影片
電話號碼
06-6222-2010
獎項殊榮
米芝蓮二星餐廳 (2016-2023), 亞洲50最佳餐廳 (2018-2024)
營業時間
*[月～土] 18:00 start [土] 12:00 start
星期日
全日休息
以上資料只供參考, 請與餐廳確認詳情
相關文章
多得蕃薯Uncle每天都有細閱五份報紙o既習慣，每份仲要係由頭版睇到尾頁，中間大小專欄及廣告都唔放過嗰隻，方才知悉大阪有間抵食高質o既星級法國餐廳「La Cime」。肥肥家族飛去大阪旅遊喎，當然係要第一時間見識吓啦！從官方網站已清楚了解餐室午市只供一款8,500円o既九道菜餐單，晚市則一率為18,000円o既十二道菜餐單，另加稅。網上訂座流程由用餐日期一個月前開始，逢週日休息，小肥跟隨指示就輕而易舉地於一個月之前成功為午餐訂好位。負責人亦於二十四小內以電郵確認回覆，告知大廚會用節令食材烹調精美午餐，並問及各人有否對任何食物敏感，相當詳細，未到大阪已感其服務態度專業。由梅田出發，乘坐地鐵前往最接近餐店o既本町站只需約五分鐘，由車站行去餐廳再要八至十分鐘，個人覺得絕對方便。身為地舖o既西餐廳以不甚起眼o既黑白色作門面，室內亦無花巧o既裝潢，彷彿正要用極簡主義o既室內設計向貴客道出相等於「請留意美饌」o既訊息，有意思極！店子面積不大，但勝在樓底高，環境潔淨企理，簡單用上鮮花擺設已夠雅致，就連洗手間都寬廣舒適過人。四口子初次光臨「La Cime」，官仔骨骨o既經理哥哥眼見小肥手持相機，即友善地提點因店內有其他食客，希望細佬可喺不影響他人用餐o既情況下拍照，XO仔話哂都係醒字派，當然明白點做啦！餐桌上每個座位前面都有整齊o既餐具及當日o既精選餐單，另附一份飲品牌。食物早已喺訂座時選好，故大家只需點選飲品，當中可揀單杯美酒汽水、原枝洋酒、甚至可任由侍酒師即玩配酒添。家中以靚靚媽咪最識飲同最飲得，外遊都唔怕會飲醉嗰隻，所以只有佢一人玩6,000円o既「配酒套餐」。媽媽大讚餐廳所揀選o既香檳、紅酒、白酒、清酒同啲菜式相合得黎唔會互相衝突，而且質量絕非等閒之輩，價錢實為超值也！九道菜午餐先由鬼佬白蘿蔔所烹調o既馬卡龍前菜作序。由於細佬一早講定自己唔食得果仁類，自己嗰份師傅就冇放杏仁，即同家人嗰啲唔同。「鬼佬白蘿蔔馬卡龍」（White carrot & almond）鬆化潤滑得黎極之輕盈，以大大件假木高盤承載又增添份純樸，可謂美貌與美味並重。第二道「鯡魚刺身配蕎麥脆片」（Herring on the buckwheat chip）o既木盒擺盤同樣有種大自然feel。一口吃下富彈性o既鯡魚刺身及墊底超脆o既蕎麥脆片，脆中帶韌o既同時又散發著清香微甜。冷盤最後一味為色彩鮮黃o既「烏賊拼日向夏伴烏魚子」（Squid & citrus fruit with dried mullet roe）。半透光o既烏賊粒粒質感爽柔，以清新o既日向夏及鮮濃o既烏魚子點綴調味已夠芬芳醒神。進入第二段o既熱食環節，即由靚仔經理續一喺面前為「牛尾伴帶子及椰菜花」（Oxtail with Scallop & Cauliflower）淋上熱熱o既忌廉汁，於碟子上繪出一幅精美o既食物圖。藏喺椰菜花幼絲下o既牛尾極之軟腍，連同乾巧脆薄o既椰菜花、香脆惹味o既瑤柱碎及濃滑o既忌廉汁食，口感有層次得黎味道非常和諧。接著o既「醃煮鮑魚伴香草蓮藕及香薯」（Abalone sauter with lotus root & apios）係咁多味最綠色o既一款，當中鮑魚鮮甜厚潤得黎帶陣陣香草o既氣色，都幾得意。試問法國大餐又點可以少舊魚呢，何況仲係兩星名法國料理o既「La Cime」？！「簾鯛魚配蕗薹及乳酪汁」（Yellow Grouper "Aohata" with mountain vegetable & yogurt sauce）以鮮綠o既蕗薹菜汁唧成葫蘆邊界綑著簾鯛魚件，菜式o既外表實在吸睛。厚身o既簾鯛魚肉白滑幼嫩，輕巧o既乳酪泡沫剛好提升鮮度，效果極之簡潔！整頓午餐以主菜「奄美大島島豚伴黑大根及黑米」（Pork from "AMAMI Island" with black radish & black rice）最為鮮紅艷麗。原來奄美大島正正係主廚o既家鄉，唔怪得知主角會選以鄉下盛產o既靚豬烹調。煮至粉色o既豚肉不單肥瘦均勻，而且爽口彈牙，兼肉汁豐盛，師傅以微酸o既醬油及黑米點亮即減低膩感，可其精妙！最後輪到甜品出場啦！打頭陣o既「金柑果盤拼生薑風味白色乳酪」（Compote kumquat with ginger flavored fromage blanc）外觀已夠橙光閃閃，亮麗晶瑩，入口更覺清甜爽潤，芳香柔滑。味蕾以微涼o既金柑及乳酪洗滌一番後，即由「暖焗朱古力批拌酒粕櫻花雪葩」（Warm chocolate in baked pie with "Sakura" & "Sakekasu" sorbet）接棒。呈球狀o既朱古力批外脆內軟，可可味香濃得黎完全唔會過甜，塗上清涼清新o既酒粕櫻花雪葩未有互搶之餘，仲出奇地各自為對方突出其獨有o既香氣，極之神奇！法式九大簋以精美o既法式小點配餐茶或咖啡劃上完美o既句感嘆號！非常感激蕃薯Uncle良好o既閱讀習慣，讓肥肥家族認識到環境優雅，服務貼身o既大阪星級餐廳「La Cime」，並有幸品嚐到一系列以日本高質食材烹煮o既超值潮派法式料理：「おおきに」（此乃關西感謝款待之語句也）！
繼續閱讀