梅雨季去東京旅行，想抗衡鬱悶天氣同時消解暑氣，大家需要嘅係冰涼、清爽、食完0負擔嘅果系甜品！今年東京各大餐廳都不約而同地紛紛推出以蜜瓜為主題嘅期間限定刨冰/蛋糕/芭菲，仲要款款都睇落極Juicy & IG-able，就算本身唔係瓜控又冇多個甜品胃，相信食完主餐都一樣食得落！

📍 KIHACHI CAFE HIBIYA CHANTER Store (日比谷)

⏰ 即日起至7月18日    

呢Set咁Fancy嘅蜜瓜主題下午茶三層架(2,640円)，一次過就可以到迷你芭菲杯、布甸同巴馬火腿配蜜瓜！驚食完太飽食唔落晚飯亦可以揀雙色蜜瓜芭菲杯(1,760円)或雙色蜜瓜批 (1,650円)。留意返所有蜜瓜主題甜品都係由下午2點之後供應，而且每樣都係有限供應、不設預約！呢間Cafe除咗東京日比谷店，於福岡天神、北九洲小倉、近鐵名古屋站亦有分店。

📍 Kurumicco Factory (橫濱)

⏰ 即日起至8月末    

而家去東京旅行大部份人都唔會剩係留喺都心玩，以一個鐘左右車程計可以去到嘅橫濱唔知大家又鍾唔鍾意呢？啱嘅就可以考慮去於2019年10月尾，即係啱啱疫情前起好嘅郵輪碼頭複合設施HAMMERHEAD行吓，呢度除咗有一流海景同可以去玩自製朱古力之外，仲有以合桃為主題嘅甜品工場Kurumicco Factory。嚟呢度可以買走全神奈川縣手信最優秀獎嘅合桃酥，亦可以食埋今年夏天佢哋推出嘅赤肉蜜瓜 X 杏仁奶凍芭菲(920円)，由上至下分別有果肉、有汽沙冰、奶油、酥餅、蜜瓜啫喱同杏仁奶凍，期間限定供應到8月末咋！

📍 ATELIER de GODIVA 西武池袋本店 (池袋)

⏰ 2023年6月21日至9月5日

可能隔離飯香，唔知點解就係覺得好多國際品牌喺日本推出嘅款式特別多同吸引，好似朱古力Brand Godiva咁，本身佢哋喺西武池袋本店已經有極邪惡嘅堂食限定甜品朱古力杯，嚟緊仲會好快有埋消暑系甜品：芒果/蜜瓜芭菲杯！以蜜瓜ver.做例，每杯都有若干粒切成一口Size嘅多汁果肉、冰涼蜜瓜雪葩、蜜瓜啫喱、白朱古力慕斯同海綿蛋糕，無論係一層一層分開食抑或一下挖呀挖呀挖到底嚟食都咁正！芭菲杯有分堂食版(2,420円)同外賣版(1,188円)，如果住附近嘅買杯返酒店/搭新幹線時歎都咪話唔爽！

📍 東京雅敘園酒店 - Cafe & Bar 結庵 (目黑)

⏰ 2023年7月1日至8月31日 11:30~17:00

雖然金錢/時機上未必許可入住呢間內藏有超過2,500件日本畫及美術工藝品、全球奢華精品酒店 (Small Luxury Hotels of the World)之一、獨一無二嘅美術館級數酒店，但大家可以藉住入去食豪華蜜瓜刨冰(3,080円)呢個機會入去見識一下喇！餐廳提供加配香檳Set(4,620円)，蜜瓜以外亦有價錢一樣嘅西瓜版，兩款水果冰雖然仲用半個外殼裝住，但入面啲果肉其實一早已經幫大家挖好哂，食用時可以保持住優雅大方靚樣，二人同行建議各叫一個開心分享！

📍 東京香格里拉酒店28F - THE LOBBY LOUNGE (丸之內)

⏰ 2023年7月1日~9月30日 11:00~17:30

名就冇咩特別就咁叫蜜瓜刨冰(5,500円)，但實際上佢係用100%蜜瓜汁打成冰，再重新凍結放入切半蜜瓜，最外層仲有製作得超級細緻嘅白朱古力網紋外殼，頂層放入椰子脆片同牛奶雪糕，入面收埋有咬口嘅珍珠同杏仁豆腐，無論係食定睇都係頂級享受！

📍 東京凱悅酒店6F日本料理 - 旬房 (六本木)

⏰ 2023年7月3日~8月31日；午餐及晚餐時段均有供應

最後要介紹呢款於刊出呢篇文章之時一樣仲未有得食，但佢卻係全篇入面最豪華兼18禁嘅蜜瓜甜品——夏之獺祭 蜜瓜刨冰！同唔少餐廳一樣會用切半蜜瓜作為容器，入面裝有混合咗果肉、果汁嘅沙冰，食時可以先食幾啖原味感受吓清爽果香，然後可以逐少逐少落重頭戲獺祭汽泡酒溝埋一齊食，加咗酒香之後成個冰嘅味道同價格都即刻多一層成熟嘅韻味 (盛惠10,000円，就算計6算都要$600)！