「巨量美食」一直係日本飲食界嘅人氣範疇，款款賣相震撼，而且五花百門乜都有。小編今次就搜羅咗東京5間人氣「巨量美食」餐廳，各位進撃的餓底準備好去日本挑戰未？
呢間位於銀座嘅居酒屋，最受歡迎嘅菜式絕對係「名物 船上めし」(小盛2480円、中盛2980円、特大3980円)。飯上面有北海道知床產嘅三文魚子，每粒都圓碌碌、新鮮有光澤，日本食家仲用「寶石」去形容添。店員每潷一殼三文魚子，都會喝一聲「Yoisho！」，勁有居酒屋熱鬧嘅氣氛，仲會潷到三文魚子滿瀉先停手，仲唔係未食先興奮？
【もうやんカレー】係一間主打咖哩嘅連鎖店，最受歡迎嘅係同名咖哩飯，除咗揀選食材有要求，仲係日本業界首推嘅無麩質咖哩嚟添。
大忍具分店更推出巨量咖哩飯「FUJI盛り」，係普通size嘅5倍份量！啲飯堆到成座富士山咁，連咖哩嘅配菜都零舍多。成班人開心share又得，獨遊嘅大胃王想挑戰亦得。不過要留意餐廳謝絕大嘥鬼，寫到明唔可以食剩（歡迎打包），自認小鳥胃嘅話都係叫返普通size好啲啦~
(圖:餐廳官網)
呢間主打牛扒嘅餐廳對肉嘅種類、燒烤嘅方法、調味醬汁都好講究，務求令所有牛魔王可以食到最原汁原味嘅好滋味。而秋葉原店限定嘅「3磅鐵板牛肩胛肉扒」一直吸引唔少勇士挑戰，食家話產自墨西哥嘅牛扒脂肪分佈得幾平均，切開有肉汁，食落嫩滑唔太韌。嗌個套餐嘅話，仲有1磅白飯跟餐免費任裝，沙律都任食㗎！
客人可叫份3磅鐵板牛扒一齊share，但每位至少要order一樣嘢（飲品亦可）。萬一食唔哂都歡迎打包。
呢度賣巨量美食賣到出哂名，普通size白飯都竟然重約3500克，大碗仲重達約7000克，同其他餐廳完全唔同級數！
以午市套餐為例，唔駛1000円就有滿滿嘅白飯，仲有堆到山咁高嘅日式炸雞、炸薯餅、卷蛋、關東煮等小菜。而且味道一啲都唔遜色，炸雞外脆內嫩有肉汁，關東煮仲有家的味道添。白飯份量可以自己要求，如果驚連普通size都食唔哂，都可以嗌少飯嘅。
但要留意呢度謝絕客人叫份巨量美食之後齊齊share，而且每位客人至少要order一樣嘢。同行有大胃王可以包底嘅話不妨挑戰！