冬天去日本玩，一定唔可以錯過當地華麗嘅燈飾佈置。小編今次介紹返東京高人氣嘅丸之內燈飾同附近嘅推介餐廳。嚟緊呢兩個月去東京嘅話要bookmark定啦~😊

丸之內燈飾 (即日至2019年2月17日)

從JR東京站丸之內出口沿「丸の内仲通り」行，就可以欣賞到全長約1.2公里嘅丸之內燈飾。路邊有200多棵樹木掛上香檳金嘅耀眼燈飾，每年冬天都吸引好多遊客前來欣賞。

12月25日前丸之內一帶嘅商業大樓都有唔少聖誕裝飾登場。好似丸之内KITTE入面就有日本室內最大型、高約14.5米嘅聖誕樹；而丸ビル就以北歐風格為主，設計出色彩繽紛嘅聖誕樹，仲有奪目嘅燈光效果配合添。

(圖: 官網)(圖: 官方facebook)

睇完靚靚燈飾再歎美食　丸之內美食推介😋

La Mere Poulard 東京

La Mere Poulard總店位於法國聖米歇爾山，成立於1888年。蓬鬆嘅奄列係呢度嘅招牌菜，選用富營養價值嘅雞蛋，以銅製煎鍋用心燒製。據講唔少名人如法國設計師Christian Dior及Yves Saint Laurent都曾經係座上客。



於2011年開業嘅東京店係法國以外嘅第一間分店，今年年中為慶祝法國本店130周年紀念，更重新裝修過添。


門口風格古色古香，入到去見到紅色間條圖案嘅座位，風格同法國總店類似，環境亦相當闊落。


(圖: 官方facebook)

如果想試多啲名店嘅手勢，小編建議可以點個「Tradition (3,200円)」套餐，除咗主角奄列，仲有前菜及甜品等。



套餐包括：① 6款前菜 (3款湯及3款沙律) 當中揀1款。② 奄列有6款可選。 ③ 選麵包或薯條任一。 ④ 10款以上嘅甜品當中選兩件。 ⑤ 餐飲

小編就揀咗前菜「季節野菜蛋沙律配檸檬醬」，半熟蛋及各種蔬菜嘅不同口感，同清爽帶微酸嘅沙律汁好夾。

梳乎里奄列就梗係試最經典嘅「煙肉芝士配薯仔」啦。



外層煎到金黃色嘅梳乎里奄列，中間嘅蛋醬好似蛋白霜咁輕盈，入口即化，口感非常特別。雖則係咁，但一份奄列嘅份量都唔少架。配埋芝士嘅鹹味、厚切煙肉同薯粒，食到最後一啖都唔會漏。

食完奄列之後，店員會送啲甜品到客人面前，客人可以從是日甜品當中揀心水兩款。一般都有超過10款甜品以供選擇。