圍爐取暖攻略🍲東京火鍋10選 (上)
2023-01-20

冬季返鄉下雖然話一入室內就有暖氣,但始終喺條街行多一陣都凍入心,呢個時候最適合做嘅事當然就係圍爐取暖啦!講緊圍住火鍋啊,食完成身暖哂又可以繼續周圍走或者安心返住宿點覺覺豬啦~而且我哋今次要為大家介紹嘅鍋物都絕對非汎汎之輩,想食特色嘢打卡嘅記得要收藏甚至預約返幾間啊!

Restaurantいちりん (新宿)




海膽控絕不能錯過!呢度嘅招牌海膽涮涮鍋好出名,深橙色湯底跟極新鮮肥美嘅蝦、帶子、白身魚同野菜配搭得極完美,海膽濃厚嘅味道同食材互相輝映,各自都精彩!而且Shabu Shabu完仲可以拎呢煲精華去煮雜炊,真係點可能唔滿足呢!不過又咁講,呢度嘅海膽涮涮鍋係唔會落肉嘅,但最貴嘅套餐入面仲有海膽茶碗蒸、超極濃海膽可樂餅、迷你海膽丼同炙燒和牛海膽,點都唔使擔心唔夠飽!只要從新宿三丁目駅行約3分鐘路程就搵到呢間ICHIRIN,而從大站新宿行過嚟都係約15分鍾~係咪好方便呢~~

Restaurantしみず (中目黑)


👆🏻SHIMIZU

👆🏻博多 華味鳥

提起雞&火鍋呢個組合,大家可能相對地會比較熟悉喺日本各地都有分店嘅「博多 華味鳥」,尤其係佢哋嘅選址大部份都相當方便,人生路不熟嘅話,嚟呢度的確係個好選擇!但如果問東京女子ssss最喜愛嘅火鍋店係邊間店,相信都有為數唔少嘅票數會投畀主打骨膠原滿滿嘅水炊地雞火鍋——「SHIMIZU」!BTW,喺度淥完新鮮野菜同肉肉肉,暖笠笠地沿住旺中帶靜嘅中目川散步返地鐵站都好浪漫~情侶們有得諗!


Restaurant鶏匠 たけはし (六本木)



呢度可以話係距離六本木之森 & 六本木駅都非常近嘅秘店,因為佢哋掛咗布簾喺外面,從外只能夠喺隙縫間窺探入面嘅用餐情況。但佢哋嘅赤雞親子丼及燉煮咗8小時以上嘅特製骨膠原雞湯火鍋好鬼正呢件事就唔係咩秘密。好多食客都話湯底味道極濃厚,強烈建議大家喺未添加任何食材之前乾一碗!當然,最後煮成嘅精華雜炊都唔好浪費啊!食哂火鍋配料又想再加點嘅可以揀雞肉刺身試試,如果係甜品控更加要記得叫埋自家製雞蛋布甸啊!


Restaurant北海道めんこい鍋 くまちゃん温泉 渋谷宮益坂店 (涉谷)




SNS上超高人氣、超可愛嘅札幌一人小熊鍋,已經喺2021年年末於東京開設分店,店內有大量熊熊裝飾,同本店一樣有勁多遊客同本地人朝聖,唔預約嘅話都幾肯定入唔到去!相信大家都知隻熊仔其實係湯底嚟,唔同顏色嘅熊熊分別係豆乳湯、雞骨膠原湯、純米吟釀味噌湯及擔擔湯等。店家都經常推出期間限定口味如明太子、番茄香草、咖喱,就算之前食過都一樣有新意!

Restaurant浅草一文 本店 (淺草)



用有70幾年歷史嘅古民居改建,坐喺入面食日本傳統料理就當然有Feel啦!呢度招牌菜係由江戶時代承傳至今嘅青蔥鮪魚 (吞拿魚) 鍋,調味以蔥、醬油同清酒為主,簡簡單單但充分帶出魚鮮,一齊煮嘅菜亦都入哂味。雖然都有唔少人認為大拖羅都係用嚟整刺身/壽司更好,但體驗吓不一樣嘅食法同味道都係旅行嘅樂趣嚟!

👉🏻繼續睇 圍爐取暖攻略🍲東京火鍋10選 (下)


關鍵字
東京
火鍋
鍋物
打邊爐
涮涮鍋
雜炊
新宿
淺草
涉谷
中目黑
六本木
海膽
骨膠原
養生
小熊鍋
打卡
豆乳
味噌
鮪魚
吞拿魚
OpenRice JP Editor
Provide the latest food trends and news in Japan.
餐廳資料
更多
收起
本月熱門
留下美麗與美味的回憶!2024花火大會
2024-06-20