南禅寺参道 菊水

營業中

休息中

表弟嘅婚宴派對於京都「南禅寺参道 菊水」舉辦，雙方家人全入住酒店僅有嘅六間房內，所有儀式、晚餐及舞會均於店子不同區域進行，明顯做慣一條龍服務。建築物貌似一座和風別墅般，室內嘅裝潢帶有襌味得黎同時亦流露出時代感。下午三點一對新人先於室外嘅日式庭園行禮，綠意盎然，氛圍極之浪漫。池塘仲有大條靚靚嘅錦鯉送上祝福，倍添詩意。禮成影完多輪相相後，第二、三節嘅斟茶及雞尾酒會就移入室內進行，提供嘅兩款招牌雞尾酒刻意用上兩位新人起名。只可惜配上嘅送酒小食色澤低沈且乾硬無味，賣相同味道一樣不甚討好。晚餐及舞會設於樓上有舞台及可化身為舞池嘅宴會廳內。進場時，每人先獲贈一盒紀念糖果。宴會大廳寬敞開揚，餐桌都擺有美艷嘅鮮花，佈置高雅大方。席上可見齊備嘅餐牌、自用筷子及酒杯。據悉，八道菜餐單乃鎮店之懷石料理，菜式由星級廚師安排，當真令人期待萬分！飲品項目同樣共有八款，半數為酒酒，唯獨冇XO仔獨愛嘅香檳。行到去酒吧區發現，威士忌竟然係四升膠樽裝，小肥一向唔好威水，單憑外表只覺此酒極大機會係上頭牌！祝肴：晚餐以日本文化中寓意著祝福嘅鯛魚作序。鯛魚波波以橙綠色嘅菜菜紥出，並以金箔點綴，砌到好似日式傳統賀卡咁，有意思極！