東京表參道係亞洲潮流聖地，吸引唔少歐美餐廳揀喺嗰頭插旗，當然出色嘅本地餐廳都有好多。下面為大家介紹表參道一帶嘅7大人氣餐廳，餓底們睇完就唔怕迷失表參道啦！
【新餐廳系列！話題排隊熱店】
開業之前就談論度極高，必睇必Bookmark！↓↓
日本小編親試--bubo BARCELONA (2017年2月4日開業)
總店位於西班牙嘅高級甜品店「bubo BARCELONA」，3個月前喺表參道開設咗日本第1間分店，同時亦係亞洲第2間分店。店面分兩層，地下係外賣部，上一層係堂食咖啡店。招牌甜品「シャビーナ（Xabina）（堂食1000円 / 外賣864円）」以濃郁嘅朱古力搭配份量適中嘅丁香同肉桂香料，唔會過甜，啱哂大人口味，蛋糕上面仲有一件馬卡龍作為點綴。堂食的話仲有雲呢拿醬、莓醬、果仁等嘅靚靚伴碟添。
推介嘅精美甜品當然唔止一款，好似日本限定嘅「サハラ（Sahara）（堂食840円 / 外賣692円）」用焦糖香蕉配柚子，口味清爽帶鮮果嘅甜味；「ナメラカ（Nameraka）（堂食940円 / 外賣800円）」以高級黑香豆製成忌廉，配上金磚蛋糕及薄餅餅底，口感幼滑。
GOMAYA KUKI (2017年3月12日開業)
「世界最濃抹茶雪榚」上年喺日本大熱，今年可能到呢杯「世界最濃芝麻雪榚」掀起熱潮都唔定！
「GOMAYA KUKI」主打嘅超特濃芝麻雪榚號稱用九千粒芝麻製作，而且選料講究，芝麻嘅供應商係一間超過130年歷史嘅老字號芝麻廠「九鬼産業」。「くろ 超特濃 (500円)」雪榚，口感軟滑入口即溶唔在講，而且名副其實黑芝麻味超濃，好似食緊一嗒黑芝麻咁。有黑芝麻，當然有白芝麻雪榚「しろ 特濃 (500円)」，叫個雙拼試齊兩款邊食邊比較吓，自然大滿足啦！
(圖片:GOMAYA KUKI)UMAMI BURGER (2017年3月24日開業)
「UMAMI BURGER」從有傳進軍日本開始，就勁多日本食家關注，大家等到頸都長，終於等到佢喺今年3月底正式營業啦！
呢間連鎖店2010年喺美國洛杉磯開設首間店舖，曾經被選為「年度最佳漢堡」，而店名「UMAMI」係日文「美味」嘅意思，因為創辦人Adam Fleischman希望以漢堡包呈現出最好嘅味道。日本分店除咗必點嘅「UMAMI BURGER (1380円)」等經典漢堡，仲有日本限定嘅「TERIYAKI BURGER (1380円)」同「 FISH CURRY BURGER (1280円)」添。
(圖片:UMAMI BURGER JAPAN)
【表參道代表美食x創新美食】
表參道Hills背面嘅「裏參道」有好多特色隱世小店，好似有超過50年歷史嘅吉列豬扒店「とんかつまい泉の本店」；喺2016年開業，用舊民宅翻新改造而成嘅「裏参道ガーデン」，從老字號到話題熱店都有。喺表參道行完名店，不妨行埋裏參道感受一下截然不同嘅氣氛。
講到表參道一帶嘅人氣必食餐廳，一定要數呢間喺2014年開業嘅麵包店兼Cafe「パンとエスプレッソと」。餐廳名開宗名義，就係主打麵包同埋espresso嘅 (其實除咗espresso仲有其他咖啡賣㗎)。
咁多款麵包入面最出名嘅要數「ムー (Mu-)」呢舊大方包，據講口感好幼滑唔會話乾爭爭，就咁食或者整多士都一樣咁正，用佢整嘅西多士當然都係大人氣之選。呢度喺朝早8點至10點會提供早餐版嘅「特製西多士 (550円)」，下午3點之後就提供「鐵板西多士 (650円)」，兩款西多士都吸引好多人慕名而至。除咗西多士同帕尼尼之類嘅麵包套餐之外，午市時段仲有沙律套餐。另外咖啡師即沖嘅espresso都係賣300円，CP值超高。
表參道一帶係Pancake專門店嘅激戰區，其中呢間「幸せのパンケーキ」，絕對係戰區內必食嘅其中一間！呢間連鎖店嘅總店喺大阪南船場，北至仙台、南至沖繩都有分店，係日本嘅人氣Pancake專門店。同餐廳同名嘅「幸せのパンケーキ (1,100円)」用嚴選嘅食材製作，每塊Pancake都用大約20分鐘慢火烘烤，火候啱啱好，搽埋高級麥盧卡蜂蜜＋發酵牛油製成嘅醬，加埋濃滑鮮忌廉，一啖食入口真係好幸せ(幸福)呀！
喺KIDDY LAND嘅後面往涉谷方向行，有條俗稱「貓街」嘅購物街，附近一帶商圈有唔少人氣服裝品牌同古着店，絕對係潮人集中地，近年唔少話題餐廳都喺呢頭開舖添㗎！
喺紐約超紅嘅DOMINIQUE ANSEL BAKERY 2015年喺日本開設第1間分店之後，每日喺表參道店門口都有排隊人潮。之所以吸引咁多人慕名而至，皆因呢度嘅出品好食之餘又夠哂創意。
必食嘅除咗有牛角包同冬甩嘅混合體「クロナッツ(550円)」，仲有勁有自家風格嘅法式奶油酥「DKA (550円)」、用燒棉花糖包住雪榚，外熱內冷嘅「フローズンスモア (750円)」、用朱古力曲奇做成杯，再倒入鮮牛奶嘅「クッキーショット (480円)」等等創意甜品，全部都係呢度首創㗎！
2015年喺表參道開業以嚟就經常被各大媒體介紹，連杜如風都食過，所以呢間餐廳相信唔少人都聽過，就算唔記得個名，都應該知佢賣乜，就係龍・蝦・包喇！
龍蝦嚟自盛產龍蝦嘅美國緬因州，招牌龍蝦包 (980円，美國尺寸1580円)夾咗份量十足嘅龍蝦肉，龍蝦以檸檬、牛油同各式調味料調味，味道啱啱好之餘仲啖啖肉。除咗龍蝦，仲可以揀蟹包同蝦包，或者雙拼都得，得咗！
(圖片:LUKE'S)