去日本玩嘅指定動作，當然就係去便利店睇吓有冇好東西食啦~尤其係便利店嘅甜品，出名款式多、品質高、味道好，CP值超高。今個夏天3大連鎖便利店都出咗新甜品，日本小編就大推以下幾款喇，仲親身試食𠻹。即睇第一身報告！
大熱嘅7-11純白泡芙系列「しろもこ」，喺今個夏天推出咗全新口味。忌廉芝士加上檸檬汁整成嘅芝士mousse，口感幼滑細膩。檸檬汁嘅微酸令味道更清爽，食到芝士味但唔會膩，甜度仲啱啱好。至於麵皮就柔軟煙韌，mousse餡有圖有真相，多到滿瀉。難怪日本食家都話佢係「幻之甜品」，成日一上架就被秒殺。
【Häagen-Dazs『ジャポネ<ダブル抹茶~練乳黒みつ~>』】
(7月4日發售 / 含稅360円)
咦，哈根大師，又係你呀？！Häagen-Dazs同7-11共同研發嘅「ジャポネ (Japonais)」系列已經嚟到第8擊，新口味最上面嗰層係滿滿嘅黑糖漿，之後係濃郁嘅抹茶雪榚、煉奶醬、抹茶雪葩共4層。小編覺得食落有啲似食緊高級和菓子咁，而且茶味唔假，抹茶控必試。
FamilyMart今年夏天推出嘅甜品以抹茶為主。呢杯芭菲嘅抹茶mousse用咗京都宇治抹茶整成，仲有北海道產嘅紅豆蓉、富茶香嘅焙茶忌廉、微甘嘅栗子忌廉，每種都食到本身嘅獨特風味。潷到底原來仲有驚喜，係一層綠茶啫喱嚟。成杯芭菲名副其實，好和風。
【丸永製菓 もち入り あいすまんじゅう 八女抹茶】
(7月4日發售 / 含税150円)
「あいすまんじゅう」呢個牌子係日本雪榚界嘅長青樹，由1962年發售起一直都咁暢銷，今年仲推出FamilyMart限定版𠻹。雪榚材料選用咗福岡縣產嘅八女抹茶，入面有紅豆同煙韌嘅白玉糰子。一啖食落去食到抹茶同紅豆嘅甜味，風味平衡得唔錯，白玉糰子仲令口感更豐富。支雪條唔算好大支，不過因為味道都濃郁又足料，所以份量可以話係啱啱好。
【辻利 抹茶氷フロート (辻利 煉奶雪榚抹茶雪冰)】
(6月中旬發售 / 含税198円)
FamilyMart同「辻利」共同研發嘅獨家限定雪冰。一打開，嘩，上面鋪滿哂紅豆，下面有抹茶雪冰同煉奶雪榚。紅豆粒粒分明，而且唔太甜；抹茶雪冰茶味濃，仲有啲回甘，同煉奶雪榚嘅甜度都幾夾，係一款食完清爽無負擔嘅甜品。
【Uchi Cafe SWEETS × GODIVA 朱古力布甸】
(7月4日發售 / 含税320円)
LAWSON自家甜品品牌「Uchi Cafe Sweets」同GODIVA嘅聯乘甜品，上個月一推出就熱賣，今個月乘勢推出第2擊！布甸唔係話好大杯，但口感軟滑，入口即溶勁creamy，朱古力味仲好香濃。布甸上面嘅朱古力粉仲有點睛嘅作用，令風味更突出，味道層次更豐富。朱古力控／GODIVA迷必食。
【もちふわチーズ大福〜kiri®クリームチーズ使用〜】
(7月4日發售 / 含税125円)
「Uchi Cafe Sweets」同人氣忌廉芝士品牌「kiri®」合作推出呢款大福，一上架就成為話題。餡料份量如圖示，並唔係空氣大福，kiri®嘅忌廉芝士仲佔咗餡料成份嘅70%㗎！小編覺得同上面介紹嘅7-11「しろもこ」比起嚟，呢款芝士味濃郁啲 (7-11嗰款就清爽啲)，芝士控可以揀呢款嚟試吓。
睇埋其他【暑期企劃】特集，plan行程零難度！ |