入面嘅
朱古力曲奇碎太細,如果顆粒再大啲啲,應該會更加分。

FamilyMart - 樂天和紬雪條 紫薯味 (含稅162円)

呢款和風雪條以白朱古力包住紫薯醬同紫薯雪榚,齋睇襯色已經夠吸引。一咬落去紫薯嘅風味好濃郁,白朱古力係軟身質地,雖然偏甜但係同紫薯餡幾夾。(溫提一下:
紫薯醬都溶得幾快,慢慢歎嘅話食起嚟可能會有啲輪盡,要快快食。)



關鍵字
日本
東京
大阪
京都
遊日
美食
最新
必食
期間限定
甜品
零食
便利店
2017
8月
9月
10月
11月
12月
開飯編輯
熱愛日本流行文化的開飯小編會致力為大家追蹤最新、最豐富的美食資訊!
本月熱門
【隨時更新】日本小編開箱!必試便利店新品速報
2天前
京都米芝蓮2018 車胎人美食6大推介
2017-11-16
東京米芝蓮2018 新上榜餐廳精選
4天前
東京米芝蓮2018 上位餐廳5大推介
2017-12-08
京都追楓景點及周邊主題甜品推介 -2017年版-
2017-11-23