不經不覺又到咗今年京都夏季「納涼床 (川床)」登場嘅時候。每逢夏天，鴨川岸邊嘅餐廳都會架起可以欣賞河岸風景嘅露天座位，而且參與餐廳有西餐、壽司店、茶屋等。除咗鴨川納涼床之外，貴船、高雄、鷹峯等地都有舉行川床活動，係京都獨有嘅夏日風景。
鴨川納涼床 (2018年)
晚間：即日至9月30日 / 中午：只限5月及9月 (個別餐廳或會於中午開放)
貴船川床 (2018年)
即日至9月30日 (個別餐廳或有所不同)
高雄川床 (2018年)
晚間：即日至9月23日 / 中午：即日至11月30日
【鴨川 / 先斗町】
鴨川嘅納涼床有各種類型餐廳，而且唔少仲定價親民。從北（二条大橋）到南（五条大橋），有將近100間餐廳任君選擇。精選返以下幾間，等大家唔駛揀到頭痕～
呢間人氣居酒屋由錦市場漬物店店主經營。除咗名物「赤平盆鍋」，仲有京野菜漬物、時令海鮮刺身、烤肉、牛排、Shabu Shabu等。套餐由3980円起，亦有單點餐牌。
(圖: 官方FB)
鴨川納涼床唯一一間壽司店。想坐納涼床座位，規定一定要叫套餐，有海鰻料理、時令食材握壽司拼盤等，每位4800円起，想追加其他單點壽司亦無任歡迎。
(圖: 官網)
サロンドロワイヤル 京都
創業80年嘅朱古力專門店，除咗定番抹茶口味，連味噌、梅酒等和風口味都有。喺附設嘅Cafe消費一杯飲品，仲會贈送推介口味嘅朱古力一件。一邊食住人氣Chocolate Bonbon、蛋糕、馬卡龍等精美甜品，一邊喺納涼床欣賞鴨川景色，都咪話唔爽。
(圖: 官方FB)
【貴船 / 高雄】
貴船一帶充滿森林氣息，夏天氣溫比京都市區低幾度，唔少人會專程去避暑。而貴船川床座位一般架設於河川正上方，同大自然非常親近，望住潺潺流水，感覺暑氣全消。
貴船
呢間餐廳嘅人氣流水冷麵(1,300円)已經成為貴船嘅標誌之一。冷麵順住竹筒嘅流水流到客人面前，客人要眼明手快咁用筷子夾起麵條享用。想慢慢坐吓兼食得豐富啲，可以試吓夏季限定嘅川床料理套餐 (8,600円起)。溫提返，餐廳不設訂座服務，所以每日都排長龍，想食名物冷麵要預時間排隊喇。
(圖: 官網)
高雄
「高雄 錦水亭」係一間溫泉旅館餐廳，知名嘅川床會席料理選用地方食材，充滿京都特色。午市供應「松花堂便當 (3,800円)」及納涼會席料理 (6,800円起)，而晚市時段嘅納涼會席料理則由10800円起。另外，為配合享用川床料理嘅客人，餐廳特設往來京都站或二条站嘅交通plan，甚至連晚間觀賞螢火蟲plan都有，有興趣預約可上餐廳官網了解。
