嚟到11月，又到咗去日本追楓嘅時候啦。日本小編今年為大家介紹當地人必遊嘅京都絕佳景點，仲有周邊嘅期間限定甜品推介，靚景加美食肯定呃爆Like，出發前一於睇定兼Bookmark喇。
【南禪寺】
在京都眾多寺院當中深受遊客喜愛嘅南禪寺，寺院範圍內約有300棵楓樹，秋季時寺院會被漫天紅葉染紅。 而日本三大門之一嘅富山門（日本重要文化財產）與明亮嘅秋葉之間嘅對比，係京都秋季特有嘅美景。 除此之外，擁有兩個優美庭園嘅天授庵晚間會有特別亮燈，不容錯過。
(圖: 南禅寺 / flickr)
【交通】：地下鐵蹴上站步行10分鐘 / 巴士站「南禅寺・永観堂」下車步行10分鐘
【參觀時間】：<3月至11月> 8:40－17:00 / <12月至2月> 8:40－16:30
【入場費】：南禪寺免費 (天授庵：日間500円；夜間特別亮燈600円)
【最佳紅葉觀賞期】：11月中旬－12月上旬
【夜間特別亮燈】：有 (天授庵: 即日至11月30日，17:30－20:45)
【將軍塚青龍殿】
將軍塚青龍殿係位於京都東山山上嘅天台宗青蓮院門跡，於2014年10月整修完成。殿旁邊設置咗一個大平台，可以從東山山頂居高臨下盡覽京都市內景色。除咗紅葉，遊客亦可欣賞將軍塚旁邊枯山水庭園嘅景致。
【交通】：地下鐵蹴上站下車，轉乘往將軍塚青龍殿之京阪巴士／
巴士「五条坂」站或「四条河原町」站下車，轉乘往將軍塚青龍殿之京阪巴士
【參觀時間】：9:00－17:00
【入場費】：500円
【最佳紅葉觀賞期】：11月中旬－12月上旬
【夜間特別亮燈】：有（即日至12月3日，18:00－22:00）
【寶嚴院】
寶嚴院位於嵐山人氣景點「天龍寺」旁邊，每逢秋天都吸引無數本地及海外遊客入場賞楓。院內庭園「獅子吼の庭」一年一度嘅夜楓亮燈非常有名，特別嘅燈光配上鮮艷嘅紅葉，有如置身夢幻仙景一樣。
(圖: jorudan)
【交通】：嵐山站步行10分鐘 /
京都市巴士「嵐山天龍寺前站」下車 或 京都巴士「京福嵐山站前站」下車步行5分鐘
【參觀時間】：9:00－17:00
【入場費】：庭園500円（夜間入場費600円）
【最佳紅葉觀賞期】：至11月下旬
【夜間特別亮燈】：有（即日至12月3日，晚上17:30－20:00）
【東寺】
世界遺產東寺係賞楓聖地相信唔少人都知，而講到入面最佳影相靚位，絕對係日本國寶「五重塔」同塔前嘅放生池一帶，隨手舉機一影都靚到好似幅畫咁。
(圖: The NEXT DOOR LE9)
【交通】：近鐵東寺站步行10分鐘 / 京都站步行15分鐘
【參觀時間】：5:00－17:00
【入場費】：免費（參觀夜間特別亮燈：1,000円）
【最佳紅葉觀賞期】：11月中旬－12月上旬
【夜間特別亮燈】：有（即日至12月10日，晚上18:30至21:30）
極品紅葉主題甜品推介
永楽屋 喫茶室 -- 「和風芋栗芭菲」
「永楽屋喫茶室」位於佃煮及和菓子老字號「永楽屋本店」嘅2樓。新推出秋季限定嘅「和風芋栗芭菲」有自家製嘅栗子雪榚、大大粒嘅渋皮栗子、紅薯等秋天當造食材，上面仲有一片鮮艷紅葉做裝飾，打卡啱哂。
The NEXT DOOR lower east nine hostel -- 「秋之棉花糖吐司&紅薯拿鐵」
呢間Cafe位於旅舍「The NEXT DOOR lower east nine hostel」地下1樓，紅葉時期推出主題吐司甜品同特色飲品。棉花糖吐司呈艷麗嘅深紫色，同紅薯拿鐵上面都有一片紅葉作點綴，真係靚到唔捨得食呀！
二篠若狭屋 寺町店 -- 「栗子刨冰」及「賞楓」
介紹返，呢間人氣和菓子老字號今年有兩款紅葉主題甜品。第一款係「栗子刨冰」，特別採用玄米茶糖漿，令和栗本來嘅風味更突出，濃厚嘅糖漿同刨冰好夾，食起嚟唔會太甜。刨冰每年只有呢段時間供應，再凍都要試啦～第二款係的的骰骰嘅和菓子「賞楓」，顏色奪目、賣相精緻之外味道亦唔會過甜。
(圖: 官方Facebook)
吉祥菓寮 -- 「秋季香芋蘋果芭菲」
吉祥菓寮最拿手以黃豆粉製作各式甜品，季節限定嘅「秋季香芋蘋果芭菲」外表係超搶眼嘅紫色，材料有紅薯、蘋果、自家製嘅紅茶啫喱等。紅葉季連日嚟成為祇園最受歡迎嘅甜品店之一，建議可以上午去試，唔駛排咁耐。