【隨時更新】日本小編開箱!2019年必試便利店新品速報
3天前

去日本玩嘅指定動作,當然就係去便利店尋吓寶啦~日本小編嚟緊每星期都會𥄫實便利嘅新商品情報,一有值得推介嘅必試item,就會親自開箱試食,喺呢度同大家分享。以後黐實呢篇速報,就唔怕返鄉下錯過好東西啦!

※↓2019年1月15日發售新品推介↓※
7-11 GODIVA The Tablet 白朱古力宇治抹茶味 (連稅348円)

日本7-11獨賣嘅GODIVA The Tablet系列出咗新嘅「白朱古力宇治抹茶味」。用甜味溫和嘅京都宇治抹茶白朱古力,包住內裡嘅宇治抹茶Ganache朱古力。口感幼滑之餘仲食到宇治抹茶嘅醇厚風味。現正於全國7-11期間限定發售中。


全國便利店期間限定發售 - 明治Essel Super Cup 紅茶曲奇雪糕 (連稅140円)

高人氣兼高CP值嘅明治Essel Super Cup雪榚第一次推出呢款「紅茶曲奇味」。紅茶雪榚食落好似奶茶味,幼滑香濃。入面仲加入咗大小不一嘅紅茶曲奇碎,富茶香味亦令到口感更豐富。全國便利店期間限定發售中。

※↓2019年1月8日發售新品推介↓※
LAWSON - 士多啤梨卷蛋 (連稅230円)

今個星期各間便利店都推出唔少士多啤梨甜品。第一款要介紹Lawson嘅士多啤梨卷蛋,唔單止製作海棉蛋糕同忌廉嘅時候使用更多士多啤梨,蛋榚中間仲有士多啤梨醬同半粒士多啤梨,完美配搭出恰到好處嘅甜味及清爽酸味。現正於全國Lawson期間限定發售中。

LAWSON - 士多啤梨芭菲 (連稅350円)


第二款係Lawson嘅士多啤梨芭菲,入面有士多啤梨mousse、海綿蛋糕、有果肉嘅士多啤梨醬等,口感豐富。小編特別欣賞其中嘅士多啤梨牛奶醬,甜味適中而且有奶香。同樣於全國Lawson期間限定發售中。


FamilyMart - 士多啤梨麻糬包 (連稅135円)


FamilyMart今期有兩款士多啤梨麵包,呢款士多啤梨麻糬包食落煙煙韌韌,入面仲有適量嘅士多啤梨忌廉。至於外面就有一層士多啤梨朱古力,撒埋士多啤梨糖片及餅乾碎,賣相搶眼。全國FamilyMart期間限定發售中。

FamilyMart - 士多啤梨牛角包 (連稅138円)



第二款要介紹嘅FamilyMart新出品係士多啤梨牛角包。單睇賣相好似冇乜特別,但食落都有牛油香,餡料係士多啤梨醬及士多啤梨朱古力。同樣係期間限定發售中。

7-11 士多啤梨忌廉及鮮忌廉銅鑼燒 (連稅199円)

而7-11推出嘅士多啤梨甜品,就係呢款融合日式及西式風格嘅銅鑼燒。銅鑼燒嘅餅皮有蓬鬆嘅口感,而且唔會乾噌噌。夾心餡嘅主角係酸甜嘅士多啤梨忌廉,仲有少少幼滑鮮忌廉增加層次。現正於全國7-11期間限定發售中。


※↓2018年12月18日發售新品推介↓※
LAWSON - GODIVA朱古力條 (連稅各378円)


GODIVA今期一口氣推出三款不同口味嘅朱古力條。
▼「72% cocoa」有深度嘅可可香,食落口感順滑,嗒真啲仲有果味aftertaste添。


▼「Blood Orange」有清爽嘅橙味,同黑朱古力好夾,入面仲加咗香橙脆脆增加口感層次。「Milk Chocolate」口感幼滑仲夠奶香。


現正於全國Lawson期間限定發售中。GODIVA迷不妨買哂三款試試。

7-11 焦糖燉蛋年輪蛋糕配雪榚 (連稅248円)


綿密細緻嘅年輪蛋糕內有雲呢拿雪榚,奶味香濃,除此之外仲有脆皮白朱古力、微苦焦糖醬,無論味道同口感都有多重享受。全國7-11期間限定發售中,售完即止。

※↓2018年12月10日發售新品推介↓※
LAWSON - 法式聖誕蛋糕 (連稅各360円)



Lawson聖誕前夕推出以紅色及白色為主題嘅法式mousse蛋糕。白色嗰款「blanc」係白朱古力mousse味,以紅色嗰款「rouge」就係莓果mousse味。


「blanc」除咗有白朱古力mousse,仲有微苦嘅焦糖mousse及焦糖脆脆,朱古力蛋糕餅底、莓果及白朱古力Ganache唧花亦係亮點。

另一款「rouge」,莓果mousse入面有份量適中嘅開心果ganache,海棉蛋糕底就略為厚身咗少少。兩款蛋糕現正於全國Lawson期間限定兼數量限定發售中。

7-11 - 雞蛋布甸拿鐵 (連稅192円)


7-11推出嘅呢款「雞蛋布甸拿鐵」,口感會通過搖晃而變化。一打開包裝見到入面本來係布甸質地,可以用匙羹舀嚟食,但shake多幾下之後,就變成稀稀哋嘅奶昔狀。


飲落有雞蛋及忌廉味,仲有少少焦糖醬嘅甜味,真係幾似飲緊布甸咁。全國7-11期間限定發售中,售完即止。

※↓2018年12月4日發售新品推介↓※
全國便利店期間限定發售 - Häagen-Dazs 吉士布甸雪榚 (連稅294円)



係呀日本哈根大師又出手啦,今次係重出2013年大受歡迎嘅吉士布甸口味,最正正子嘅係裡面會有苦甜焦糖醬,加埋吉士雪糕一齊食,夠Sweet得嚟又有層次~

7-11 Häagen-Dazs 朱古力夏威夷果甜筒 (連稅350円)



Häagen-Dazs今個星期仲有呢款新出品,只限7-11發售。朱古力雪榚使用比利時朱古力製作,混合夏威夷果仁,朱古力脆皮味道濃郁,連曲奇筒都係朱古力味,必食。全國7-11期間限定發售中,售完即止。


LAWSON - 麺屋武蔵 無双新免 鴨湯拉麵 (連稅318円)


人氣拉麵店「麺屋武蔵」監修嘅杯麵系列出咗新口味。先落蔥之後加熱水等5分鐘,之後再落埋調味粉、湯包,同埋主角鵝肝風味嘅豬背脂。豬背脂有淡淡嘅鵝肝甜味,同醬油湯底好夾。麵條口感清爽,食到最後一啖都唔覺膩。現正於全國LAWSON期間限定發售中。


※↓2018年11月27日發售新品推介↓※
全國便利店期間限定發售 - Häagen-Dazs Spécialité 朱古力香檳士多啤梨雪榚 (連稅486円)

日本哈根大師有嚴選食材嘅Spécialité系列,今個星期有新口味推出。特別選用Marc de Champagne嘅香檳製成香檳雪榚,配上酸甜嘅士多啤梨醬、香檳Ganache醬、有朱古力碎嘅朱古力雪榚,夠哂矜貴。全國便利店冬季限定發售中,數量有限,售完即止。

LAWSON - Uchi Café×GODIVA 朱古力心太軟 (連稅350円)


LAWSON×GODIVA嘅人氣系列今個星期推出兩款出品。第一款係朱古力心太軟,選用濃郁嘅GODIVA朱古力製作,建議加熱嚟食。(微波爐1500W: 10秒 / 500W: 20秒)


軟滑嘅朱古力蛋糕入面有融化朱古力醬。蛋榚頂有一片朱古力、糖粉等,可以享受豐富嘅朱古力口感。現正於全國LAWSON期間限定發售中。


LAWSON - Uchi Café×GODIVA 朱古力千層酥 (連稅350円)


第二款新品係朱古力千層酥。充滿牛油香嘅千層餅有三層,有入口即溶嘅朱古力夾心,食落有可可豆香,口感又夠鬆脆。現正於全國LAWSON期間限定發售中。

※↓2018年11月19日發售新品推介↓※
全國便利店期間限定發售 - 合味道Rich 豪華濃郁海膽忌廉杯麵 (連稅248円)



清合味道Rich系列新推出「豪華濃郁海膽忌廉杯麵」,使用6.9%真正海膽製成配料,以重現海膽嘅鮮味,仲有西蘭花作為配菜添。


食之前落埋調味油,即刻聞到濃郁嘅牛油味同海膽味。湯底係忌廉湯味,飲多幾啖都唔覺漏。主角配料入口即溶,味道比真正海膽少咗啲海水味,但勝在夠creamy。現正於全國便利店期間限定發售中。

7-11 Max Brenner 朱古力焦糖MOCHI雪榚 (連稅280円)


人氣朱古力品牌Max Brenner同7-11聯乘推出新品雪榚。濃郁嘅朱古力雪榚配埋脆脆焦糖朱古力、榛子粒、麻糬,口感非常豐富。要留意呢款雪榚除咗期間限定,仲係地區限定發售(限東京、神奈川、千葉、埼玉、愛知、岐阜、三重及關西地區)。咁矜貴,見到真係要買返杯試試。


FamilyMart - 梳乎里布甸 (連稅278円)


FamilyMart新甜品結合鬆軟梳乎里同幼滑布甸,中間有層鮮忌廉同焦糖醬,甜味溫和,一杯就滿足到兩個願望。期間限定發售中,售完即止。



※↓2018年11月13日發售新品推介↓※
全國便利店期間限定發售 - Häagen-Dazs 意大利軟芝士紅莓雪榚三文治 (連稅294円)



日本Häagen-Dazs以初戀為主題,推出呢款雪榚三文治新口味,意大利軟芝士及白朱古力雪榚嘅白色代表初戀嘅純粹,而紅色嘅紅莓及士多啤梨醬就代表心動,味道酸酸甜甜唔會太漏。現正於全國便利店期間限定發售中。

LAWSON - 宇治抹茶朱古力蛋糕 (連稅330円)



今個星期LAWSON一次過出咗3款蛋糕,而小編就特別推薦呢款抹茶朱古力蛋糕喇!朱古力材料產自法國,底層係朱古力海綿蛋糕,中間有玄米朱古力醬同抹茶朱古力醬,仲有兩層抹茶mousse,食落有多重口感。蛋糕上仲有一少撮金粉,賣相相當吸引。現正於LAWSON期間限定發售中,售完即止。

LAWSON - 雷神紫薯朱古力 (連稅130円)


人氣雷神朱古力首次推出紫薯味,選用鹿兒島出產嘅紫薯粉,紫薯味都算濃郁,買嚟做手信啱哂!現正於LAWSON優
發售中。


7-11 - 焙茶和風布甸 (連稅160円)


7-11今個星期甜品新作係焙茶和風布甸,一杯就可以享受到焙茶的茶香味同幼滑忌廉。現正於全國7-11期間限定發售中。



關鍵字
日本
遊日
美食
最新
必食
期間限定
甜品
零食
便利店
7-11
Lawson
FamilyMart
2019
1月
2018
12月
11月
開飯編輯
熱愛日本流行文化的開飯小編會致力為大家追蹤最新、最豐富的美食資訊!
餐廳資料
更多
收起
本月熱門
【隨時更新】日本小編開箱!2019年必試便利店新品速報
3天前
2019米芝蓮 東京新上榜餐廳推介
2018-12-27
2019年大阪米芝蓮 新上榜餐廳推介
2018-12-29
【東京】冬日限定丸之內燈飾×絕品梳乎里奄列
2018-12-22
2019東京米芝蓮 成功「升呢」餐廳推介
2019-01-07