動画
上記は参考情報です。詳細はレストランでご確認ください。
喺日本食晚飯，星期一通常都係最難搵地方嘅，因為大多餐廳都唔開門，真係冇諗到tabelog當時有成4.03分嘅燒肉割烹店「雪月花 銀座」竟然一上網就訂到位！位於銀座市中心嘅樓上餐店樓底高高，光線充裕，合共有十二個吧位圍繞住廚師們嘅開放式大舞台。週一晚果然係淡，除咗兩老表之外，另外只有一個外國客。（當晚XO仔因有傷在身而行動不便，所以啲相嘅角度有所限制，還望讀者們見諒。）每位席上都擺有私人嘅木造托盤及自用餐具。入座後，服務生即送上飲品餐牌。表妹出名飲得兼溝得，唔洗多諗已經決定一試包咗一杯香檳、一杯白酒、三杯紅酒嘅餐酒配對套餐「Pairing 5 (Dom Pérignon + Omakase)」（18,000円）。唔溝得嘅XO仔就只係淺嚐咗兩杯日本清酒，覺得唔係太啱口味所以就冇再加馬。唔知係咪因為店子只提供一款廚師發辦晚餐（25,000円，另加稅及服務費）嘅關係呢，所以連餐牌都冇印，幸好懂得上網的話可隨時下載。餐桌上只係擺咗張「本日の銘柄牛」供食客自行參考。上菜時師傅們只係好粗略地簡介就算，細佬其實都有試圖用日文同佢地溝通架，可惜只換來二人以黑面對待，當真不是味兒！和牛お造り（最上牛赤身withキャビア）：處理好酒酒後，第一道菜隨即上枱，和牛他他色澤鮮美，最底層嘅多士半腍半脆，鮮紅嘅和牛赤身柔潤不膩口，以魚籽醬點綴有效地添上香濃，口感同賣相一樣咁有層次。有一點好奇怪，對應返網上餐牌時發現桌上嘅乃列表上第三項和牛刺身中嘅「最上牛赤身withキャビア」，心諗係咪師傅唔記得咗「先付」呢？不過之後見其他菜式如牛心、冷麵、燒野菜等都失蹤哂時，就索性當佢係臨時改咗新菜單就算。本日牛コンソメスープ：第二味牛肉清湯好有型地斟落隻酒杯入面，由於熱氣不斷上升，要等一陣先可以飲，湯湯芳香清甜，用杯飲感覺多咗份高雅嘅感覺。觀賞師傅燒割和牛之時，大家可以食住啲香辣嘅泡菜、黏爽嘅秋葵、同又甜又多汁嘅水果蕃茄。塩焼物（タン）：源自神戶嘅和牛牛脷外焦內半生熟，雖則唔算特別肥厚，但咬落都好爽，墊底嘅青瓜絲酸酸甜甜，可一解油膩。タレ焼物（レバー）：牛肝未煮前已經睇得出佢又厚又滑溜！深知牛肝熟哂個質感會好唔同，生食先可以確保最滑嘟嘟，所以趕住要盡快食，事實亦確直如此，結果快速影相時對唔到焦。タレ焼物（サーロイン）：和牛西冷喺大火中燒至兩成熟。西冷燒香咗嘅外層一啲都冇燶，中間潤紅嘅和牛個滑度同之前啲牛肝絕對有得揮！タレ焼物（ヒレ）：兩口子都係第一次食厚切嘅和牛壽喜燒，估唔到咁厚肉嘅牛柳竟然超級腍身，沾滿鮮黃亮麗嘅月見蛋黃醬豉油足以添上香滑，壽喜燒嘅甜美直達味蕾，好有驚喜！旬野菜サラダ：節令野菜沙律好清爽，個人只係略嫌個汁酸咗啲。タレ焼物（ハラミ）：神戶和牛嘅裙邊肉只係燒熟咗個表皮，中間鮮紅色嘅牛肉係全生嘅，軟腍嘅和牛好香，捲入頂面嘅洋蔥絲及蒜泥，再輕輕點上酸汁，惹味嘅同時又可分解肥牛中嘅油脂，掂呀！和牛天婦羅：以煲仔上嘅和牛天婦羅有勁多辣椒陪伴，但師傅講明啲辣椒只係裝飾，千祈唔好食！煲中兩件炸和牛件層炸皮唔鬆兼唔脆，最弊係舊肉好大陣羶味同千年油膱味，當真劣也！特產松板牛（トップブレード・ショートリブ）：離遠睇見紅白紋理鮮明嘅特產和牛薄片已經流哂口水！碟子上方為牛板腱，下方則為牛仔骨肉，兩者嘅肉質均腍滑軟潤，肉汁豐沛，甜美可口。牛內臟：壓軸上陣嘅牛肚同牛腸超韌，少啲牙力都冇可能咬到，不過最大問題係嗰陣押味，即使師傅用上辣椒調味都未能闢除異味，完全唔掂當呀！食事（雪月花カレー）：單尾所謂嘅招牌咖哩牛肉飯賣相已經唔係咁吸引，白飯粒粒飽滿還可以，敗筆在於咖哩汁入面啲牛肉疑似係用下欄所煮出，啲肉粗嚡到呢，醉酒佬都唔會收貨囉！甜品：諗住結尾嘅甜品起碼會有節令嘅生果啦，點知居然係連罐頭桃桃都冇嘅淨杏仁豆腐，豆腐仲要粉到好似啲磨砂護膚品咁，也太hea了吧？！高級燒肉割烹名店「雪月花 銀座」環境簡樸高雅，最要不得嘅係服務生及廚師們合共三人嘅態度都一樣咁高傲，如果自己唔係識少少日文或許會有更大嘅溝通問題，望多兩眼黑面神絕對會影響食欲！廚師發辦晚餐中大部份嘅和牛都好好味，咁啱唔合格嗰兩味都係師傅試圖以濃味去掩蓋啲羶押味，無心燒割烹煮之心盡在餸菜的細節裡，埋單每人平均四萬六千円實在不值，零誠意令性價比低下加低！
続けて読む