梳乎厘班戟店FLIPPER'S登陸咗香港一排，相信大家都唔太陌生。招牌嘅「奇蹟之班戟」有聖誕版，叫「奇蹟之班戟 雪草莓 (1,400円)」。班戟厚度係平時嘅1.5倍，有兩塊，上面有忌廉芝士同大大粒士多啤梨。另外仲有每日限定20份嘅超限量「奇蹟之班戟 白雪草莓 (1,600円)」，升呢用咗「淡雪」白色士多啤梨，夠哂矜貴。
「奇蹟之班戟 雪草莓」供應期：12月15日－12月25日
「奇蹟之班戟 白雪草莓」供應期：12月11日－1月8日
「Accueil」喺唔少班戟排行榜都名列前茅，每逢聖誕推出嘅「聖誕樹班戟 (1,850円)」仲年年熱賣添。厚班戟分量唔少，有幾層，食落口感扎實兼彈牙。另外有色彩繽紛嘅雜果+成座山仔咁高嘅開心果忌廉，仲灑咗啲糖粉丫咁，節日氣氛爆燈，靚到唔捨得食。供應期為即日至12月25日。
(圖: アクイーユ)
嚟自夏威夷嘅「Eggs’n Things」絕對係日本班戟熱潮嘅引領者之一。今年推出兩款聖誕限定班戟，第一款「"HAUHAU"士多啤梨班戟 (1,680円)」將招牌忌廉變成開心果味，幾層班戟中間夾住新鮮士多啤梨，仲有濃郁嘅忌廉芝士喺面添。
第二款「"KOKOLEKA"雜莓班戟 (1,580円)」係朱古力味，食落有可可香兼帶微苦，拼埋士多啤梨、藍莓、覆盆子，同樣吸引。兩款班戟供應期為即日至12月25日。
(圖: Eggs’n Things)
BROTHERS Cafe目前喺大阪有兩間分店，憑住帶出食材原有風味嘅自家製班戟，成為大阪人氣Cafe。聖誕推出「白雪心太軟梳乎里班戟」，一切開就會有滑溜嘅白朱古力流出嚟，好特別！供應期為即日至12月尾。
Butter今年秋天推出「焦糖梳乎里班戟」，喺鬆軟嘅梳乎里班戟上面加咗一層香脆焦糖，口感獨特令佢旋即大熱。聖誕特別版(1,380円)多咗熱帶水果，配埋覆盆子雪榚同紅莓醬，味道清新。
另外「自訂口味派對班戟」亦係期間限定發售，有士多啤梨、棉花糖等16款配料俾大家自由組合。16揀10盛惠1,980円，有選擇困難嘅話不妨要哂16種，俾多600円就得。兩款班戟供應期為即日至12月25日。
呢度最出名就係招牌三層厚班戟，聖誕版(1,680円)嘅班戟以特濃朱古力醬整成，配埋cappuccino雪榚、開心果忌廉同士多啤梨，好豐富。供應期為即日至12月25日。