眨吓眼又到咗食慾之秋，日本唔少人氣餐廳已經推出咗今年秋季嘅期間限定甜品。小編就嚴選咗以下嘅「秋限定・必食甜品」懶人包，有老是常出現嘅PABLO、日本茶老字號辻利，仲有日本話題嘅栗子班戟等等。一於Bookmark定，啱日子返鄉下嘅話必試！

PABLO

迷你芝士撻 栗子×栗子 (含稅1,100円)
(圖: 官網)

叫得做「栗子x栗子」，除咗撻上面有開半嘅原粒栗子，撻餡都加入咗以意大利栗子製成嘅栗子忌廉。芝士撻仲配埋甜甜酸酸嘅果肉藍莓醬+栗子雪榚，多重口感唔會膩。
供應期: 9月1日至10月14日  表參道店、道頓堀店限定發售

▼「Pablo抹茶黑蜜啫喱沙冰 」都係新登場，供應期由9月22日至10月14日
Premium Cafe - 表参道店 (2F)/ 道頓堀店 (2F) 限量發售 (含稅750円)

Casual Cafe - 表參道店 (1F) / ららぽーと立川立飛店 / 梅田HEP FIVE店 / 心斎橋オーパきれい館店 / 道頓堀店 (1F) / 京阪百貨店すみのどう店 / 京都八坂神社前店 限量發售 (含稅650円)

▼10月1日至10月31日將會推出期間限定嘅「秋色Mont Blanc芝士撻」
(圖: 官網)

上面有一層栗子忌廉同原粒渋皮栗，除咗忌廉芝士餡，仲有一層北海道鮮忌廉同清爽嘅藍莓醬，食落立刻變得無咁Heavy呀。

▼PABLO仲同樂天合作，以「PABLO和風芝士撻」為概念，推出咗期間及數量限定嘅「樂天和風芝士蛋糕朱古力批」。朱古力批入面有宇治抹茶忌廉芝士同黑蜜醬夾心，於PABLO分店及全國便利店有售。

辻利

秋之芭菲軟雪榚 (含稅950円) 及 京風蘋果批抹茶Latte冰沙 (含稅583円)

(圖: 官網)

カボザク (南瓜泡芙，含稅230円)

(圖: 官網)

人氣泡芙專門店ZAKUZAKU，推出萬聖節期間限定泡芙棒，忌廉餡係南瓜吉士味，軟滑有奶香唔死甜，包裝仲好精美添。南瓜吉士忌廉每日喺舖頭由人手新鮮製作，收到落單之後，先將滿滿嘅吉士忌廉注入現烤嘅泡芙內，所以食落真係脆卜卜㗎。溫提吓大家，「南瓜泡芙棒」只限東京晴空街道旗艦店有售。

供應期: 9月28日至10月31日　供應分店: 東京ソラマチ店

café & books bibliothèque

雲朵士多啤梨BonBon冰沙 (約1,700円)

(圖: 官網)

呢間人氣Book Cafe集Cafe、書店、藝術精品店於一身。今年秋天推出份量十足嘅Bon Bon冰沙，有士多啤梨、栗子、香蕉共3款口味，全部都有勁搶眼嘅棉花糖，一於相機食先。
Bon Bon冰沙供應期: 即日 至 11月14日　供應分店: 東京兩間分店、梅田店

其他秋季代表美食，好似蘋果、梨、南瓜、栗子等食材亦被設計成各款班戟，由9月至11月每月推出一款，創意度滿分～

J.S. Pancake Cafe

和栗Mont Blanc班戟 (含稅1,490円)

J. S. Pancake Cafe每年秋季推出嘅「和栗Mont Blanc班戟」向來獲得唔少好評。賣相似Mont Blanc，栗子忌廉用稀少嘅和栗製成，上面仲有甜煮渋皮栗，另外附上酸酸甜甜嘅覆盆子醬，可依個人口味添加。
供應期: 即日 至 11月19日　供應分店: 東京、大阪

(圖: 官網)

另外仲有10月限定嘅「黃金南瓜布甸班戟 (含稅1,380円)」。自家製南瓜布甸以北海道產嘅Kuririn南瓜製成，滑嫩彈牙，配埋鬆軟班戟，口感層次豐富。

The Coffee Bean & Tea Leaf

紫薯冰沙 (普通杯: 含稅648円 / 大杯: 含稅745円)

(圖: 官網)

呢間咖啡連鎖店嚟自美國加州，今年秋天就推出日本限定嘅紫芋特飲。百份百使用沖繩宮古島產嘅紫薯「ちゅら恋紅」製作，配合埋濃滑雲呢拿牛奶，飲落有奶香，仲有紫薯本身嘅柔和甜味添。
供應期: 9月20日至11月下旬　供應分店: 東京日本橋店、大阪兩間分店