日本兩大人氣迴轉壽司攻略【前篇】
2018-04-18

迴轉壽司絕對係日本窮遊恩物,價錢平質素高,而且梗有一間喺左近。查實日本有唔少迴轉壽司連鎖店,分店遍佈全國,人氣較高嘅要數「スシロー (Sushiro)」同「くら寿司 (藏壽司)」,兩間都主攻市中心地段,而且一般壽司只係108円起/碟咋。日本小編親試兩間壽司店,從落單流程到人氣壽司一一介紹。前篇先講吓「藏壽司 (東京 / 大阪 /京都)」


Restaurantくら寿司 池袋東口店Restaurant

小編今次去咗呢間池袋分店,由池袋站行大約5分鐘就到,係唔少當地打工仔、學生嘅飯堂嚟架~


由車站到餐廳路線:

▼池袋站東口一行出嚟,就會見到呢條馬路。過完馬路轉右。

▼一直向前行無耐,會見到呢個紅綠燈位。過咗紅綠燈繼續直行。
▼行多兩步就見到「くら寿司」所在嘅大廈入口。

▼大廈大堂右手邊有條樓梯落地庫,一落到去就會見到餐廳入口。



▼入到餐廳,先要喺左手邊取票機攞飛。綠色掣係「卡位」、紫藍色掣係「吧檯位優先」。

要留意返卡位只限2位或以上顧客使用,一人遊就唔好意思啦。吧檯位限1位至4位。



▼揀完座位之後輸入人數

▼張飛正中間寫住「...番」就係票號,唔好整唔見呀。

▼叫到號碼時,店員會遞塊板俾客人。上面寫住被安排嘅座位號同座位表,自己跟住搵返位置就座就得。

▼每個吧檯位之間都有個可拎走嘅隔板。就算一個人嚟食,感覺都好自在。


▼卡位都好闊落

▼用嚟點餐嘅平板電腦。提供日文、英文、繁體中文3種語言。


▼揀咗壽司之後會去到以下畫面,可以揀飯嘅份量及碟數。左邊黑色掣係一般飯量,右邊紫色掣係飯量減半。

▼「藏壽司」都有類似香港壽司店「高速線」咁嘅系統,而且壽司送到之前仲會喺平板電腦顯示添。


▼迴轉帶上嘅壽司都用咗「藏壽司」獨創嘅防菌保護罩,揸住壽司碟邊,輕輕向上拎起就得。


▼飯量減半啱哂細食嘅客人,仲可以留肚食多幾款壽司添。不過留意返,飯量減半同正常飯量係同價架。


「藏壽司」壽司碟碟108円 (大拖羅壽司及拖羅壽司拼盤除外),好抵食!人氣壽司TOP 3係:

第1位 熟成吞拿魚

赤身魚肉夠厚身,而且經獨創嘅「解凍加工技術」熟成,食落味道更鮮味,長期深受顧客歡迎。必試!


第2位 三文魚腩

魚肉同樣厚身,而且魚脂甘香又唔膩,令人想食完一碟又一碟。


第3位 油甘魚

厚切之餘冇魚腥味,好易入口,而且魚獲上水翌日就會送到餐廳,保證鮮度。


▼食完嘅碟可以放入檯上嘅收集機,系統會自動計埋食咗幾多碟,最後埋單計數都順暢啲。


▼放5隻碟入去收集機仲可以抽扭蛋。扭蛋會喺座位最頂嘅扭蛋機跌出嚟,獎品一般都係「藏壽司」吉祥物/壽司造型電話繩等。可惜小編試咗兩次都抽唔中......



▼埋單方法亦好簡單。按下平板電腦左下方嘅「お会計 (結帳)」掣,會有店員嚟確認最終碟數,之後就可以去收銀機俾錢架喇。


即刻睇埋後篇スシロー (Sushiro)」嘅介紹,比較吓邊間啱自己心水啲!


延伸閱讀:食肉獸必讀!東京燒肉放題5大推介





開飯編輯
熱愛日本流行文化的開飯小編會致力為大家追蹤最新、最豐富的美食資訊!
餐廳資料
本月熱門
【隨時更新】日本小編開箱!2018年必試便利店新品速報
2018-09-07