無論係搭紅眼機搞到夜一夜先有得食飯又好、行景點買嘢買到唔知時間又或者純粹只係好似小編我咁唔想錯過每樣美食都好~要知道就算係再繁華嘅大阪都有好多餐廳喺9點前就Last Order😔 唔想晚晚最後都要拉麵酒吧二選一，不如睇下呢5間於熱門住宿地點附近又開到深夜嘅店舖有冇啱心水嘅，一於食到天昏地暗！食飽飽一定更好瞓㗎啫，你話係咪呀哈姆太郎？！
鉄板神社
睇個名以為係鐵板燒？佢其實係鐵板串燒居酒屋🍺嚟，師傳會用鐵板嚟煎串燒㗎！穩陣派可以叫招牌煙肉蘆筍卷、燒蝦多士或者蟹膏燒帆立貝~而相對少見嘅款式呢度有好似芋角嘅炸蟹卷、入口脆卜卜嘅子持蒟蒻、一口蛋包鰻魚卷同堂食限定甜品——熱甜薯配凍雪糕🍦 (名為花火)！價格每串大約為250円左右。
營業時間方面，佢喺大阪一共有6間分店，大部分都係開到凌晨4點！而當中只要喺心斎橋駅6號出口行6分鐘就到嘅三津寺笠屋町店更係開通宵到第二朝8點！
焼肉たまき
試諗吓同朋友去間氣氛好嘅燒肉店，一邊燒住香噴噴嘅和牛🐮一邊吹水吹通頂係咪的確好極先？呢間收凌晨5點嘅餐廳雖然話就話距離中崎町駅最近 (1分鐘距離)，但由梅田嗰邊行過去都係15分鐘內嘅路程，計返上上落落車站時間相差唔多！
Source
咁點解要揀呢間而唔食放題先？因為呢度座位唔多又喺抖音、IG等社交媒體上有好高討論度，本身正常晚飯時間勁難有位，深夜過嚟食到佢哋招牌炙燒A5莎朗TKG(生蛋拌飯🍚；1,780円)、罕見嘅生食和牛牛肝(1,380円)同齋睇樣都見到油脂雪花紋勁靚嘅幻之霜降牛舌 (2,300円)真係可以話功德圓滿喇~
喜多郎寿し
在 Instagram 查看這則帖子
夜媽媽唔想食咁多肉肉肉？冇問題！食清爽嘅壽司啦~喜多郎又係多多分店，大部分都至少開到凌晨3點，近心齋橋美國村嗰間仲開到凌晨5點，住附近譬如話係大阪CROSS酒店、MIMARU大阪難波NORTH酒店真係行幾步路就到！呢度賣點除咗開得夜、啲店主店員好熱情之外仲有抵食！！！大部分壽司🍣一碟兩件都係280円咋！仲要唔係得魷魚、三文魚、甜蝦呢類大路嘢，連一條過鋪上面嘅明太子壽司 (唔係軍艦！)、金目鯛、三文魚籽、煮穴子同海膽呢啲都係均一價！留意返另一間心齋橋店唔知係咪租貴係會收330円一碟，想食平少少就行多兩步或者乾脆去難波 / 東梅田嗰邊啲分店啦~
雖則話去大阪冇規定一定要食大阪燒，但食親都有得玩又有得食，再加上又係大人細路都鐘意嘅味道，作為宵夜都真係冇得輸！呢間千日前分店開到凌晨5點，入面裝修風格似昭和年代日式民居，但嘢食就明顯唔係走傳統路線，好似上過電視嘅巨乳燒 (明太子X自家製蛋黃醬X豚肉X麻糬；1,738円)同啱哂心多多嘅人叫嘅迷你6種/9種大阪燒就(1,188円起)就又適合打卡📸又可以開心些牙。
元祖 味穂
在 Instagram 查看這則帖子
在 Instagram 查看這則帖子
想輕輕地點個心，擔心以上餐廳份量太大食唔哂嘅就嚟呢間名店啦~章魚燒、關東煮🍢、炒麵、蛋卷都有得食~當中關東煮入面嘅煮大根(白蘿蔔)同浸湯食嘅明石燒，入口濕潤又唔大份，就算胃口一般般都可以輕鬆KO！味穗都一樣係開到凌晨5點，大部分時間入面都好熱鬧。亦都可能因為客人多同營業時間長，大家要俾多少少耐性啊！
由於新型冠狀病毒疫情持續，營業時間和休息日可能與OpenRice網站所記錄的有所不同，出行前請先與到訪地點確認。