一向被本地同外地遊客視為高級血拼熱點嘅銀座，其實隱藏住好多高級食舖同日本文化打卡嘅地點。 喺五光十色嘅銀座中央通嘅裡頭，就已經有幾十間的的色色嘅高尚酒吧同料理屋。
吉澤
其中一間值得介紹嘅餐廳叫做「吉澤」，係專食壽燒牛火鍋同埋ShabuShabu嘅專門店。吉澤位於中央通嘅過幾個街口，如果你唔識呢間舖頭，好可能會錯過咗佢非常樸素嘅門口！雖然吉澤有提供¥1,500 到 ¥2,800 不等嘅午餐menu，但最有日本風味、最值得一試嘅係佢哋嘅course menu。
食得course menu就梗係食佢哋最出名嘅壽燒牛火鍋course 啦！呢個course一定要訂位，因為一食呢個course，就包埋你坐tatami 獨立房... 都不特止呀！喺你面前仲會有一個著住和服嘅廚師媽媽由頭到尾為你炮製頂級壽燒牛。
喺吉澤，除咗視覺感受一流之外，你嘅味覺將會面臨前所未有嘅刺激！吉澤用嘅牛，全部都係三重縣頂級松阪牛。一塊塊脂肪比例完美嘅和牛，一放入口基本上已經溶化喺甜甜地嘅壽燒汁裡面。
日本人追求完美，所以除咗食之外，睇住廚師媽媽點樣裝飾你嘅細碟都會令你大開眼界。
銀座吉澤姊妹店
日本出名有多個二百幾種味嘅Kitkat，仲喺日本各地佈滿Kitkat朱古力工房，但係銀座嘅呢一間工房仲有埋cafe 位，比你嘆盡KitKat 可以帶黎既樂趣。
喺吉澤食完飯，行過幾間舖頭已經會到達Kitkat朱古力工房。喺嗰度你唔會搵到普通嘅Kitkat，因為喺嗰度賣得嘅，全部都係特別版Kitkat，由長度、到topping都係日本名甜品師傅高木康政一手打辦。
朱古力工房嘅2樓就係Kitkat Cafe。喺嗰度除咗可以搵到Kitkat 瑪德蓮蛋糕之外，遊客仲可以設計自己專有嘅Kitkat。呢間cafe 因為人氣爆燈嘅關係，越早去嘅話越著數！
如果你想感受日本嘅舞台文化嘅話...
喺2017年4月，殿堂級「能」歌劇嘅觀世能樂堂新鮮滾熱辣搬入到擁有241間高級名牌舖頭同埋4000平方米嘅空中花園嘅Ginza Six地牢。由14世紀開始廣傳嘅「能」歌劇，特別之處在於主角全部都係戴住面具出場嘅。呢種歌劇，最近更被納入為UNESCO無形文化遺產。
「能」歌劇叫得做歌劇，就當然有台詞啦！不過未睇過「能」歌劇嘅朋友唔使擔心語言不通，因為好多故事情節都可以由身體語言傳達出嚟。
喺銀座中心點睇「能」歌劇，一定要提早喺網上買飛！同埋記住要開show前提早30分鐘到達會場，如果唔係就要排好耐隊㗎啦！