日本全國丼飯聯盟自2014年起，每年都會舉辦「全國丼飯大獎賽」，分咗海鮮丼、天婦羅丼等10個組別，選出各組別嘅王者。上篇小編就精選咗東京嘅6間金賞丼店（👉東京篇傳送門），今次一於睇埋大阪・京都篇啦，有餐廳仲有優惠券添㗎！

▼最受歡迎嘅中拖羅刺身雙拼丼，飯上面一半係中拖羅，一半係吞拿魚肉（有啲仲火炙過），刺身鮮味啖啖肉，拖羅嘅魚脂啱啱好，夠哂甘香。

呢度朝早一開門就派飛，數量有限而且丼飯賣哂就閂門。據講最近通常下午就休息，想試嘅話建議10點半前就到餐廳排隊攞飛。

延伸閱讀＞＞蟹道樂以外 大阪五大食蟹好去處

呢間人氣店主打日本國產牛扒丼，每日限量供應100碗，牛肉煮到三成熟，口感滑嫩有肉汁，而且定價親民，普通碗賣1,080円。怕唔夠食可以加錢升級成2倍肉、3倍肉，或者飯大盛、特盛、特大盛。除咗牛丼，仲有牛肉定食同漢堡扒定食添。

餐廳朝早9點半開始派飛，數量有限。客人拎飛時可以揀入座時間，唔使喺門口呆等。但要留意呢度每日賣完就閂門，唔少食客話就算係平日，下午已經開始休息，晚市唔營業，想試嘅朋友最好一早去攞飛啦~

【大阪】祭太鼓

創業於1983年嘅【祭太鼓】主打炸豬扒丼(530円起)，除咗常見嘅滑蛋炸豬扒丼，呢度最出名嘅其實係啲首創款式，好似「蛋黃醬泡菜炸豬扒丼」、「白蘿蔔蓉炸豬扒丼」、「蕃茄炸豬扒丼」等。

炸豬扒丼嘅點餐方法同樣特別，首先要揀普通或特上豬扒，之後揀要一塊肉或兩塊肉，最後揀要定食或套餐(單點亦可)。

【大阪】はり重 カレーショップ

「はり重」本身係壽喜燒同Shabu Shabu嘅老字號，而呢度就係旗下一間主打咖哩嘅餐廳。最受歡迎嘅要數名物牛丼「ビーフワン (Beef One，800円)」，用咗高品質嘅國產和牛肉、雞蛋製作而成，就連洋蔥都新鮮爽脆。調味嘅牛汁亦唔會過甜，唔會蓋過牛肉嘅肉香，仲令味道更有層次。

(圖: 官方網站)

【大阪】龍の巣  (👉餐廳優惠券)

呢間人氣燒肉店除咗提供高質素燒肉，仲有必食名物「かす(※)烏冬」同「かす(※)滑蛋丼(600円)」。烏冬湯頭用鰹魚熬煮而成，清甜鮮味，而滑蛋丼嘅蛋煮到恰到好處，蛋黃仲有啲流心，香口之餘唔油膩，鐘意食內臟嘅朋友必試。

※かす：發祥於大阪。將幼切嘅牛小腸油炸，以帶走多餘嘅水分及脂肪，係高蛋白質、高骨膠原、低脂肪嘅美食。