今年東京櫻花早咗綻放，復活節去東京玩啱啱係櫻花開得最靚嘅時期，一定要去賞櫻啦係咪先！介紹返必去嘅賞櫻熱點「代代木公園」同周邊美食俾大家，嚟緊去東京要Bookmark啦～
順便回顧埋上年介紹嘅賞櫻勝地👉目黑川及周邊美食推介
代代木公園
東京最大嘅都市公園之一。從3月底到4月初，可以觀賞到以染井吉野櫻為主嘅櫻花。 每年櫻花盛開嘅周末都吸引好多遊人去公園賞花，唔少人仲會喺草地揀個好位置坐低慢慢欣賞添。
(圖: 官方Twitter)
【代代木公園】
入園費：免費
開放時間：24小時
交通：原宿站 或 代代木公園站 或 明治神宮前站 步行3分鐘
Fuglen Tokyo
總店位於挪威首都奧斯陸，海外第一間分店選擇落戶代代木公園旁邊。之所以成為周邊一帶最受歡迎嘅Cafe，皆因佢2012年開業冇耐，就被《紐約時報》評價為「值得專程搭飛機一試」嘅Cafe。特別係《紐約時報》編輯都讚好嘅咖啡(Today's Coffee: 普通杯 360円 / 大杯 460円)，特點係富果味兼有清爽酸味。買定杯喺公園嘆就最啱。
(圖: 官方FB)セバスチャン (Sebastian)
呢間刨冰店以造型特別嘅「蛋糕刨冰」突圍而出，唔少媒體都介紹過㗎。「蛋糕刨冰」外面有滿滿嘅忌廉，上面仲有水果，單睇賣相真係呃到人。最受歡迎嘅口味係草莓蛋糕刨冰(1200円)同芒果蛋糕刨冰 (1100円)。是日供應嘅Menu同詳細營業時間可以去餐廳嘅官方Twitter睇睇。
Bondi Cafe
呢間Cafe以澳洲邦迪海灘命名，當然就係以海灘悠閒風格為概念啦。室內裝潢時尚，有衝浪板等做裝飾，令客人好似置身於海邊野餐咁。天氣好嘅時候，仲可以喺露天梳化座位嘆吓美食，都咪話唔寫意。主打Acai Bowl (700円起) 及Locomoco (米飯漢堡，1300円) 等菜式，食材堅持由日本國內或原產地直送，保證新鮮。期間限定嘅季節性菜單都頗受歡迎㗎。
(圖: 官網)