【隨時更新】日本小編開箱!2019年必試便利店新品速報
2019-02-28

去日本玩嘅指定動作,當然就係去便利店尋吓寶啦~日本小編嚟緊每星期都會𥄫實便利嘅新商品情報,一有值得推介嘅必試item,就會親自開箱試食,喺呢度同大家分享。以後黐實呢篇速報,就唔怕返鄉下錯過好東西啦!

※↓2019年2月26日發售新品推介↓※
LAWSON - 
多啦A夢和菓子 (連稅各280円)



日本卡通和菓子又有新系列,今次主角係多啦A夢啊!有普通版吉士口味,同心心眼版士多啤梨口味,心心眼嘅多啦A夢仲拎住封情書,真係可愛到唔捨得呀!現正於LAWSON期間限定發售中。 

FamilyMart - 樂天流心朱古力雪糕批 (連稅194円)

人氣甜品樂天朱古力批今個星期推出雪糕版。除咗有朱古力批最經典嘅鬆軟三文治皮,中間仲有雲呢拿雪糕同埋流心朱古力添。現正於全國FamilyMart優先發售中,數量限定㗎。

※↓2019年2月19日發售新品推介↓※
LAWSON - Hello Kitty
蒸包 (連稅200円)



為紀念Hello Kitty誕生45週年推出嘅新品。配合返Kitty最鍾意食蘋果批嘅設定,內餡係蘋果及吉士忌廉混合成蘋果吉士口味。現正於全國Lawson期間限定發售中,數量有限,售完即止。 

全國便利店期間限定發售 - Häagen-Dazs Decorations  抹茶芝士曲奇 (連稅324円)

日本Häagen-Dazs加入曲奇脆脆嘅Decorations系列出咗兩款新口味。「抹茶芝士曲奇味」結合咗茶香味濃郁嘅抹茶雪糕、creamy嘅芝士蛋糕味雪糕,仲有香脆嘅抹茶曲奇同芝士曲奇做toppings,保留到抹茶同芝士蛋糕各自嘅風味之餘亦非常夾。於全國便利店期間限定發售中。

全國便利店期間限定發售 - Häagen-Dazs Decorations  杏仁焦糖曲奇 (連稅324円)


另一款Häagen-Dazs Decorations新口味係杏仁焦糖曲奇。奶油糖味雪糕配上微苦嘅焦糖醬,toppings係切碎嘅杏仁同牛油曲奇。牛油焦糖雪糕味道濃郁,杏仁片食落亦有杏仁香。建議撈埋一齊食就可以食到多重口感啦。

※↓2019年2月12日發售新品推介↓※
全國便利店期間限定發售 - Starbucks®櫻花朱古力配士多啤梨啫喱 (連稅219円)


今個星期便利店有限定嘅Starbucks飲品,白朱古力及牛奶結合咗櫻花香味,入面仲加咗士多啤梨啫喱,令口感更豐富,仲充滿咗春日氣息添。全國便利店期間限定發售中。

全國便利店期間限定發售 - Mike popcorn 生蛋撈飯味 (連稅113円)

Sanrio人氣角色蛋黃哥同Mike Popcorn合作推出咗「生蛋撈飯味」爆谷。醬油風味同雞蛋柔和嘅甜味夾得啱啱好。蛋黃哥主題包裝都係亮點之一。同樣於全國便利店期間限定發售中。

FamilyMart - KEN'S CAFE TOKYO 朱古力飲品 (連稅198円)


以朱古力蛋糕馳名嘅RestaurantKEN'S CAFE TOKYO監修嘅呢款牛奶朱古力飲品,用北海道鮮忌廉製成,飲落有濃郁嘅可可味,隱約有少少紅糖味,唔會死甜。全國FamilyMart期間限定發售中,數量有限,售完即止。



※↓2019年1月22日發售新品推介↓※
全國便利店期間限定發售 - Häagen-Dazs 車厘子吉士批雪榚 (連稅294円)


日本
Häagen-Dazs新推呢款車厘子吉士批口味雪榚,車厘子醬當中加入Kirsch車厘子白蘭地提升香味,同吉士雪糕夾埋酸甜平衡,裡面仲有餅碎增加口感。

LAWSON - Hello Kitty、My Melody和菓子 (連稅各280円)

日本Lawson便利店今期搵到呢款咁可愛嘅和菓子,Kitty係蘋果味而Melody係士多啤梨味,各259円。各位Hello Kitty同My Melody嘅Fans唔好錯過啦。


※↓2019年1月15日發售新品推介↓※
7-11 GODIVA The Tablet 白朱古力宇治抹茶味 (連稅348円)


日本7-11獨賣嘅GODIVA The Tablet系列出咗新嘅「白朱古力宇治抹茶味」。用甜味溫和嘅京都宇治抹茶白朱古力,包住內裡嘅宇治抹茶Ganache朱古力。口感幼滑之餘仲食到宇治抹茶嘅醇厚風味。現正於全國7-11期間限定發售中。


全國便利店期間限定發售 - 明治Essel Super Cup 紅茶曲奇雪糕 (連稅140円)


高人氣兼高CP值嘅明治Essel Super Cup雪榚第一次推出呢款「紅茶曲奇味」。紅茶雪榚食落好似奶茶味,幼滑香濃。入面仲加入咗大小不一嘅紅茶曲奇碎,富茶香味亦令到口感更豐富。全國便利店期間限定發售中。

※↓2019年1月8日發售新品推介↓※
LAWSON - 士多啤梨卷蛋 (連稅230円)

今個星期各間便利店都推出唔少士多啤梨甜品。第一款要介紹Lawson嘅士多啤梨卷蛋,唔單止製作海棉蛋糕同忌廉嘅時候使用更多士多啤梨,蛋榚中間仲有士多啤梨醬同半粒士多啤梨,完美配搭出恰到好處嘅甜味及清爽酸味。現正於全國Lawson期間限定發售中。

LAWSON - 士多啤梨芭菲 (連稅350円)


第二款係Lawson嘅士多啤梨芭菲,入面有士多啤梨mousse、海綿蛋糕、有果肉嘅士多啤梨醬等,口感豐富。小編特別欣賞其中嘅士多啤梨牛奶醬,甜味適中而且有奶香。同樣於全國Lawson期間限定發售中。


FamilyMart - 士多啤梨麻糬包 (連稅135円)


FamilyMart今期有兩款士多啤梨麵包,呢款士多啤梨麻糬包食落煙煙韌韌,入面仲有適量嘅士多啤梨忌廉。至於外面就有一層士多啤梨朱古力,撒埋士多啤梨糖片及餅乾碎,賣相搶眼。全國FamilyMart期間限定發售中。

FamilyMart - 士多啤梨牛角包 (連稅138円)



第二款要介紹嘅FamilyMart新出品係士多啤梨牛角包。單睇賣相好似冇乜特別,但食落都有牛油香,餡料係士多啤梨醬及士多啤梨朱古力。同樣係期間限定發售中。

7-11 士多啤梨忌廉及鮮忌廉銅鑼燒 (連稅199円)

而7-11推出嘅士多啤梨甜品,就係呢款融合日式及西式風格嘅銅鑼燒。銅鑼燒嘅餅皮有蓬鬆嘅口感,而且唔會乾噌噌。夾心餡嘅主角係酸甜嘅士多啤梨忌廉,仲有少少幼滑鮮忌廉增加層次。現正於全國7-11期間限定發售中。



關鍵字
日本
遊日
美食
最新
必食
期間限定
甜品
零食
便利店
7-11
Lawson
FamilyMart
2019
2月
1月
2018
12月
開飯編輯
熱愛日本流行文化的開飯小編會致力為大家追蹤最新、最豐富的美食資訊!
餐廳資料
更多
收起
本月熱門
必睇實物大高達!東京台場DiverCity Tokyo購物中心
2019-09-27
日本小編精選京都三大溫泉推介
2019-09-29