影片
電話號碼
03-5766-9500
獎項殊榮
米芝蓮二星餐廳 (2016-2020), 亞洲50最佳餐廳 (2017-20), 米芝蓮 綠星 (2021-2025), 米芝蓮三星餐廳 (2021-2025)
營業時間
今日營業
11:30 - 15:30
17:30 - 23:30
星期一
全日休息
星期二至三
17:30 - 23:30
星期四至六
11:30 - 15:30
17:30 - 23:30
星期日
全日休息
*不定期休息
以上資料只供參考, 請與餐廳確認詳情
相關文章
肥肥家族每次東瀛遊除咗日本料理之外，例必要食法國大餐！聖誕前專登避開旺季出門，結果真係俾細佬於網上成功訂到位去試三星名店「L’Effervescence」，當真令人興奮期待！隱蔽於西麻布靜寂嘅小區內，餐店就好似一間外觀時尚嘅別墅咁，要步進左方嘅小徑後方才可抵達正門。早到嘅貴客要落去下層嘅小客廳候座。用餐大堂面積寬廣，光線極之柔和，講真除咗隔離枱客人之外，想睇遠啲都幾有難度。二人被入座半梳化式嘅散座，厚墊椅櫈十分舒適，且空間感足。每位席上都擺有自用嘅餐具及餐牌。由於晚市只有一款廚師發辦套餐（36,000円/位），客人如有任何食物敏感問題必先於訂座時說明。餐牌左方嘅主題就好比進化論般，甚有意思，右方則為對應菜式嘅簡介。餐桌上有鮮花擺設。埋位除咗有熱毛巾之外，哥哥仔仲即場簡單而隆重地燃點燭光，浪漫嘅氣氛勁適合情侶拍拖拖。表妹最感動嘅就係每次離開餐桌時，官仔骨骨嘅服務生都會自動上前幫忙拉櫈、帶路、並更換全新嘅餐巾，態度誠懇！WelcomeOmotenashi Cocktail：晚餐迅即由侍酒師Yuki-san於桌邊炮製雞尾酒，歡迎客人光臨！笑容滿面嘅Yuki-san極富幽默感，介紹其特調嘅雞尾酒同主材純米吟釀PERO個小豬標籤一樣咁可愛吸引，容易令人接受，上枱最後一刻仲好似表演魔術咁彈出黃色嘅粉末！以日本清酒調出嘅雞尾酒酒味唔濃，散發出嘅陣陣菊花香清幽淡雅，極易入口。Bouquet of vegetable crisps, tofu sour cream：為怕大家空肚飲酒傷胃，跟雞尾酒上有籃巧薄輕盈嘅雜菜脆片，塗點另上嘅豆腐酸奶忌廉，聽落原本都覺得有啲怪，但食落卻意外地夾，唔熱氣之餘仲多咗份清柔感，送酒一流！細閱過餐牌及酒牌，XO仔都係同平時一樣繼續飲香檳，嘻嘻，由於飯後仲要慢慢行去睇燈飾，半樽裝啱啱好。溝得嘅表妹就決定放膽一試包咗七杯紅酒、白酒、日本清酒同甜酒嘅「Special Pairing」餐酒配對（44,000円/位）。用餐前每人先揀一把私家刀。PrimalWhite truffle, hairy crab, sasanishiki risotto：Yuki-san邊煮邊講解靚殼內含日本笹錦米造出嘅意大利飯，以扇貝上湯𤉶煮後先混入毛蟹肉加熱，再於桌上鮮刨出白松露，以確保松露嘅香氣唔會流失。頂面舖滿白松露薄片嘅菜式芳香四射，第一啖最突出嘅係帶子清湯嘅鮮甜，做到好似泡飯咁嘅意大利飯飽滿不膩口，細嚼兩口即嚐到當中幼嫩甜美嘅毛蟹，開場菜成功以觀感刺激食慾，相信這就是主題中「原始」嘅元素。Genesis of Civilization Potato focaccia, sourdough：餐牌個作者其實都幾有深度，將基本食糧之一嘅麵包形容為文明嘅象徵，絕對貼切！小肥自己鍾意暖手嘅麵包，所以對於兩款唔熱嘅麵包就感覺麻麻，其中focaccia較為厚身同冇乜味，反而深色啲嗰件酸種麵包外脆包鬆軟，可口得多。Ars longa, Vita brevis (Art is long; life is short.)Artisanal vegetables：食法國餐連拉丁文都出埋，已經知佢唔講得笑，不過真係冇諗過一碟沙律竟然係由五十六款日本蔬果所組成！大廚精挑細選嘅全部都係日本土產，更恍如特別鳴謝般逐一列出其根源，包括產地、農場及技藝農夫嘅資訊；頌讚之舉直令小弟領悟到蔬果可瞬間被吃掉，但培植乃恆久嘅藝術也！由年輕力壯嘅Takumi-kun（拓海哥哥）捧出大大盤蔬果，顏值高得黎堅震撼！透明碟盤於白色枱布上為彩艷亮澤嘅蔬果營造出好似啱啱採摘出黎嘅模樣，吸睛得很！碟上不同形狀嘅菜菜同生果本身極之新鮮，而且口感豐富，個人最愛清甜爽脆又多汁嘅蜜柑、梨梨、提子；用上嘅蜜柑醋汁香甜嘅同時，灑上面嘅昆布粉末又添上咸度，混入其中嘅薄荷葉勁醒神，就連味道都好有層次，驚喜源源不絕！表妹大讚配襯嘅白酒除咗一啲都唔酸之外，同個沙律更有互相輝映之效，果真為好酒好菜！Fixed Point Tokyo turnip complexity and simplicity：餐牌上唯一保持不變嘅項目乃此道鎮店招牌日本蘿蔔，唔怪得知會定名為「定點」。經過慢煮嘅蘿蔔圓碌碌，淨食好清，沾上墊底綠色嘅芹醬及麵包粒即添上一份菜味，精髓係要配埋啖日本清酒，咁先會感受到蘿蔔個甜味及清酒嘅醇香如何同時地於口腔中提升，簡單中的複雜。Autumn airSilver pomfret roasted in fig leaves, Japanese squash, sauce beurre blanc, muscat, red onion, preserved lemon, chrysanthemum flowers：食法國大餐自然唔少得魚魚，秋季嘅銀鯧魚嘅魚油勁到反哂光，故魚肉尤其滑嘟嘟，就咁食真係有少少溜，師傅巧妙地伴配超爽嘅生洋蔥、潤甜嘅提子肉、微酸嘅白酒牛油及南瓜蓉醬，中和作用剛好證明烹飪絕對係一種化學嘅藝術。Blessings of the forestKyoto Nanatani duck breast cooked over a wood fire with Mizunara oak, from Hinohara Village in Tokyo, Red wine sauce, Japanese mustard spinach：鴨胸主菜以源自京都嘅七谷鴨做出，外層透出淡淡嘅煙燻木香，鴨皮少肥脆潤，胸肉色澤粉嫩，且厚腍多汁，紅酒秘醬夠濃縮所以點兩點就夠味；配菜中綠色嗰條小松菜好鮮嫩，細佬最鍾情上面芳香脆薄嘅菇片。Duck thigh raviolis, yuzu, consommé：七谷鴨除咗鴨胸之外當然係有其他部位啦，大廚明顯愛惜食材，懂得善用鴨鴨煲出濃湯及包製意大利雲吞。皮層夠薄嘅雲吞主要用上鴨脾肉作餡，咬落係出乎意料咁爽口，滲透出陣陣西芹香亦十分清新，而且熱力十足，食完居然仲有得添！MigrationArtisanal Japanese cheeses：芝士起源係邊係一個幾有爭議性嘅話題，不過都幾肯定唔係日本；估計日本人因為鍾意食芝士先會鑽研其造法。法國餐廳所提供嘅芝士講明全為日本貨，歡迎客人試哂全部咁多款，並選擇大細，小肥自認唔多好淨食芝士，所以就要咗個迷你版。SyncretismPear, fromage blanc, Japanese ginger vinaigrette and myoga crisp：甜品環節有幾部曲，第一味先有清涼嘅芝士雪糕，聞落已經覺得個薑味醋汁好酸，好在雪糕夠凍且味唔重，墊底嘅梨梨好爽甜，連埋脆脆嘅薑片食，甜品消滯得黎好有層次感。Island banana and mint choux/Brown rice financier/Hassaku/ Strawberry/Plum and red shiso crystal/Chocolate, dry ginger：接著嘅錦盒共有六款菂薂嘅法式小點，小肥嗰份無果仁版內含香脆嘅薄荷香蕉泡芙、柑橘味迷你蛋糕、士多啤梨棉花糖、糖衣蛋糕仔、紫蘇梅啫喱糖及薑味朱古力夾心餅。Matcha：西餐飲抹茶相信只會喺日本先會遇到，跟茶每人都有杯另上嘅手調奶奶，重點係奶奶唔係溝落杯茶度飲嘅。Yuki-san即場表演嘅茶道由洗杯開始，每個步驟都好整齊專業，態度極之認真！應指示，順序先含一啖厚濃嘅奶奶喺口，味蕾迅即洋溢著濃甜絲滑，再呷一口鮮製抹茶，抹茶同奶奶喺口中交織纏綿之時，茶茶嘅苦味化於奶香中，完全唔澀，渾然天成嘅抹茶拿鐵果真係非一般！World Peace：結尾嘅滴漏咖啡醇濃順滑，質素絕不比任何一道菜遜色，飯後一杯尤其暖胃舒適。東京米芝蓮三星食府「L’Effervescence」環境高雅幽靜，服務生體貼入微，周到得很！師傅嚴選多款日本節令食材烹調出不一樣的法國菜，成功以獨創嘅美食譜奏出日法料理之進化篇，實在令人難忘！臨走前仲有彩蛋驚喜，每人可選一份手信帶返屋企，咁咪即係又食又拎？！掂呀！
繼續閱讀