黎東京時間好短，食梗係食最好架啦！於是上網睇到好多人介紹呢個過百年老店天丼，知道經常要排長龍，心諗一條友去應該OK掛，於是去搵下係邊先。出左地鐵行8分鐘左右就到，我係附近街道搵左一陣先搵到，間間都黑媽媽唔係好起眼，店面都有好幾個日本人排緊隊。天丼原來係指炸天婦羅飯，呢個百年老店源於江戶前，到而家依然咁多本地人幫襯就知應該保持住佢一貫既水準啦。餐廳有兩層，地面果層可以從窗口睇到師傳係度炸食物，樓上純粹得座位大概20個位左右唔算多，晚飯時段等左30分鐘左右終於入得喇。菜單唔使睇，選擇唔多，黎得呢度都係食天婦羅飯，¥950一碗，見到成檯人都係食天婦羅放係飯上面果款，唔識日文既我見到菜單上有幾個漢字寫天丼就指住叫，點知黎到啲天婦羅同個飯分開放既？心入面即刻好驚點解同對面果位人兄碗飯唔同既，分開放係咪即係天婦羅既款式唔一樣呢？不過食食下見到其實自己果啲都人地一齊放係碗飯係一樣既，咁心都定啲！天婦羅有好多款式，有兩隻蝦、一條魚、豆角、玉子、花枝、紫菜，其實放返入碗都係逼爆碗飯面😂😂😂炸漿不得了，好正呀！啱啱炸起非常香脆，好薄好脆唔會沾到過多既粉漿，證明師傅功力深厚。每一啖都咬到入面既食材唔係咬左兩啖都仲係食緊炸粉，每一樣都好好食，尤其是條魚，雖然唔知道係咩魚，但真係無得彈，size唔大唔細好鮮嫩，又無骨啖啖肉，每一啖都漏魚汁出黎，炸花枝又係一絕，份量十足，每一啖都係厚厚既花枝肉！係邊度搵呀？炸玉子原來好考功夫，由一隻生蛋沾粉漿炸至半熟溫泉玉子咁，真係唔知師傅點整既呢？但係炸玉子又係好好食！！撈埋圓潤飽滿既珍珠米，蛋汁香氣係個口入面四溢，真係齒夾留香！食曬一碗飯係超級飽，但係食完你就會好滿足，不枉特登黎搵仲要排咁耐隊！¥950唔使講，絕對抵食啦😉…查看更多
