うまい鮨勘 赤坂店

Open Now

Now Closed

喺天台花園「コマツビル屋上庭園」（Komatsu Building Rooftop Garden）賞完花花後，步行往「赤坂サカス」（Akasaka Sacas）搵哈利波特途中路經一間壽司屋「うまい鮨勘」（Umai Sushikan），姨媽就提議入去食個下午茶。因日本仍受疫情影響，散座及廚房均仍以膠板及膠簾隔開。眼見午餐過後店內客人不多，就要求坐壽司吧，可惜帶位哥哥告知吧位只供預先訂座之客人，態度強硬，明顯冇商量餘地。結果四口子被安排坐最入嘅卡位。店子木造嘅裝潢簡潔衛生，牆上可見節令嘅推介菜式。電子落單有不同語言選擇，流程簡易清晰。自助餐具及調味均擺放於餐桌上。肥肥家族最捧伽利略場，歡樂時光當然係要暢飲主角代言嘅朝日生啤啦！如相所示，散點刺身賣相唔算特別吸引，質素亦比較普通，當中三文魚尤其失色，拖羅仲見不少血絲。最好食就係香濃肥潤嘅火炙大拖羅壽司「炙り天然まぐろ大とろ壽司」（550円/件）。只屬和暖嘅蟹肉燉蛋「かに茶碗蒸し」（890円）味道偏淡，都係好一般。壽司專門店「うまい鮨勘」環境乾淨企理，無奈服務生不大友善好客，直令家人有感不受歡迎！魚生質量平庸，請恕小弟未能推介此家無心壽司。