銀座最強CP值午餐推介【前篇】
2018-07-11

銀座除咗名店林立,仲係東京首屈一指嘅美食激戰區。今次小編就精選幾間銀座嘅高性價比午餐介紹返,仲親身踩點添!其實銀座唔係淨得fine dining嘅。


RestaurantむぎとオリーブRestaurant


餐廳於2015年起連續3年獲得米芝蓮車胎人美食推介,係銀座必食拉麵店之一


▼離餐廳最近係東京metro銀座站A3~5出口。經過GINZA SIX之後會見到呢個「銀座六丁目」街口,轉左之後直行。


▼跟住再喺藥房呢個街口過馬路,然後左轉,行多兩步就到餐廳。


小編平日3點左右去到,等咗5分鐘左右就有位,如果放飯時間(12:00-14:00)嚟,日日都要排長龍架。

▼第一步先買食券。售票機上有餐牌,仲有細細行嘅英文翻譯,售票機上面嘅按鈕有英文字母對應返,購買應該冇難度。


▼店內環境。


拉麵大致分3種,名物係「蛤SOBA (980円)」,蛤蜊由名產地三重縣桑名市直送,湯底有魚介及雞油香。

鶏SOBA (880円)」同樣高人氣,使用大量本地雞種「大山雞」及整隻雞熬煮湯底,色澤呈金黃色,再用由老字號廠商供應嘅醬油調味。

唔知點揀嘅話,可以叫碗集合蛤蜊、雞、小魚乾三種材料熬成湯底嘅「鶏・煮干・蛤のトリプルSOBA (980円)」。


▼小編叫咗最出名嘅「蛤SOBA」。蛤蜊大大隻有肉地,雞肉叉燒入口嫩滑,仲有造型特別嘅日式魚片、山芋、海苔、長蔥等配料。


▼麵係口感偏硬嘅直身中幼麵。醬油湯底飲落頗清爽。


▼千祈唔好錯過檯上呢樽「紅蔥頭調味油」,充滿蔥香同橄欖風味,加咗之後成碗麵嘅味道層次更提升。


Restaurant数寄屋バーグRestaurant


呢度主打A4、A5級和牛或黑毛和牛漢堡扒,而且價格親民,係銀座上班族嘅人氣午餐熱店之一。

▼離餐廳最近係東京metro銀座站B10出口。一上到地面會見到鞋舖同不二家。餐廳就喺不二家轉角一間相機舖旁邊。


▼如果搭JR,喺有樂町站中央口或者銀座口出站,向住下圖「数寄屋橋交差点」進發就得。(下圖)綠箭咀:不二家;橙圈:相機舖;綠圈:目標餐廳。

▼餐廳位於大廈出入口,為免阻塞通道,人多嘅時候需要喺旁邊嘅行人路排隊。


▼排隊時有餐牌睇,店員會先幫客人落單。
午市餐牌有馳名和牛漢堡扒(分大/中/細) + 1款toppings (8揀1) + 1款醬汁 (5揀1)。

正當花多眼亂唔知點揀嘅時候,店員同小編推介最受歡迎嘅組合係中size漢堡
 × 半熟蛋芝士 × 数寄屋秘製香蒜醬油汁 (合計1,500円),當然即刻order一份啦。

▼一坐低就即刻有沙律上檯。醬汁帶黑胡椒香,仲有啲粟米片,幾開胃


▼主角登場啦~


漢堡扒大概有女仔拳頭咁大,上面有半溶嘅芝士同半熟蛋,仲有分開上碟嘅香蒜醬。牛肉以黑胡椒調味,富肉香之餘同微辣嘅醬汁好夾,配埋其他Toppings一啖食落口,的確滋味無窮。小編最欣賞係食完都唔覺油膩,感覺出奇地輕盈添。

除咗銀座本店,喺品川仲有間Restaurant外賣自取專門店架。



後篇會介紹銀座老字號蛋包飯,仲有抵食壽司,密切留意啦!


關鍵字
東京
銀座
午餐
高CP值
高性價比
抵食
推介
開飯編輯
熱愛日本流行文化的開飯小編會致力為大家追蹤最新、最豐富的美食資訊!
餐廳資料
更多
收起
本月熱門
【隨時更新】日本小編開箱!2018年必試便利店新品速報
2天前
心齋橋&美國村 定番大阪美食BEST 7
2018-08-08
【2018年版】京都夏季傳統 「納涼床🎐」餐廳推介
2018-07-19
【IG洗版】原宿Kawaii💕話題雪榚BEST 3
5天前