嚟到年尾，又到咗日本米芝蓮公佈嘅時刻。2019年大阪米芝蓮獲得最高評級三顆星嘅餐廳共有4間（與去年相同），二星餐廳減少1間，共16間；一星餐廳新上榜有11間，減少7間，共79間；米芝蓮車胎人推介餐廳共有110間。

以下介紹返一間法國菜餐廳，由去年嘅車胎人推介，成功上升一級到一星餐廳，仲備受日本食家注目添。

前芝料理店　[車胎人美食推介→★]

餐廳以肉類料理為招牌菜，唔少食客嚟到呢度必點嘅菜式係「なにわ黒牛 炭火焼き (未連稅4,800円)」，選用唯一產自大阪嘅黑毛和牛「なにわ黒牛」，以炭火原件炭烤，充分地鎖緊肉汁。前菜「法式冷肉醬 (未連稅1,800円)」等亦非常出色。以米芝蓮星級法國菜嚟講，呢度單點菜式嘅價位都算好公道。

至於蔬菜類嘅食材，主要從關西地區嘅農民直接採購，保證新鮮。當然唔少得一杯同美食夾到絕嘅有機葡萄酒啦。

除此之外，逢星期日及公眾假期供應嘅午餐「Prefix Course」，有湯、前菜、主菜、甜品，定價為3000円(未連稅)，都算係相當貼地。11月開始會供應埋平日午餐，有前菜拼盤及2款主菜，定價為2800円，啱哂想試多幾款菜式嘅朋友。

前芝料理店
交通：谷町六丁目站步行約3分鐘（從大阪或梅田站乘電車約需20分鐘）

(圖: 官方Facebook)

開飯編輯

熱愛日本流行文化的開飯小編會致力為大家追蹤最新、最豐富的美食資訊！