高人氣拉麵店「本家 第一旭 たかばし」創業50幾年，每日都吸引唔少食客慕名而至，門口長期大排長龍。拉麵清一色係醬油系湯頭，最多人點嘅「特製拉麵(850円)」有大盛麵、叉燒同九条蔥，直身嘅中幼麵配埋清爽系湯頭，食落有蔥香亦唔會太鹹。另外一碟有6件嘅餃子都只係250円，叫埋一齊食就大滿足啦。
新福菜館 本店
呢間拉麵店喺正「本家 第一旭 たかばし」隔離，同樣係京都具代表性嘅拉麵店之一。醬油系湯頭以雞骨同豬骨熬成，顏色呈深褐色，睇落好似好鹹，但其實食落有醬油香之餘，鹹度都啱啱好。同彈牙嘅中粗麵、薄切叉燒好夾。鐘意食辣嘅朋友仲可以加少少店家秘製辣醬添。呢度嘅炒飯同樣出名，不妨叫碟嚟試吓。
Source
Source
麺屋 極鶏
「極鶏」主打超濃厚嘅雞白湯拉麵，最特別係湯頭「杰」身到好似糊仔咁。招牌嘅「原味濃厚雞白湯底拉麵 (950円)」就有厚切叉燒、粗麵、粗身筍乾同埋帶少少辣勁嘅蔥花，食落非常濃郁唔油膩又有肉香。除咗原味拉麵，仲有「赤だく (原味湯底+唐辛子調味粉)」、「黑だく (原味湯底+黑蒜醬)」及「魚だく (原味湯底+魚介醬)」以供選擇。
俺のラーメンあっぱれ屋
餐廳位於城陽市，遠離京都旺區亦唔近車站，絕對講唔上就腳，但仍然無損佢嘅人氣同高評價，仲係好多京都拉麵排行榜Top 3常客添。
招牌「こくまろ塩ラーメン (750円)」嘅鹽系湯頭用魚介及豬骨熬成，配上扁麵同好香黑胡椒味嘅叉燒，食落清爽亦充滿鮮味。如果想試豬骨味更濃郁嘅湯底，推介可以叫個「濁とろ塩ラーメン(900円)」。至於每日限定20碗嘅沾麵「スーパーつけ麺 (1000円)」，鹽系湯頭同彈牙煙韌嘅粗麵好夾，日日都吸引好多食家晨早去排隊，通常一開門就賣哂。自認係資深拉麵控嘅話，不妨搭多幾程車去試吓。
呢間人氣餐廳以京都古民宅改建而成，主打大腸拉麵，而且定價親民。招牌沾麵「もつつけ麺(900円)」有兩種麵條俾大家選擇，分別係全粒粉(※)麵條同口味清新嘅柚子麵。沾麵係雞湯同魚介混合攪拌而成，味道濃郁而鮮香，配埋蒜苗同燒蔥白一齊食口感仲更豐富添。唔食內臟嘅話都可以試試「和牛そば(900円~)」，黑毛和牛肉嚟㗎，CP值好高。
※「全粒粉」意思係以整粒小麥磨製成嘅麵粉