ALEE BEACH
於上年1月開業嘅「ALEE BEACH」，以夏威夷海岸為主題，最大特色係店內有部份地下鋪咗一層白砂，配埋盪吓盪吓嘅吊椅，同充滿夏日風情嘅擺設呀咁，置身其中好有海灘feel。
菜單方面有Loco Moco米漢堡等夏威夷美食，仲有鮮艷奪目嘅靚靚特飲，打卡啱哂。提前3日預訂嘅話，仲可以安排自選圖案嘅朱古力畫添。
(圖: 官方FB)
egg 東京
餐廳主打雞蛋料理，總店於2005年喺紐約布魯克林開業，旋即成為當地大熱餐廳，更曾被「紐約時報」採訪報導。上年4月進軍海外，喺東京旅遊區池袋開設全球第一間分店。
必試人氣招牌菜「Eggs Rothko (含稅1,944円)」，喺丹麥麵包中間切個圓形，然後打個廣島縣產嘅雞蛋落去，再撒上大量白車打芝士，最後放入焗爐，就完成呢份食落鬆軟又富芝士香嘅多士，切落去隻蛋仲流心㗎！
呢間餐廳嚟自京都，以提供美味肉類料理為宗旨，於上年5月29日(日本嘅「肉之日」)進駐東京涉谷道玄坂。
推介美食絕對係人氣No.1嘅「NICK VILLAGE (含稅5,250円)」拼盤。除咗嫩滑嘅熟成Chuck flap牛肉，仲有用料講究嘅自家製豬肉腸等10款肉類，總重量大約有1公斤，夠哂幾個食肉獸一齊開心share。
(圖: 官方FB)Cheese Kitchen RACLER
位於涉谷Hikarie嘅呢間芝士料理專門店，最受歡迎嘅菜式係「拉可雷特芝士 Meat & Vege (含稅2,160円)」。除咗薯仔、香腸、厚切煙肉同其他配料，店員仲會喺客人面前，即席將熱溶後嘅主角「拉可雷特芝士」加喺配料上面。芝士傾瀉而下嘅畫面非常吸引，呃like啱哂。食落芝士味香濃唔欺場，同其他食材味道好夾。怕排隊嘅話，建議可以去新開無耐嘅銀座店／新宿店，可能會少人啲都唔定。
呢間雪榚店專賣炒雪榚卷，上年6月開業之後，迅即成為原宿話題餐廳，仲吸引唔少電視媒體採訪。炒雪榚卷源自泰國，製作時先將忌廉倒喺-10℃以下嘅板上面急凍，拌炒後再用剷剷成一個個雪榚卷，食起嚟較一般雪榚煙韌有口感。呢度提供6種雪榚口味，仲可以揀水果或曲奇等等加喺雪榚當中，當然唔少得各式Toppings同醬啦。
花多眼亂唔知點揀？餐廳已經幫大家配搭好10款原創口味，跟住嗌就無有怕啦。 (細細聲話你知丫，KinKi Kids成員堂本光一試咗「Green Tea Kiss」呢款口味㗎~)