最近去東京玩嘅話，一定要留意呢個注目度No.1嘅新蒲點「GINZA SIX (ギンザ シックス)」！佢係銀座目前最大嘅複合式設施，入面包羅萬有，集潮流、美食、文化、商業於一身，總共有241間嚟自世界各地嘅品牌同餐廳進駐。喺4月20日開幕當日仲吸引2500人喺門口排隊等開門，非常墟冚。
1F(地下G樓): 地舖集結咗好多間超級名店，例如Valentino、Fendi等。特別一提「House of Dior GINZA」係Dior目前全球最大間嘅新舖。入面當然有齊最新嘅服裝系列同埋精品首飾，仲有日本首次登場嘅家品系列。佢仲踩過界開埋Cafe「
Cafe Dior by PIERRE HERME」，採用嘅餐具都係自家品牌出品㗎！
2F~5F: 以時裝服飾為主，唔少都係喺日本首次登場。望出中庭，仲有草間彌生嘅經典波點南瓜裝置藝術。
喺呢幾層除咗買買買，都可以搵到唔少美食。好似喺4樓嘅「中村藤吉」，係中村藤吉喺關東地區嘅首間分店；3樓有嚟自法國嘅galette專門店「framboise」，更加係佢喺日本嘅首間分店𠻹。
除此之外，6樓可以搵到結合埋Starbucks嘅日式生活書店「蔦屋書店」；B1樓係美容美妝樓層，有成38間品牌店舖；落到B3樓有搬遷後再營運嘅「觀世能樂堂」，係日本傳統能樂當中最大流派「觀世流」嘅演出場地。
GINZA SIX食乜好?小編精選美食大推薦😋
GINZA SIX嘅餐廳大致集中喺13樓食肆樓層、6樓Food Hall、B2樓食品樓層。我哋嘅日本小編特別揀咗其中6間人氣餐廳，仲親自踩場。究竟佢哋有咩特色同咩啱食？即睇第一身介紹！
【13F】豪豪哋歎一餐頂級美食
呢間連鎖熟成肉專門店提出新式肉類處理方法「長期熟成」，令佢成為日本食家嘅話題。而GINZA SIX分店可以講係佢嘅集大成之作，提供以日本國產但馬牛為主嘅世界最高級熟成肉。
呢度最大嘅特色絕對要數“リスニングイーツ (Listening Eats)”，客人要矇住眼、戴住耳機(耳機會播烤肉時嘅聲音)，之後食啖肉，話咁樣可以令客人專注品嚐肉嘅味道喎～呢個咁有噱頭嘅用餐方法，仲吸引唔少媒體報導。Listening Eats只限晚餐供應，價錢為12000円起。
如果覺得晚市太貴都唔使擔心，呢度嘅午市時段定價親民啲，2800円起，供應嘅熟成肉一樣高品質㗎👌！
▼小編喺下午1點到餐廳，一入門口就見到兩大舊肉吊喺櫃入面，好有氣勢。
▼行入啲就見到大落地玻璃窗，整體感覺光猛開揚。窗邊位全部面向窗外，而其他座位嘅椅背都比較高，感覺有少少似卡位。
午餐供應時間由11點至下午3點，可以預約訂座。餐牌有午市限定嘅3種選擇：烤牛肉丼(每日限定10碗 / 1800円)、2800円套餐同埋4800円套餐。小編今次揀咗2800円套餐，有前菜、主菜、甜品連麵包、咖啡。
▲前菜係意大利薄切鮁魚。柑橘系嘅清爽醬汁有少少顆粒口感，幾得意，鮁魚嘅厚薄適中，配搭起嚟非常適合。雖然望落好似份量唔多，但其實食落女仔都夠食。
▼主菜可以揀熟成豬肉或熟成羊肉，如果食4800円嘅套餐仲有得揀熟成牛肉𠻹。小編今次就揀咗熟成豬肉，食落完全無肉腥味，油脂啱啱好唔會肥膩，肉質爽口！另外伴碟仲有以胡椒、鹽調味嘅洋蔥蓉醬，可以依個人口味蘸點。小編就覺得肉本身嘅味道已經啱啱好，所以蘸少少醬就夠。
▼完美嘅一餐當然要用甜品作結。飯後甜品係柑橘口味嘅奶凍，配埋裹滿黑砂糖漿嘅士多啤梨，感覺好融合，而且唔會太甜，同經過深度烘焙嘅咖啡非常夾。
喺「銀座大食堂」呢個Food Hall，總共有10間嚟自日本各地嘅知名食肆。其中喺最入面嘅「銀座モダンテラス」，除咗可以食到自家食品之外，仲可以嗌埋隔離餐廳嘅名物餐點𠻹。首先喺Food Hall入口拎張橙色嘅卡，之後就跟住店員帶位入座啦～
小編當日下午1點幾去到，雖然無提前預約，但因為啱啱過咗午餐繁忙時間，所以唔駛等就可以入座。餐廳入面空間頗大，連梳化座位都有。好天嘅話建議大家可以揀露天座位，慢慢Hea吓享受吓😉
各餐廳嘅名物餐點一律定價1800円，共有8款俾大家選擇，午餐時段供應到2點，晚市由5點開始供應。今次就揀咗【北海道UEDAGUMI】嘅海鮮丼試吓！
▲丼飯上面灑滿炒芝麻、石蓴(海藻一種)、蛋絲，仲有主角三文魚子同埋海膽。甜味醬油可以依個人喜好淋上海鮮丼，同時亦帶出更有層次嘅好滋味。份量對女仔嚟講應該啱啱好，飽肚之餘唔會食剩嘢👌
1860年創業嘅【辻利】係京都宇治代表嘅日本茶專門店老字號，關東嘅食家們等了又等，終於等到佢嘅第一間關東地區分店喇！
除咗售賣各款日本茶及抹茶甜品，仲設有抹茶餐點外賣處𠻹。銀座店限定嘅「辻利軟雪榚 濃茶(630円)」、限定商品「京濃茶Terrine (法式抹茶凍, 2700円)」絕對係抹茶控必食。
▲軟雪榚可以揀杯裝或筒裝，雪榚望落偏深綠色，仲有啲抹茶粉，食落茶味濃郁唔會過甜，仲帶少少回甘，果然名副其實係「濃茶」呀！
食完雪榚，記得跟手買埋盒「京濃茶Terrine」拎走慢慢歎～
呢盒銀座店限定嘅超人氣Terrine一般到夜晚6、7點就會賣哂，所以朝早至中午時段去買就最穩陣！另外要留意嘅係佢要冷藏保存，最佳食用日期亦只限售賣當日。
▲抹茶Terrine入面原來仲有士多啤梨軟心啫喱。口感軟滑，有好濃嘅抹茶味，抹茶味亦唔假，味道同微酸嘅流心啫喱好夾😍！但可惜最佳食用日期得一日又要冷藏，冇得拎返香港做手信，唯有喺日本買完獨食啦！
呢間便當專門店主打「海苔便當」，供應魚系嘅「海」、肉系嘅「山」、蔬菜系嘅「畑」3款便當，定價每盒1000円，喺銀座嚟講絕對係平靚正之選😳！SIX開幕前已經被受一眾上班族關注，第一日所有便當仲早早售罄𠻹。即使依家離開幕已經有一段時間，都依然人氣旺盛，要攞籌先買到，每人仲限買兩盒。而今次小編就試咗「海」便當，同埋最受歡迎嘅肉系「山」便當。
▲打開「海」便當就見到大大舊三文魚🐟，調味偏淡唔會搶走魚本身嘅鮮味；經典配菜炸獅子狗，外層炸得酥脆；紫菜下面嘅白飯仲撈咗啲木魚碎，單食飯都夠哂香（當然連埋配菜一齊食就更惹味啦），就連小菜柚子醃漬蘿蔔都好好食～！唯一可惜嘅係舊玉子燒略嫌鹹咗啲（利申：個人口味）。
▲「山」便當嘅主菜係啖啖肉、又滑又彈牙嘅照燒雞扒，雞扒用鹽麴同生薑調味，送飯一流，醬油溏心蛋亦唔會太鹹。配菜「蘋果醋煮雜菇」有啲似漬物，帶少少甜味，幾特別。
以供應新鮮水果為主，同時提供各款口味嘅水果雪條，喺銀座OL界好有人氣。推介分店限定嘅口味「抹茶きなこもち (抹茶黃豆粉年榚雪條，550円)」、該店首次以「和風」做概念嘅甜品、凍蜜瓜包等。
外賣雪條吧嘅各款雪條可以俾大家即買即食，但如果想拎走都可以，店員會包裝好並提供保冷劑。想買手信的話亦有好選擇，以「KOHAKU Fruits Bar(1,600円)」最受歡迎。
▼「抹茶黃豆粉年榚雪條」嘅抹茶味偏甜，唔太重茶澀味，甜魔最啱。雪條入面仲有黃豆粉、連皮栗子、糯米團，每食一啖口感都唔同㗎。
▼紅豆蜜瓜包(320円)就細細個，麵包皮口感似軟曲奇，入面有滿滿嘅紅豆同忌廉餡，食之前以為會好甜，但試落清爽唔死甜。
▼「KOHAKU Fruits Bar」其實係傳統日本甜品「琥珀羹」，係將溶咗嘅寒天加入砂糖同糖漿，之後再凝固製成嘅和菓子。【PALETAS】以一貫嘅創新風格，將傳統甜品重新包裝，玩味十足。
一盒有7款口味：提子、花茶、梅酒、蜜瓜、橙、柚子、士多啤梨。
其中水果口味嘅果味甚濃，口感脆得嚟唔會過硬。不過和菓子始終偏甜，邊食邊歎茶就最啱。
呢度係創業於1947年，因白色戀人而為人熟知嘅「石屋製菓」喺北海道外嘅首家直營店。但呢度無「白色戀人」賣，反而主打其他產品。
銀座店限定嘅貓舌餅「Saqu (6種口味×各3片, 1944円)」，內有唔同口味嘅朱古力夾心，堅持使用北海道產材料，喺札幌工廠烤製好之後直送到銀座。
另一款出品「Zaqu (4盒裝 / 2,268円)」用北海道小麥粉製成麵筋，再揉合朱古力製作而成，口感幼滑。
小編當日一開舖10點半去到，眨吓眼已經出現人龍。店員會派號碼籌，上面寫住人數限制同每次購買嘅數量限制，可想而知人氣有幾勁。好彩最後都成功買到銀座店最受歡迎嘅Saqu～
▲包裝盒好有少女味。右列上至下：GIANDUJA (吉安地哈榛果朱古力)、抹茶牛奶、北海道葡萄酒。左列上至下：苦味couverture、濃郁牛奶、北海道芝士。
以下係小編試勻哂6款口味嘅食後感，俾大家參考～↓
【GIANDUJA (吉安地哈榛果朱古力)】：味道清淡，有淡淡嘅焦糖味。
【抹茶牛奶】：唔會太甜，有抹茶嘅茶澀味。夾心朱古力同抹茶餅乾嘅澀味幾夾。
【北海道葡萄酒】：聞落好香提子味，整體嚟講果味濃郁又清新，仲食到少少酒味。 (小編個人嚟講最鐘意呢款😋)
【苦味couverture】：有濃郁嘅朱古力香，口味名副其實係偏苦，啱哂偏好食黑朱古力嘅朋友。
【濃郁牛奶】：夾心牛奶朱古力嘅甜味，同餅乾嘅鹽味好平衡。果然係貓舌餅嘅經典口味！
【北海道芝士】：芝士味既香且濃。入口嗰時先食到芝士嘅鹹味，嗒落之後有啲清爽嘅酸味，食完仲有微甜嘅餘味，層次豐富。