【隨時更新】日本小編開箱!2018年必試便利店新品速報
5天前

去日本玩嘅指定動作,當然就係去便利店尋吓寶啦~日本小編嚟緊每星期都會𥄫實便利嘅新商品情報,一有值得推介嘅必試item,就會親自開箱試食,喺呢度同大家分享。以後黐實呢篇速報,就唔怕返鄉下錯過好東西啦!

※↓2018年11月7日發售新品推介↓※
LAWSON - Häagen-Dazs my sweet 紫薯焦糖布甸雪榚 (連稅324円)


日本哈根大師呢排成日出新口味,今個星期呢款「紫薯焦糖布甸」味,紫薯雪榚中間有層紫薯醬,而面層係脆皮吉士朱古力同焦糖醬,食落紫薯味濃郁。要溫提返,呢款口味係LAWSON獨家發售,期間限定,售完即止。


全國便利店期間限定發售 - 雪見大福 焙茶雪榚糯米糍 (連稅194円)


選用由伊藤園茶師監修嘅茶葉,富茶味嘅焙茶雪榚入面仲有焙茶醬添,鐘意食焙茶甜品嘅朋友又多一個選擇。現正於全國便利店期間限定發售中。

※↓2018年10月30日發售新品推介↓※
LAWSON - 金色不如帰 濃厚蜆湯鹽味拉麵 (連稅258円)

連續多年獲得米芝蓮車胎人推介嘅東京拉麵名店Restaurant金色不如帰」,今期同LAWSON合作推出新口味杯麵。



加哂配料之後加熱水等4分鐘,再加味粉同湯包。一落完湯包即刻聞到好香黑松露味,濃郁嘅鹽味湯頭有真鯛同蜆嘅鮮甜味,仲有少少黑松露嘅微甜添,就連配料都保持到唔錯嘅口感。現正於LAWSON期間限定發售中。


全國便利店期間限定發售 - Häagen-Dazs 和風紅豆雪榚 (連稅294円)


呢款紅豆雪榚4年前推出過,當時深受好評,今個秋天終於返黎啦。雪榚入面有粒粒紅豆及紅豆醬,牛奶雪榚選用紅糖製作,甜味溫和,更能帶出紅豆嘅風味。現正於全國便利店期間限定發售中。


※↓2018年10月23日發售新品推介↓※
LAWSON - 獨角獸卷蛋 (連稅210円)


臨近萬聖節,日本便利店都紛紛推出唔少應節商品。呢款萬聖節限定卷蛋,海棉蛋糕係粉藍色,配上士多啤梨忌廉及雲呢拿忌廉,仲有少女味十足嘅包裝,啱哂影相打卡。現正於LAWSON期間限定發售中。


FamilyMart - MAISON KAYSER 香檳覆盆子雪榚 (連稅350円)


人氣麵包店「MAISON KAYSER」總店位於巴黎,喺日本有數十間分店,一直以嚟有唔少擁躉支持。而呢款由該店監修嘅雪榚,食落香檳味夠,同酸甜嘅覆盆子醬好夾,感覺清爽。
現正於Family Mart便利店有售。

FamilyMart - 焦糖布甸芭菲 (連稅298円)


份量十足嘅芭菲以布甸為主角,布甸下面有鮮忌廉、焦糖醬、布甸mousse及焦糖啫喱,甜度適中,食完大大杯都唔覺漏。同樣
於Family Mart便利店期間限定發售中。


※↓2018年10月16日發售新品推介↓※
LAWSON - 鬆弛熊萬聖節和菓子 (連稅各280円)



人氣鬆弛熊和菓子又返嚟啦!今次萬聖節版嘅鬆弛熊同牛奶熊,造型好似喺南瓜燈度伸個頭出嚟咁,好cute cute。鬆弛熊係南瓜布甸味,而牛奶熊就係楓糖味。現正於LAWSON期間限定發售中。


全國便利店期間限定發售 - Häagen-Dazs 特濃朱古力配覆盆子醬雪條 (連稅294円)


日本Häagen-Dazs雪條出咗新口味。雪條有內外兩層朱古力脆皮,脆皮中間有層酸酸甜甜嘅覆盆子醬夾心,而主角就係濃郁而帶微苦嘅朱古力雪榚,食落有多重口感。現正於全國便利店期間限定發售中。

※↓2018年10月9日發售新品推介↓※
7-11 雙重芝士蛋榚味雪榚 (連稅181円)


內有芝士凍餅及焗芝士蛋糕兩種口味嘅雪榚,仲有兩層芝士曲奇餅碎及芝士醬,食落有濃郁芝士風味而且口感豐富。現正於全國7-11期間限定發售中。

7-11 沖繩紫薯布甸 (連稅199円)


選用沖繩宮古島的紫薯「ちゅら恋紅」製作,布甸口感幼滑而且紫薯味濃、甜度適中,紫薯控唔好錯過。同樣於全國7-11期間限定發售中。


FamilyMart - 伊藤園焙茶Latte (連稅198円) 


100%使用石川縣產加賀棒焙茶製作嘅Latte,飲落有焙茶獨有嘅茶香,奶味溫和唔會蓋過茶味,飲完感覺清新。現正於Family Mart便利店有售。


※↓2018年10月2日發售新品推介↓※
全國便利店期間限定發售 - Häagen-Dazs Story Time 白雪公主的蘋果 吉士味 (連稅324円)



日本哈根大師今個星期出咗兩款新口味,呢個「Story Time」系列以童話故事為概念,好似呢一款就以白雪公主嘅蘋果為主題喇。濃厚嘅吉士忌廉雪榚入面有大大粒嘅蘋果果肉,上面仲有蘋果醬同心型嘅煉奶。賣相同味道同樣吸引~現正於全國便利店期間限定發售中。


全國便利店期間限定發售 - Häagen-Dazs Story Time 愛麗絲的紅茶 曲奇味 (連稅324円)



同系列另一款新口味以愛麗絲夢遊仙境嘅茶會為概念,雪榚混合大吉嶺茶、牛油曲奇、意大利軟芝士三種味道,食落好夾,仲有心型嘅黑加侖子醬同牛奶醬喺面添。同樣於全國便利店期間限定發售中。


7-11 Tiramisu銅鑼燒 (連稅199円) 



日本7-11正式開始咗萬聖節主題甜品巡禮,第一彈就係呢款「Tiramisu銅鑼燒 」啦。銅鑼燒麵皮口感煙韌,芝士忌廉入口即溶,咖啡朱古力同珈琲醬滋味濃郁,整體唔會太甜。現正於全國7-11期間限定發售中。


※↓2018年9月25日發售新品推介↓※
LAWSON - 鬆弛熊朱古力饅頭 (連稅200円)


日本Lawson便利店最近新出鬆弛熊造型朱古力饅頭呀!裡面係朱古力忌廉軟心聽落幾吸引,
不過鬆弛熊咁可愛,大家又捨唔捨得咬落去呢?

LAWSON - 紅寶石朱古力卷蛋 (連稅350円)


瑞士朱古力廠商Barry Callebaut上年成功研發出以紅寶石可可豆製作嘅粉紅色朱古力「紅寶石朱古力」。今期Lawson推出第一款以紅寶石朱古力製作嘅便利店甜品,卷蛋嘅忌廉同海棉蛋榚都有朱古力味,而且粉紅色都係純天然,冇人造色素架!當然唔少得一片紅寶石朱古力,俾大家嗒真啲。忌廉入面仲有莓果醬,酸酸甜甜令層次更豐富,想平試紅寶石朱古力嘅話唔好錯過~

7-11 甘薯大福 (連稅108円) 


7-11大受好評嘅大福系列有新口味,今期忌廉餡係秋天當造嘅甘薯味,製作時加埋牛油令忌廉更creamy,而且甜度溫和唔會膩。
現正於全國7-11期間限定發售中。

※↓2018年9月18日發售新品推介↓※
全國便利店期間限定發售 - Häagen-Dazs 焦糖朱古力雪榚 (連稅287円)



日本Häagen-Dazs事隔3年再次推出期間限定嘅焦糖朱古力雪榚,上次推出旋即大熱,今年秋天載譽歸來。焦糖雪榚甜度適中,入面有微苦嘅焦糖醬,仲有脆脆朱古力片,濃郁嘅風味令人一試難忘。現正於全國便利店期間限定發售中。

全國便利店期間限定發售 - いろはす天然水 二十世紀梨味 (連稅130円)


之前天然水品牌「いろはす」搞咗個投票活動,俾大家估吓將會推出咩新口味,網民反應熱烈。結果眾望所歸真係出咗梨味天然水,仲升級選用鳥取縣名種梨--「二十世紀梨」萃取當中精華,務求呈現二十世紀梨嘅香甜滋味。現正於全國便利店期間限定發售中。


※↓2018年9月4日發售新品推介↓※
LAWSON - Uchi Café × GODIVA 朱古力栗子蛋糕 (連稅480円)


Lawson獨賣嘅GODIVA聯乘新作登場,今個星期一次過推出兩款新品。第一款朱古力栗子蛋糕,最底層係蛋白餅、中間有酸酸甜甜嘅黑加侖子啫喱、朱古力忌廉、朱古力Ganache、歐洲產栗子忌廉,仲有朱古力片同朱古力粉,層次豐富。食到濃郁嘅朱古力味亦有果味嘅清爽,唔會太漏。現於全國Lawson期間限定發售中,數量有限,售完即止。

LAWSON Uchi Café × GODIVA 朱古力蛋糕 (連稅350円)



第二款新出品係濃厚嘅朱古力蛋糕,餅底加咗曲奇碎、杏仁碎增加口感,幼滑嘅朱古力Ganache上面有果仁粒,充分享受到GODIVA朱古力嘅風味。現於全國Lawson期間限定發售中,數量有限,售完即止。

全國便利店期間限定發售 - Häagen-Dazs 雲呢拿吉士蘋果批雪榚三文治 (連稅294円)

日本Häagen-Dazs嘅雪榚三文治新出「蘋果批味」。除咗食到酸甜嘅蘋果味,仲有甜味溫和嘅雲呢拿吉士味,雪榚入面更有帶微微肉桂香嘅蘋果果肉添~全國便利店期間限定發售中。


關鍵字
日本
遊日
美食
最新
必食
期間限定
甜品
零食
便利店
7-11
Lawson
FamilyMart
2018
11月
10月
9月
開飯編輯
熱愛日本流行文化的開飯小編會致力為大家追蹤最新、最豐富的美食資訊!
餐廳資料
更多
收起
本月熱門
【隨時更新】日本小編開箱!2018年必試便利店新品速報
5天前