ブラザーズカフェ　なんば店 (已結業)

雖則入住「Fraser Residence Nankai」包哂早餐，無奈家人都話試過一次就唔會再返轉頭，所以喺大阪第二日就決定喺附近一家咖啡屋「BROTHERS Cafe Namba Store」度食個西式早餐，先出發去神戶一天遊。於咖啡店門外可見主打班戟之黑板餐牌。店子樓底高高，感覺就好似個大客廳咁，輕鬆寫意。洋式嘅裝潢簡潔企理，窗邊單人座位好似張書枱般咁有詩意。多頁餐牌中日對照，並附有彩圖，簡單易明。餐具全為自助式，並清楚列出免費上網資料。哥哥叫咗個香濃鬆脆嘅芝士四重奏多士早午餐「Quattro Formaggi Toast」，除咗沙律、薯條，980円仲包埋杯飲品，十分豐富。Chocolate Banana Pancake（1,080円）：嗜甜嘅XO仔就要咗個招牌朱古力香蕉班戟。三塊薄薄嘅班戟熱辣香軟；旁邊嘅焦糖香蕉外脆內腍，極之清香；連同香滑嘅忌廉、朱古力醬及粒粒朱古力碎包住黎食，超呀！另加300円要咗杯香滑清涼嘅凍咖啡。大阪咖啡室「BROTHERS Cafe Namba Store」格調溫馨，服務生友善有禮，全天供應之多士班戟又靚又好味，個人誠意推介。