京阪米芝蓮2018結果已經出爐，京都三星餐廳有8間 (比上年多1間)、新摘星有12間、車胎人美食新上榜有18間。今次日本小編幫大家喺12間新摘星餐廳中，精選咗必試5間。唔好理咁多，一於Bookmark定先再儲錢啦喂！
修伯 [一星]
餐廳喺「八坂の塔」旁邊，鄰近清水寺。供應嘅懷石料理套餐傳統之餘，亦有採用西方食材及烹調手法帶嚟新風格。
例如「野菜の盛込み」呢款前菜就嚴選咗20種時令蔬菜，再以最適合食材嘅各式烹調手法炮製而成。另外店員會喺甜品環節，將約10款日式、西式甜品送到客人面前，客人可以從中慢慢揀自己嘅心水，特別受女性顧客歡迎。
午市及晚市都只提供套餐，午市5,800円起，晚市12,000円起，必須提前訂座。
木山 [一星]
餐廳位於一幢住宅公寓地下，鄰近京都御苑，從丸太町站步行約5分鐘即達。主廚曾於「京都和久傳」鑽研手藝15年，獨立發展後於今年4月開咗呢間餐廳，短短半年就成功摘星，絕對係今年榜單上嘅話題餐廳。
呢度最與眾不同嘅係「水」，皆因係從餐廳自家水井抽取。懷石套餐以奉上一杯井水開始，據食客所講，的確係幼滑清甜。高湯係日本料理餐廳嘅靈魂，呢度製作高湯時都係用井水，仲會喺客人面前即場製作添。
午市及晚市都只提供套餐，午市10,800円起，晚市16,200円起，必須提前訂座。
鮨 和魂 [一星]
2016年秋天於京都四季酒店內開業。主理嘅壽司職人出身自東京南青山嘅知名餐廳「鮨 ます田 (2017東京米芝蓮指南二星餐廳)」。
呢度供應兩款廚師發辦握壽司套餐，每日由京都市場同築地市場購入最高級嘅新鮮食材，仲會以當日食材嘅狀態決定配搭同醋飯嘅溫度。客人享受美食嘅同時，亦可欣賞到歷史名庭「積翠園」嘅醉人景緻。
午市消費18,000円起，晚市23,000円起，必須提前訂座。
にくの匠 三芳 [一星]
位於祗園大街一幢京都古風樓房中，主打牛肉割烹料理。供應嘅和牛都係有名嘅品牌和牛，從京都、神戶及滋賀直送。懷石套餐嘅每樣餐點都係精緻嘅牛料理 (當然甜品除外)，例如以昆布絲及柚子醋調味嘅牛舌、備長炭燒牛腰肉、熬煮4個鐘嘅神戶牛柳昆布捲等，只此一家。
餐廳只提供套餐，價錢由21,000円起。
天麩羅 水暉 [一星]
【水暉】位於京都The Ritz-Carlton酒店地庫，分為會席料理、壽司、天婦羅、鐵板燒4部份。而今次獲得一星嘅【天麩羅 水暉】，所提供嘅天婦羅均採用日本國內外嘅優質食材，而且由老練專業嘅職人於客人面前即席烹調，新鮮炸起嘅天婦羅口感絕佳。午市套餐5,000円起、晚市套餐9,000円起。
其他米芝蓮消息：
大阪米芝蓮2018 車胎人平民推介精選：https://s.openrice.com/UbbcAzu0000
京阪米芝蓮2018 大阪新摘星餐廳介紹：https://s.openrice.com/UbbcAzm0000
大阪米芝蓮2018完整名單：https://s.openrice.com/UbbcAzW0000
京都米芝蓮2018完整名單：https://s.openrice.com/UbbcAze0000