【隨時更新】日本小編開箱!最新必試便利店新品速報
2天前

去日本玩嘅指定動作,當然就係去便利店尋吓寶啦~日本小編嚟緊每星期都會𥄫實便利嘅新商品情報,一有值得推介嘅必試item,就會親自開箱試食,喺呢度同大家分享。以後黐實呢篇速報,就唔怕返鄉下錯過好東西啦!

※↓2017年10月17日發售新品推介↓※

7-11 - Häagen-Dazs 雲呢嗱黑蜜味雪糕 (含稅360円)



哈根大師同7-11共同研發嘅系列出咗新品啦,今次已經嚟到第9彈。呢款口味2014年推出過,今次升級版嘅雲呢嗱雪榚奶味更香濃,配埋紅豆醬同黃豆粉黑蜜醬,最底層仲有煉奶雪葩,好似食緊凍嘅和菓子咁呀~

LAWSON - 甜薯撻 2個入 (含稅395円)



又一款秋季主題甜品新登場!撻面係「鳴門金時番薯(※)甘露煮」,下面係口感輕盈濕潤嘅海棉蛋糕。蛋糕唔太甜,冇搶咗番薯風頭,可以食到番薯本身新鮮嘅天然甜味。一盒兩件,方便同人開心share。
※德島縣嘅王牌農產品,出名甜度高,質地粉糯無渣,係日本頂級嘅番薯品種。


FamilyMart - 
卡樂B水果麥片冰沙 (含稅198円)



睇個包裝係咪熟口熟面呢~?卡樂B出嘅水果麥片呢兩年被熱捧,喺日本都好有人氣,今期仲出咗數量限定嘅牛奶冰沙版添。上圖左邊嗰款有穀麥、提子乾粒、士多啤梨果肉碎;右邊係士多啤梨、藍莓、小紅莓果肉碎配杏仁碎口味

※↓2017年10月10日發售新品推介↓※

LAWSON - 石川縣產味平南瓜濃厚布甸 (含稅165円)



臨近萬聖節,LAWSON今期新登場出品都以萬聖節為主題。呢款南瓜布甸上面有錫蘭肉桂粉,成個南瓜燈咁嘅樣,連個杯都襯埋橙色㗎。布甸本身有好濃嘅南瓜味,仲有少少纖維感,底層係焦糖醬,味道唔算太甜食落好清爽。

Premium南瓜紫薯瑞士卷 (含稅210円)

今期LAWSON瑞士卷好搶眼,用咗對比鮮明嘅橙色同紫色忌廉,分別係惠比壽南瓜同紫薯整成㗎。忌廉食落都有
南瓜同紫薯味,將啲cream撈埋一齊食味道都好夾。外圍嘅係竹炭海綿蛋糕,成件事好有萬聖節feel。

7-11 - 脆皮朱古力曲奇忌廉泡芙 (含稅150円)


新推出嘅泡芙入面有軟滑嘅雲呢拿朱古力曲奇忌廉,面層係脆皮朱古力,仲有啲曲奇碎,令口感更脆卜卜。味道方面甜度適中,不過稍嫌忌廉入面嘅
朱古力曲奇碎太細,如果顆粒再大啲啲,應該會更加分。

FamilyMart - 樂天和紬雪條 紫薯味 (含稅162円)

呢款和風雪條以白朱古力包住紫薯醬同紫薯雪榚,齋睇襯色已經夠吸引。一咬落去紫薯嘅風味好濃郁,白朱古力係軟身質地,雖然偏甜但係同紫薯餡幾夾。(溫提一下:
紫薯醬都溶得幾快,慢慢歎嘅話食起嚟可能會有啲輪盡,要快快食。)


※↓2017年10月3日發售新品推介↓※

關東地區便利店限量發售 - 焦糖燉蛋雪榚 (含稅321円)



呢款話題雪榚其實喺今年4月曾經出過一排,旋即大熱,事隔半年再度登場。焦糖係從20多種糖中精心揀選,再經生產公司獨創嘅方式加熱,成功製作至金黃色之餘仲口感酥脆,其他雪榚冇㗎。焦糖下面係使用嚴選牛奶製作嘅香濃牛奶雪榚,甜度適中。食嘅時候要先㩒凹杯邊少少,會容易啲食,然後小編建議可以用匙羹輕輕敲碎層焦糖~無花無假真係脆卜卜嘅呢。

延伸閱讀>>今秋必試期間限定甜品特集-2017年版-

全國便利店期間限定發售 - Häagen-Dazs 安納芋甜番薯雪榚 (含稅287円)



哈根大師嘅人氣口味「安納芋甜番薯」今年秋天又返嚟啦。 今次嘅雪榚入面仲有濃郁嘅安納芋甜番薯醬添!番薯醬口感偏杰身,入面仲混合咗少少番薯粒,所以可以直接試到安納芋本身嘅味道㗎。

延伸閱讀>>歎3大萬聖節主題下午茶🎃【東京篇】


全國便利店期間限定發售 - 森永班戟布甸 (含稅138円)



為慶祝森永熱賣嘅班戟粉推出60週年而發售嘅呢款布甸,以充滿小麥及牛油香、鬆軟嘅班戟為概念。齋食嚿布甸係濃滑嘅忌廉口味,倒埋楓糖漿就有食緊厚班戟嘅感覺。

7-11 - 明月兔仔糰子 (含稅160円)



月亮同兔仔?咁中秋嘅?其實呢款咁得意嘅和風甜品,真係專為今年嘅「十五夜(※)」而推出㗎。兔仔糰子嘅造型好似抬頭賞緊月咁,入面係紅豆蓉餡,而月亮就係番薯味餡料。兩款糰子嘅麵皮都軟糯煙韌,餡料滑得嚟唔似一般和菓子咁甜添。
※「十五夜」即日本嘅中秋節,定於農曆八月十五,日本人喺呢日傳統上會賞月同食應節嘅「月見糰子」。


LAWSON  Premium朱古力éclair泡芙 (含稅295円)



今年4月曾經推出兼大獲好評嘅「Premium朱古力éclair泡芙 (法國閃電泡芙)」再度登場。 泡芙上面有一層濃厚幼滑嘅朱古力醬,仲有朱古力片同朱古力粒,入面就有法國出產嘅黑朱古力製成嘅滿滿忌廉,一件泡芙就可以食到唔同質感嘅朱古力。朱古力怪必食!


FamilyMart - 大大件忌廉泡芙 (含稅258円)


呢嚿泡芙名副其實大大件,鬆軟嘅泡芙皮夾住大量嘅蓬鬆忌廉。泡芙皮本身冇咩甜味,全靠忌廉帶出清爽而柔和嘅甜味。另外夾心配料竟然有原片蘋果、奇異果同菠蘿粒,打直咁插喺忌廉入面。好有霸氣呀!



※↓2017年9月26日發售新品推介↓※

全國便利店限定發售 - PABLO x 樂天和風芝士蛋糕朱古力批 (含稅97円)


人氣芝士撻店PABLO同樂天合作,以「PABLO和風芝士撻」為概念,推出咗期間限定嘅「樂天和風芝士蛋糕朱古力批」。朱古力批入面有宇治抹茶忌廉芝士同黑蜜醬夾心,忌廉份量係普通朱古力批嘅1.3倍,食落真係幾有芝士撻幼滑嘅口感,但抹茶味未算好濃郁,反而黑蜜醬嘅味道幾出。


全國便利店有售 - Suntory透明奶茶 (含稅124円)



Suntory之前出過透明乳酸飲料、透明檸檬茶,今次到透明奶茶啦!喺天然水中加入嚴選嘅阿薩姆茶葉及牛奶萃取物,飲落真係有茶香同牛奶嘅芳醇,感覺幾得意。同埋小編覺得透明奶茶嘅餘味比一般奶茶淡,邊食飯邊飲都唔覺漏,一於買支嚟送宵夜啦。


LAWSON  安納芋黑芝麻吉士忌廉撻 (含稅210円)



撻餡主要採用鹿兒島縣產嘅「安納芋」甘薯製成,同埋加入咗適量吉士忌廉;撻底之所以係黑色皆因用咗黑芝麻整成。芝麻撻底食落口感唔錯脆脆哋,個餡滑得嚟甘薯味亦好濃郁,食到最後仲有少少肉桂味添。


Premium五郎島金時黑芝麻瑞士卷 (含稅210円)


LAWSON Uchi Cafe SWEETS嘅瑞士卷一向多捧場客,今期新口味以石川縣甘薯「五郎島金時」作為賣點,和風得嚟仲好有秋意。海綿蛋糕混合咗黑芝麻粉,充滿芝麻香,忌廉就用咗「五郎島金時」醬整成,上面仲有適量甘薯粒同黑芝麻添。甘薯忌廉嘅甜味柔和天然,同黑芝麻海綿蛋糕好夾。


※↓2017年9月19日發售新品推介↓※

LAWSON - 西班牙栗子蛋糕 (含稅295円)



今期LAWSON推出嘅栗子蛋糕,栗子醬係用西班牙栗子製成,栗子味道濃郁,仲食到栗子本身嘅風味添。底層嘅海綿蛋糕係焦糖口味兼有杏仁碎,鮮忌廉有兩層,其中一層係吉士口味,口感幼滑甜度適中,食哂成件都唔覺漏。


7-11 - Cold Stone 蜂蜜芝士雪榚三文治 (含稅297円)



人氣雪榚連鎖店Cold Stone嚟自美國,第一次推出雪榚三文治就由7-11獨賣。鬆軟嘅海綿蛋糕,中間夾咗蜂蜜芝士味雪榚,芝士味香濃,蜂蜜嘅甜味仲幾清爽。雪榚仲加入咗適量嘅橙皮同檸檬醬,微微嘅酸味同果香,令味道同口感都更有層次。


豆奶宇治抹茶Tiramisu (含稅198円)



呢杯和風Tiramisu用豆奶代替芝士製成,杯仔細細但有五個層次:抹茶海綿蛋糕碎、抹茶醬、抹茶海綿蛋糕、豆奶慕斯同抹茶慕斯。食落有抹茶香而唔會過澀,甜度亦控制得恰到好處,而且口感幼滑,抹茶控啱哂。



※↓2017年9月12日發售新品推介↓※

全國便利店限定發售 - GODIVA朱古力奶 (含稅238円)
呢杯朱古力奶由森永乳業推出、GODIVA監製,選用GODIVA嘅高級朱古力製作。入口幼滑香醇之餘,朱古力味仲好濃郁,聞都聞到可可香氣。美中不足係唔算好大杯,得180毫升,朱古力控可能要買多兩三杯先夠喉喇~


全國便利店期間限定發售 - Häagen-Dazs 脆皮雪榚三文治南瓜布甸味 (含稅294円)


一啖咬落去,第一感覺係餅皮的確幾脆,南瓜雪榚被一層南瓜朱古力包住,入面仲有濃郁而微苦甘甜嘅焦糖醬。小編覺得南瓜雪榚本身幾甜,配埋微微苦嘅流心焦糖醬,都算中和返。可惜食到尾段就覺得焦糖味太搶,令南瓜味未算好突出。


7-11 - 卡樂Bじゃがりこ 妖怪薄餅味 (含稅160円)

雖然仲有個幾月先到萬聖節,「卡樂Bじゃがりこ」已經率先出咗今年萬聖節嘅期間限定口味--「妖怪薄餅味」。包裝色彩繽紛好有節日氣氛,薯條仲係好搶眼嘅粉紅色同鮮黃色。食落係蕃茄薄餅味,正正常常仲幾惹味,唔伏。


FamilyMart - 蛋糕布甸大福 (含稅298円)


呢款甜品融合咗日式及西式元素,以柔軟煙韌嘅大福皮包住幼滑忌廉、適量嘅杏仁片、海綿蛋糕,夾心係一整嚿布甸,上面仲有少少焦糖醬。布甸彈牙滑溜而且唔太甜,海綿蛋糕亦有蛋香,大福皮同杏仁片仲有點睛嘅效果,令口感層次更豐富。


LAWSON - 濃厚甘薯蛋糕 (含稅150円)

LAWSON標榜呢款蛋糕嘅綿滑程度,係要用匙羹先食到,比一般蒸蛋糕更入口即化。食材方面主要用咗鹿兒島縣產嘅「安納芋」番薯,食落番薯味濃郁,甜味天然清爽。



※↓2017年9月5日發售新品推介↓※


LAWSON - Uchi Cafe SWEETS × GODIVA 朱古力蛋榚 (含稅320円)



最底層嘅朱古力海綿蛋糕口感鬆軟,配埋嗰層厚厚嘅幼滑朱古力慕斯、最上層嘅朱古力,一啖食落去朱古力味的確好濃厚。而海綿蛋糕同慕斯中間仲有啲朱古力碎,加埋最頂嗰塊黑朱古力片,令風味更豐富又唔會太甜,CP值超高!


Uchi Cafe’ SWEETS × GODIVA 朱古力撻 (含稅350円)



成件朱古力撻有4層,撻底有微微嘅橙香,之後係口感脆卜卜嘅堅果朱古力,然後係甜味清爽嘅朱古力忌廉餡,最上面仲有層薄薄嘅幼滑朱古力醬添。一件撻就可以品嚐到各種口感,帶堅果、橙香嘅朱古力配搭亦有心思,令味道更有層次。

↓喺微波爐叮一叮仲正!↓


小編用750W叮咗約10秒,效果如圖示,成功變身流心朱古力醬。叮完之後感覺可可味濃厚咗同甜咗,鐘意食甜啲嘅朋友不妨一試。 (如果覺得流心效果太勁不妨用中低火叮,要小心唔好叮太熱呀~)


7-11 -宮崎紅蕃薯泡芙 (含稅140円)



之前小編都有介紹過呢款7-11人氣泡芙系列「しろもこ」,賣點係鬆軟煙韌嘅麵皮同爆滿嘅忌廉餡,每次出新口味都冇令粉絲失望。今期出品秋意滿瀉,選用宮崎縣產嘅「宮崎紅蕃薯」製作,尤其忌廉餡軟滑得嚟有好濃嘅蕃薯味,味道感覺都幾天然唔覺漏,連外型都跟足「宮崎紅蕃薯」咁紫皮黃心。明明食緊泡芙,但點解有食真蕃薯嘅感覺嘅~?


MAX BRENNER 粒粒棉花糖朱古力雪榚 (含稅280円)



日本7-11同人氣朱古力店Max Brenner共同研發嘅聯乘甜品,Max Brenner人氣No.1朱古力Pizza變做濃厚嘅朱古力雪糕杯忠實還原本尊Pizza上面灑滿嘅朱古力粒,仲有棉花糖同牛油曲奇。雖然望落好邪惡,但小編覺得甜度適中唔太誇張,仲有豐富嘅多層口感添。
 

※↓2017年8月29日發售新品推介↓※ 

茶類甜品一直係唔少人嘅心頭好,除咗抹茶乜乜乜,呢排聽得最多嘅都可以話係焙茶啦。日本三大便利店今期都不約而同出咗「焙茶乜乜乜」,有西式有和風,即睇。

7-11 - 焙茶巧克力蛋糕 (含稅180円)


成件甜品都係由焙茶x朱古力組成,上面嗰層係加入焙茶嘅朱古力忌廉,下面嗰層就係焙茶朱古力蛋糕。食落口感鬆軟而且唔會乾爭爭,朱古力味濃郁但唔會太甜,都食到焙茶嘅茶味,而蛋榚部分嘅焙茶味尤其突出。蛋糕唔算好大件,一個人食啱啱好,夜晚買返酒店當飯後甜品啱哂。


LAWSON - 加賀棒茶焙茶布甸 (含稅165円)


「加賀棒茶(※)」焙茶布甸口感滑溜、入口即化,甜味清爽唔死甜,但茶味較淡唔算好突出。布甸底部有石川縣產嘅能登大納言小豆,大大粒絕無欺場,同布甸一齊食都幾夾。

※「加賀棒茶」:日本烘焙茶嘅一種,由位於石川縣加賀市、擁有超過150年歷史嘅「丸八製茶場」製作,只使用茶莖部分焙煎而成。


FamilyMart - 甘薯焙茶和風芭菲 (含稅248円)



呢杯芭菲將黑蜜、焙茶、甘薯等和風要素集於一身,上層有焙茶忌廉、薩摩芋甘露煮、紅豆醬,中間有海綿蛋糕同鮮忌廉,最底係黑糖啫喱。歎一杯芭菲就可以品嚐到多種口感,而且都食得出各款材料本來嘅風味,配搭平衡得唔錯,甜魔食完應該大滿足


關鍵字
日本
東京
大阪
京都
遊日
美食
最新
必食
期間限定
甜品
零食
便利店
2017
8月
9月
10月
開飯編輯
熱愛日本流行文化的開飯小編會致力為大家追蹤最新、最豐富的美食資訊!
本月熱門
【隨時更新】日本小編開箱!最新必試便利店新品速報
2天前
今秋必試期間限定甜品特集-2017年版-
2017-09-28
召集真餓底 巨量美食5大推介【大阪篇】
3天前
3大萬聖節主題下午茶推介🎃【東京篇】
2017-10-04
4大萬聖節主題下午茶及自助餐推介🎃【大阪京都篇】
2017-10-09