踏入十二月，終於就嚟聖誕節啦！就等小編介紹番3款期間限定主題甜品俾大家，款款都好睇又好食，今個聖誕飛日本要試吓～🎄
Mister Donut
Mister Donut嘅冬日系列同寵物小精靈合作，推出「比卡超冬甩」和「精靈球冬甩」(含稅各216円)。
之前有唔少分店一開門就售罄，所以而家以特定時段兼數量限定嘅模式發售中。（建議可先向店舖員工查詢發售時間） 比卡超冬甩裡面裝滿鮮忌廉，面層係香蕉味朱古力，口感鬆軟。
至於「精靈球冬甩」，面層係士多啤梨醬及白朱古力，仲會以伊貝或比卡超嘅紙托盤裝住添。
此外，聖誕節主題冬甩亦係期間限定發售。造型特別嘅雪人冬甩（含稅162円）有白朱古力、士多啤梨朱古力味，個鼻仲有粒紅色嘅糖衣巧克力，好可愛。另一款新冬甩係香蕉朱古力，口感鬆脆，五顏六色嘅朱古力碎增添節日氣氛。
※所有冬日限定口味發售至12月25日止（數量有限，售完即止）
人氣芝士撻專賣店Pablo今年推出「RED PABLO」系列，以聖誕老人嘅標誌紅色為概念，創作出聖誕期間發售嘅士多啤梨撻及甜品等。其中，Pablo Mini發售嘅「士多啤梨派對撻（含稅280円）」，有酸甜嘅草莓醬，配上粉紅色草莓芝士忌廉，好睇又好食。
※即日至12月20日發售。
FLIPPER'S STAND (新宿 / 原宿 / 中目黑)
梳乎里班戟布甸專門店「FLIPPER'S STAND」推出冬季新口味「奇蹟之梳乎里班戟布甸 士多啤梨芝士味（含稅669円）」。一杯入面有齊梳乎里班戟、布甸、含果肉嘅士多啤梨忌廉、芝士忌廉等，口感及味道層次豐富，令人一啖接一啖停唔到口。加上賣相吸引，一於相機食先。
此外，於12月18日至12月25日期間，有新宿店限定兼每日數量限定，使用稀有白草莓「淡雪草莓」製作嘅甜品「奇蹟之梳乎里班戟布甸 淡雪草莓味 (含稅702円)」，咁特別，點都要去排隊買杯試試。
※奇蹟之梳乎里班戟布甸 士多啤梨芝士味：即日至2019年1月15日 / 新宿店 原宿店 中目黑店 有售
奇蹟之梳乎里班戟布甸 淡雪草莓味：12月18日至12月25日發售/ 新宿店限定 / 各日數量限定 / 限下午3時至晚上9時發售