無論係禮拜六日定係平日，喺擁有東京最耐歷史嘅淺草區， 幾時都係咁人潮湧湧。一行出淺草站，你可能已經會覺得好似時光倒流咁，行過賣好多傳統小食，杯杯碟碟，太鼓，和服等等嘅老舖。當然啦，一場黎到淺草又點可以唔正正經經食餐有特色嘅日本餐？
跪喺度食大阪燒
染太郎淺草出名食大阪燒，而最有名嘅，莫過於叫「染太郎」嘅老舖。你一定唔會錯過染太郎，因為佢嘅樸素木造屋外表，由1938年以來從未變過。更加唔駛講嘅係，舖頭前面幾時都有條長長嘅人龍等住喺呢間具有懷舊風情嘅木屋入面食大阪燒。
染太郎入面一張櫈都冇，因為全世界都要除鞋坐喺Tatami 嘅地板上用餐。咪話我唔話你知，食食下好有可能會感覺到腰痛！
染太郎有好多唔同味嘅大阪燒比你選擇，而最有特色嘅，係當店獨有嘅「染燒」。同其他大阪燒唔同之處，係染燒有麵喺入面，仲有上上下下都有塊皮包住，好有質感。
染太郎近年越嚟越受外國人歡迎，所以餐牌上有英文，中文同埋韓文嘅翻譯，同埋點樣自製大阪燒。
喺淺草版嘅京都竹林度食甜品你試過未？
いづ美由染太郎行過雷門嘅途中，你可能會發覺到一間望落好高貴，仲有個縮細版京都竹林同埋幾十碗甜品模型喺前面嘅舖頭。
呢間叫做「いづ美」（Izumi），細細間嘅舖頭由外到內都被竹林包圍住，令顧客一路食傳統日式甜品之餘可以享受寧靜嘅氣氛。
Izumi 嘅紅豆類甜品一年到晚都好以食到，但係刨冰類只係5月至10月有供應，而熱辣辣嘅紅豆沙就只會喺11月至4月有供應。
喺咁舒服嘅環境之下食擁有懷舊日本風情嘅甜品，好容易會誤以為自己去咗京都！
嚟得淺草就當然要去淺草寺啦
由Izumi行多幾分鐘，你就會見到大大個淺草寺同埋雷門喺你嘅左手邊出現。周邊仲會有好多人力車師傅嘗試說服你坐佢哋車遊淺草。作為東京最舊嘅寺廟，淺草寺喺645年完成，而佢前面嗰條商店街就已經有200間賣手信同埋傳統特色小食嘅舖頭。
除咗作為東京最受遊客歡迎嘅地點之外，淺草寺對於日本人黎講，帶有深深嘅和平同埋再生嘅意義。原因在於喺第二次世界大戰嘅時候，淺草寺被炸彈炸毀，但係被重建之後，每年5月嘅第三個禮拜都會為供奉起淺草寺嘅三位偉人而舉辦東京最大規模嘅節日：三社祭。