喺銀座行咗成日街，血拼完之後當然想搵啲好嘢食架啦！雖然話銀座有好多選擇，但係唔係好多地方可以比你食到又平又靚又正嘅放題。 所以今次我哋會帶你去呢間叫「肉之權之助」，可以比你任食肉壽司嘅樓上舖。

真係抵到爛

肉之權之助

雖然呢間餐廳嘅普通菜單已經有得比你自製玉子燒，試下明太子意粉同埋燒地雞等等，但係最值得試嘅，係只係從星期一到星期四先有嘅肉壽司放題。1980 円飲食壽司，仲要包埋嘢飲，真係唔飲飽食醉都對唔住自己！

唔係好多地方可以食到肉嘅壽司，而喺「肉之權之助」，你將有機會試到放鴨胸、烤牛肉、五花腩、雞火腿同埋紅肉喺上面嘅壽司。呢啲壽司全部都有啲帶有唔同風味嘅配料喺上面，所以唔點豉油都好好食。未食過肉壽司嘅你，快啲去感受下同普通食到嘅魚刺身壽司有咩唔同啦！

另一個賣點係，你黎得「肉之權之助」，就會有得坐獨立個室。個室嘅大細就當然要睇你幾多個人一齊黎啦。有房坐，同朋友傾幾大聲嘅偈都唔洗擔心嘈到隔離枱！

滿載綠茶驚喜嘅呢個盒

Salon Ginza Sabou

由「肉之權之助」出嚟轉左行番出大街，就會見到斜對面有個外表超嶄新嘅Tokyu Plaza。喺呢間商場入面有好多有形舖頭，而今次想介紹比大家嘅Salon Ginza Sabou 就正正置身係呢棟大廈嘅地下。

喺呢間Cafe 最受歡迎嘅係價值 1500 円嘅綠茶甜品 set。除咗包一杯嘢飲之外，呢個set最出名嘅係用個四方盒裝住嘅綠茶甜品。你仲可以因個人喜好，揀濃味或者淡味嘅綠茶。

望住佢綠油油、擁有日本寺廟入面嘅禪境花園嘅石紋嘅外表，好難相信下一步竟然要打爛最上面嗰塊朱古力先至可以食到下面充滿住綠茶雪糕、慕絲、紅豆、更加多嘅朱古力、同埋糯米糍嘅內餡。每一啖都唔同口感，而你嘅好奇心好有可能會令你一開始咗就停唔到落嚟！

免費畫廊 Hop 你試過未？

銀座嘅名店除咗賣高級奢侈品之外，其實仲係好多藝術家嘅天堂。喺某幾個大品牌嘅最高幾層，時時都有開放比大眾嘅現代美術展覽。其中包括油畫、名設計師嘅鞋、雕塑、同埋唔同藝術家獨有嘅展覽房。最緊要嘅係，全部畫廊都可以免費入場，太好了吧！

想搵呢啲免費畫廊嘅話可以請移玉步到：Hermes, Chanel, Shiseido, Nikon, and Pola.